ჟოზე მოურინიო: ეს არის ფეხბურთის დრამა, რომელიც ზოგისთვის ხანდახან უსამართლოა, და არსენ ვენგერი: როცა ფინალს აგებ ისე, როგორც ტოტენჰემმა წააგო... საფეხბურთო სამყარო ჩემპიონთა ლიგის ფინალზე მსჯელობს

ჩემპიონთა ლიგას ახალი გამარჯვებული ჰყავს. ევროპის უძლიერესი გუნდის ტიტული "ლივერპულმა" მოიპოვა, რომელმაც ფინალურ შეხედრაში "ტოტენჰემს" 2:0 მოუგო მოჰამედ სალაჰისა (პენალტი) და დივოკ ორიჯის გოლებით. საინტერესოა, როგორ გამოეხმაურნენ ამ თამაშს ფეხბურთის სამყაროში ცნობილი ადამიანები...

"ლივერპულის" ნახევარმცველები ძალიან ახლოს იყვნენ განლაგებულები მცველებთან. მათ მოქმედებაში ჭარბობდა პრაგმატიზმი. ეს თამაში ჩემპიონთა ლიგის ფინალი რომ არ ყოფილიყო და, ვთქვათ, ყოფილიყო პრემიერლიგის ტურის რიგით თამაში ან ინგლისის თასის ფინალი, ყველა შეთანხმდებოდა იმაზე, რომ თამაში არ გამოვიდა. ჩემი აზრით, თამაშის ხარისხი დაბალი იყო. "ტოტენჰემს" აქვს სრული საფუძველი, რომ იმედგაცრუებული იყოს. ასეთ თამაშებში გუნდმა საუკეთესო დონეუნდა აჩვენოს. მათ ეს ვერ შეძლეს", - თქვა ჟოზე მოურინიომ და იქვე მწვრთნელებზე ილაპარაკა:

"ძალიან ძნელია ერთი ფინალის წაგება, უფრო ძნელი - ორის და ასე შემდეგ. როგორც კოლეგას, ძალიან მიხარია კლოპის გამო, იმიტომ, რომ მან ფანტასტიკური მოცულობის სამუშაო გასწია. მაგრამ ეს არის ფეხბურთის დრამა, რომელიც ზოგისთვის ხანდახან უსამართლოა. აი, პოჩეტინო ავიღოთ - 4 ძალიან კარგი წელი გაატარა "ტოტენჰემში", გაიყვანა გუნდი ჩემპიონთა ლიგის ფინალში და ჯერ კიდევ ელოდება კარიერაში პირველ ტიტულს. ძალიან მწყდება გული მაურისიოს გამო...

ვფიქრობ, ინგლისელი ქომაგი ლოიალურია. სხვა ქვეყნებში მხოლოდ გამარჯვებაა მთავარი, ინგლისელებს კი ესმით, როდის დებს ფეხბურთელი მოედანზე ძალების 100 პროცენტს და როდის - არა. ჩემი აზრით, "ტოტენჰემის" ფანები უნდა ამაყობდნენ თავიანთი საყვარელი გუნდით. მოვა ახალი სეზონი და "ტოტენჰემი" ამაღლებული განწყობით დაიწყებს ახალ მარათონს და ამის მიზეზი იქნება ის, რაც გუნდმა უკვე დასრულებულ სეზონში გააკეთა".

"ჩემი აზრით, ჩვენ ვიხილეთ ძალიან საშუალო "ლივერპული". "ტოტენჰემს" აშკარად შეეძლო მეტის მიღწევა. მათ არ ეყოთ "მკვლელის ინსტინქტი" და ამ შეხვედრაში სწორედ ეს აღმოჩნდა მთავარი. ჩემი აზრით, აქ საქმე უფრო მეტად ფსიქოლოგიაშია და არა - სათამაშო კლასში. მჯერა, "ტოტენჰემს" მეტი შეუძლია", - ეს უკვე არსენ ვენგერის სიტყვებია.

"არსენალის" ლეგენდარული თავკაცი მიიჩნევს, რომ ორივე მწვრთნელმა ნაყოფიერი სამუშაო გასწია:

"მათ შესანიშნავად იმუშავეს და ამ ფაქტს ვერავინ გაექცევა. მაგრამ ისტორიას აქვს ერთი კანონზომიერება, რომელიც გვასწავლის - როცა ფინალს აგებ ისე, როგორც "ტოტენჰემმა" წააგო, მომდევნო წელს იქ დაბრუნების შანსი ნაკლები გაქვს. "ლივერპულმა" მეექვსედ მოიგო მთავარი ევროთასი, "ტოტენჰემმა" კი სასწაული მოახდინა, ტურნირის დასკვნით მატჩში რომ ეთამაშა. მომავალ წელსაც რომ ფინალში ითამაშოს, მას ამისთვის კიდევ ერთი და უფრო დიდი სასწაული დასჭირდება. "ტოტენჰემის" წლევანდელი მიღწევა უნიკალურია და მისი ფეხბურთელები, მწვრთნელი... ქვეცნობიერად ხვდებიან, რომ მომავალ სეზონში კვლავ გამოჩნდებიან "რეალი", "ბარსელონა", "ბაიერნი"... ამიტომ, მათთვის მარცხი უფრო მტკივნეულია, ვიდრე "ლივერპულისთვის" იქნებოდა", - ასკვნის მუსიე არსენი.

"რა დააკლდა "ტოტენჰემს"? პირველ ყოვლისა - ხასიათი. გუნდის ლიდერებს, დელე ალისა და კრისტიან ერიქსენს თითქოს არ უნდოდათ ბურთთან კონტაქტი, თითქოს, პასუხისმგებლობას გაურბოდნენ... თუმცა ამით ნამდვილად არ ვაკნინებ "ლივერპულის" გამარჯვებას. ამ გუნდმა დაიმსახურა ეს ტიტული და მისი გულშემატკივრებიც ღირსები არიან ზეიმის ორიჯი საშინლად ჩაერთო თამაშში. ეს არ არის ის დონე, რომელიც ლიგის ფინალს შეესაბამება. გოლი რომ ვერ გაეტანა, დიდი გაკიცხვის ღირსი იქნებოდა", - თქვა ანდრეა პირლომ.

"ლივერპული" წლიდან წლამდე უკეთესი ხდება და მან დაიმსახურა ეს მიღწევა. ეს არის ის, რისკენაც გუნდი გეგმაზომიერად, მიზანდასახულად მიდიოდა ამდენი ხნის განმავლობაში", - თქვა "ლივერპულის" ცოცხალმა ლეგენდამ და ექსბომბარდირმა რობი ფაულერმა.

საინტერესო უნდა იყოს იმ ადამიანის კომენტარიც, რომლის ორი შეცდომის გამოც "ლივერპულმა" "რეალთან" შარშანდელი ფინალი წააგო: "გულწრფელად მინდა მივულოცო ჩემს ყოფილ გუნდს, ბიჭებს!.. ეს არის ტიტული, რომელსაც იმსახურებდა თითოეული ფეხბურთელი და უკლებლივ ყველა გულშემატკივარი", - დაწერა სოციალურ ქსელში "ლივერპულის" ყოფილმა მეკარე ლორის კარიუსმა.

ყოველდღიური სპორტული გაზეთი "ლელო"
1705
მკითხველის კომენტარები / 0 /
მსგავსი ამბები
რუბრიკის სხვა სიახლეები
;