პროფესიით ექიმი დიდი საფეხბურთო გამოცდილებით! ვლადიმერ ხაჩიძე ქუთაისის ტორპედოს მთავარ მწვრთნელად დაინიშნა

ქუთაისის "ტორპედომ" ახალ მთავარ მწვრთნელად ვლადიმერ ხაჩიძე დანიშნა. გამოცდილი სპეციალისტი უეფას პრო-ლიცენზიის მფლობელია. ის 1951 წლის 1 ივნისს დაიბადა, პროფესიით ექიმია. საინტერესო სტატისტიკა - "ტრანსფერმარკტის" ცნობით, ხაჩიძე გუნდებში საშუალოდ 1,77 წლის განმავლობაში მუშაობს.

გამოცდილ სპეციალისტს ბევრ გუნდში უმუშავია - ხაშურის "ივერიაში", გორის "დილაში", "ბორჯომში", ახალციხის "მესხეთში", "გაგრაში" (2008-2009), ცხინვალის "სპარტაკში" (2010-2013), 2014 წელს დაბრუნდა "ბორჯომში", ხოლო 2016 წელს "ჭიათურა" ჩაიბარა...

ბოლოს ხაჩიძე  "ვიტ ჯორჯიას" მწვრთნელი იყო და გუნდს 2019 წლის 1 იანვრიდან ხელმძღვანელობდა. "ვეტერინარებთან" კონტრაქტი 2020 წლის 30 ივნისს ეწურებოდა, მაგრამ ხელშეკრულება ურთიერთშეთანხმების საფუძველზე შეწყვიტა.

ხაჩიძეს ბევრი და საკმაოდ საინტერესო მოთამაშე გაუზრდია. მაგალითად, პირადად მისი დაწინაურებულია საქართველოს ნაკრების ყოფილი მეკარე, ბოლო წლების ქართული ფეხბურთის ერთ-ერთი ყველაზე კოლორიტული ფიგურა - ნიკა ტოგონიძე, რომელიც უგუნდოდ იყო დარჩენილი და ხაშურის "ივერიაში" მიიწვია, ათამაშა და დიდ სარბიელზე გაუკვალა გზა.

ხაჩიძეს საკმაოდ საინტერესო გუნდებიც ჩამოუყალიბებია - "ბორჯომი", რომელიც სამეულისთვის იბრძოდა, "ვიტ ჯორჯია", რომელიც მის პერიოდში ლიდერებში იყო, მწირი შესაძლებლობებით ცხინვალის "სპარტაკი" მის ხელში ანგარიშგასაწევი ძალა გახდა...

აქვე, კიდევ ერთხელ დავაკონკრეტებთ, რომ ხაჩიძე ქუთაისურ გუნდში მთავარ მწვრთნელად დაინიშნება, რადგან პროლიცენზიის მქონეა, ოღონდ, მიხეილ აშვეთია და მისი სამწვრთნელო შტაბიც "ტორპედოში" რჩება და შედეგზე პასუხისმგებელიც ის იქნება.

მოგეხსენებათ, აშვეთიას მთავარი მწვრთნელის პოსტის დაკავების უფლებას  ფეხბურთის ფედერაციის მიერ 2019 წელს დამტკიცებული ლიცენზირების მკაცრი წესი (ეროვნულ ლიგაში მთავარ მწვრთნელად მუშაობისთვის პროლიცენზიაა აუცილებელი) არ აძლევს. მაგრამ აქვე ვიტყვით, რომ ხაჩიძე, რომელსაც ზღვა გამოცდილება აქვს, ფორმალური ფიგურა ვერ იქნება - ის სამწვრთნელო საქმიანობასა და სავარჯიშო პროცესში ჩართული უნდა იყოს.

ის უკვე ქუთაისშია, გაეცნო გუნდსა და აშვეთიას შტაბს. პირველად "ტორპედოს" მთავარი მწვრთნელის რანგში მოედანზე 7 მარტს გაიყვანს. ქუთაისელებს სამტრედიის "ეროსი მანჯგალაძეზე" იმერული დერბი ელით.

2062
მკითხველის კომენტარები / 1 /
თეიმურაზ რეხვიაშვილი
0
წლევანდელ დინამოს თამაშის შემყურე ობივატელი იფიქრებს რომ ჩხეტიანიც ხაჩიძის ანალოგი იყო ტორპედოში საერთოდ ქართველ მწვრთნელებში ასეთი ან მსგავს შემთხვებებს ხშრად აქვს ადგილი,როდესაც ასისტენტებად საკმაოდ ძლიერი მწვრთვნელები მუშაობდენ და მუშაობენ–კუტივაძე და ახალკაცი,ცხადაძე და ჩიხრაძე,არველაძე და ტყებუჩავა,ბერიძე და კოჭლაშვილი,ყიფიანი და ძოძუაშვილი,ხურცილავა და ხელაძე.
მსგავსი ამბები
რუბრიკის სხვა სიახლეები
;