'პსჟ'-ს პრეზიდენტი: ნეიმარი რჩება! ამას მეათასედ ვამბობ... ემერის წასვლა აუცილებელი იყო

"პარი სენ-ჟერმენის" პრეზიდენტი ნასერ ალ ხელაიფი საინტერესო მოსაუბრე აღმოჩნდა.

"ეკიპთან" ინტერვიუში ის უარყოფს ცალკეულ ხმებს, რომელიც სატრანსფერო პოლიტიკას ეხება, აღფრთოვანებას ვერ მალავს ჯანლუიჯი ბუფონითა და უნაი ემერით, რომელიც თავად გაათავისუფლა პოსტიდან, და კიდევ ერთხელ ამტკიცებს, რომ "პარი სენ-ჟერმენი" სწორ გზაზეა...

თითოეულმა მათგანმა
უნდა შეიგნოს...

- როგორ შეაფასებთ განვლილ სეზონს?

- ძალიან კმაყოფილი ვარ: მოვიგეთ ოთხი ეროვნული ტურნირი, მესამედ - ბოლო ოთხი წლის განმავლობაში. ერთადერთი, რასაც ჯერ ვერ შევწვდით, ჩემპიონთა ლიგაა და ამან ძალიან გაგვიფუჭა ხასიათი.

- ...გაგიფუჭათ და მერე როგორ!

- ჩემპიონთა ლიგაში ძალიან ბევრი ფაქტორია გასათვალისწინებელი. მაგალითად, წილისყრა. მაინცდამაინც "რეალს" შევხვდით... ანუ ყველაფერი ასეთ დეტალებზეა აგებული. კიდევ ტრავმირებულები, ობიექტური მსაჯობა, იღბალი... "რეალთან" სტუმრად 80 წუთის განმავლობაში უკეთ ვთამაშობდით, მაგრამ ვაგებდით.

საპასუხო მატჩში ვერ ითამაშა ნეიმარმა, გააძევეს ვერატი... დამეთანხმეთ - "რეალს" უზარმაზარი გამოცდილება აქვს. თუმცა ყველა ამბობდა, რომ "პარი სენ-ჟერმენი" იყო ფავორიტი, რადგან მადრიდელები არასტაბილურად თამაშობდნენ თავიანთ ჩემპიონატში. თუმცა ფაქტია - ლიგისთვის "რეალი" ყოველთვის მზად არის და ამ სეზონში ეს კიდევ ერთხელ დამტკიცდა.

- ...მაგრამ "რომა" ნახევარფინალამდე მივიდა, "ლივერპული" ფინალში გავიდა...

- მოდი, ვაღიაროთ, რომ მათ ეს დაიმსახურეს. არა უშავს, ადრე თუ გვიან, "პარი სენ-ჟერმენიც" ავა მწვერვალზე და საუკეთესოები ვიქნებით ევროპაში. არ დაგავიწყდეთ - პსჟ ახალგაზრდული გუნდია.

"ბარსელონამ" ჩემპიონთა ლიგა პირველად მხოლოდ 1992 წელს მოიგო, თუმცა მისი ისტორია მე-19 საუკუნიდან იწყება. ყოველ წელს ვრწმუნდები, რომ ჩვენ - ხელმძღვანელობაც, ფეხბურთელებიც - სწორ გზაზე ვართ. ვაგროვებთ გამოცდილებას, ვსწავლობთ შეცდომებზე...

- რა გაკლიათ ყველაზე მეტად ამ მომენტისთვის?

- დიდი დარაზმულობა. ყველა მოთამაშეს უფრო მეტად უნდა სჯეროდეს საკუთარი თავის. თითოეულმა მათგანმა უნდა შეიგნოს, რომ პსჟ დიდი კლუბია და თუ რაიმეს მიღწევა გვსურს, აუცილებლად მივაღწევთ.

ცვლილებები აუცილებელი იყო

- წარუმატებლობაში უნაი ემერია დამნაშავე?

- დამნაშავეა ყველა ჩვენგანი: მეც, სამწვრთნელო შტაბიც, ფეხბურთელებიც, ქომაგებიც... ყველა! არ მინდა, ვინმეს პერსონალურად დავაბრალო წარუმატებლობა, ეს არის ჩემი სტილი. ემერი ორი წლის განმავლობაში თავდაუზოგავად მუშაობდა, ორი წლის განმავლობაში 7 ტიტული მოიგო, ინტელიგენტი კაცია... მე მას წარმატებებს ვუსურვებ.

- ...მაგრამ მაინც დაითხოვეთ.

- იმიტომ, რომ აუცილებელი იყო ცვლილებები. ეს არა მარტო გუნდს, თავად ემერისაც სჭირდებოდა. ჩვენ მეგობრები ვიყავით და მეგობრებად დავრჩებით.

- იქნებ, ის არ იყო საკმარისად მკაცრი საიმისოდ, რომ გუნდი მუდმივად ტონუსში ჰყოლოდა?

- არა, ის საკმარისად მკაცრია. უბრალოდ, ცხოვრებაში დგება ხოლმე ცვლილებების დღე. ეს არის და ეს.

ჩვენ მოგვწონს ტუხელის
ფილოსოფია

- თომას ტუხელი უცნაური არჩევანია...

- შეიძლება, თქვენთვის არის უცნაურია, თორემ ჩემთვის - არა. მას სხვა კლუბებიც იწვევდნენ და თანაც - სოლიდური კლუბები. ტუხელი ამბიციურია, უყვარს ლამაზი, შემტევი ფეხბურთი. ძლიერი პიროვნებაა, შრომისმოყვარე... თან ახალგაზრდა. მას ჰქონდა პაუზა, დასვენებულია და ახალი ენერგიით შეუდგება მუშაობას. ერთი სიტყვით, მას აქვს ყველა მონაცემი საიმისოდ, რომ გუნდმა მოუმატოს. ჩვენ მოგვწონს მისი საფეხბურთო ფილოსოფია.

- ის საკმაოდ ხისტია. ეს არ შექმნის პრობლემებს ფეხბურთელებთან ურთიერთობაში?

- არანაირად! ის პატივს სცემს ფეხბურთელებს, ნამდვილი პროფესიონალია.

პარიზი მისი ბედისწერაა...

- მთავარი კითხვა: რჩება ნეიმარი პსჟ-ში?

- მეათასედ ვამბობ: დიახ, ის რჩება.

- ...მაგრამ, თავად რატომ არ ამბობს ამას?

- მამამისმა მითხრა: პარიზი მისი ბედისწერააო. თავად კი იმიტომ არაფერს ამბობს, რომ დაიღალა ამდენი სპეკულაციისგან. ყველამ ვიცით - ესპანური მედია ავრცელებს ამ ჭორებს. გნებავთ - დაუჯერეთ, გნებავთ - ნუ დაუჯერებთ. სიმართლე გითხრათ, მეც მომბეზრდა მუდმივად ერთი და იმავეს მტკიცება. მას პსჟ-სთან ოთხწლიანი კონტრაქტი აქვს.

- მან თავად მოგცათ პირობა, რომ რჩება?

- თქვენ გგონიათ, რომ მე ახლა ფეხბურთელებთან ნალაპარაკების შინაარსს გადმოგცემთ?

- ედინსონ კავანიც რჩება?

- საფრანგეთის თასის ფინალის შემდეგ მან მითხრა, რომ პსჟ-ში ბედნიერია და დარჩენა სურს. მას ორწლიანი კონტრაქტი აქვს. კავანი დიდი მოთამაშეა, მებრძოლი, საუკეთესო ბომბარდირი კლუბის ისტორიაში...

- მაშ, ვინ მიდის? ხავიერ პასტორე?

- ტიაგო მოტას სურს კარიერის დასრულება და ჩვენს აკადემიაში მწვრთნელად მუშაობა. ბოლო სიტყვა ტუხელზე იქნება. მისი გადასაწყვეტია, ვინ წავა და ვინ - დარჩება.

- ადრიენ რაბიო? მას არ გაუგრძელებია კონტრაქტი, თუმცა ის საჭირო ფეხბურთელია გუნდისთვის...

- მე ვიტყოდი, ფანტასტიკური ფეხბურთელია, მსოფლიოში ერთ-ერთი საუკეთესო ნახევარმცველი! ის ჩემთვის შვილივითაა. ვფიქრობ, რაბიოს წარმატებული სეზონი ჰქონდა. გული მწყდება, რომ მსოფლიოს ჩემპიონატზე არ მიდის. თუმცა ყველაფერს წყვეტს საფრანგეთის ნაკრების მწვრთნელი - ეს დიდიე დეშამის საქმეა.

- ანუ დარწმუნებული ხართ, რომ ისიც რჩება?

- დიახ, აბსოლუტურად! ის აქ შედგა, როგორც ფეხბურთელი. რატომ უნდა წავიდეს? ვიცი, რომ ამაზე არც ფიქრობს. თუმცა, რომ მოხდეს სასწაული და წავიდეს, ძალიან გამიკვირდება.

- პსჟ-ს მეკარე სჭირდება. შეიძლება, ბუფონი მოვიდეს?

- თქვენ შესანიშნავად მიცნობთ და იცით, რომელ და როგორ ფეხბურთელებს ვანიჭებ უპირატესობას.

- ...მაგრამ არის მისი გადმოსვლის ალბათობა?

- ჩვენ გვყავს არეოლა, შესანიშნავი მეკარე!

- ...და ის მომავალ სეზონშიც ძირითადი მეკარე იქნება?

- რა თქმა უნდა!

- ...და ბუფონი?

- უმაღლესი კლასის მეკარეა, ბრწყინვალე პიროვნება. დარწმუნებული ვარ, ის ნებისმიერი კლუბის ოცნებაა.

ყოველდღიური სპორტული გაზეთი "ლელო"
864
მკითხველის კომენტარები / 0 /
მსგავსი ამბები
რუბრიკის სხვა სიახლეები
;