ჟოზე მოურინიო სკოტ მაკტომინიზე: მინდა, მას საჯაროდ ვუწინასწარმეტყველო დიდი მომავალი

"თქვენ მელაპარაკებით პოლ პოგბაზე. ამას ჯობია, სკოტ მაკტომინიზე ვილაპარაკოთ. ის შესანიშნავი ფეხბურთელია და მაგრად პროგრესირებს.

მინდა, მას საჯაროდ ვუწინასწარმეტყველო დიდი მომავალი", - როგორც წესი, ჟოზე მოურინიო დითირამბებს ჰაერზე არ ისვრის, მაგრამ მან სწორედ ასე თქვა ახალგაზრდა შოტლანდიელ ნახევარმცველზე და უთუოდ საყურადღებოა...

ვინ არის ფეხბურთელი, ვინც "მანჩესტერ იუნაიტედის" ძირითად შემადგენლობაში მკვიდრდება? ის მართლაც ქარიშხალივით შეიჭრა ჟოზეს ძალიან კონსერვატულ სამყაროში.

ეს ფეხბურთელი ჩვენს ძირითად შემადგენლობაში ვნახეთ "სევილიასა" და "ჩელსისთან" შეხვედრებში. რა თქმა უნდა, მკითხველისთვის მისი პერსონა ძალიან საინტერესოა.

საინტერესოა ისიც, თუ რომელ ქვეყანას აირჩევს მაკტომინი სანაკრებო ასპარეზად. ის მამით შოტლანდიელია. სკოტთა ახალმა დამრიგებელმა ალექს მაკლიშმა თავის ერთ-ერთ მთავარ პრიორიტეტად ახალგაზრდა ფეხბურთელების სანაკრებო ფერხულში ჩაბმა დაასახელა. როგორც ამბობენ, მაკტომინის გული უფრო შოტლანდიის ნაკრებისკენ მიუწევს.

ის 6 წლიდან "იუნაიტედშია", მარკუს რაშფორდის გვერდიგვერდ ერთ გუნდში თამაშობდა. ეგაა, რაშფორდისგან განსხვავებით, ჩვენი გმირი ყოველთვის განიცდიდა პრობლემებს სიმაღლესთან დაკავშირებით. ორი წლის წინ მისი სიმაღლე 167 სანტიმეტრი იყო, მაგრამ ტანი უცბად აიყარა და ახლა 193 სანტიმეტრია.

"ყველაზე კარგად მე ვიცი, რომ ჩემი სხეული არ იყო მზად ფეხბურთის სათამაშოდ. რომ არა მწვრთნელების ტიტანური ძალისხმევა, ამას ნამდვილად ვერ შევძლებდი. ჩვენ შედეგს ერთობლივი მუშაობის შედეგად მივაღწიეთ", - თქვა ფეხბურთელმა.

"იუნაიტედის" ახალგაზრდულ გუნდში მაკტომინის მთავარი მწვრთნელი უორენ ჯოისი ამბობს: "ჩვენ ერთად ვიმუშავეთ. სკოტის გამო ძალიან ხშირად მომისმენია კრიტიკა. ზოგი პირდაპირ მეუბნებოდა - რატომ ათამაშებ ამ ბავშვს, რას ერჩი, ვერ ხედავ, რა პატარააო?!. მაგრამ მე და ტომი თავდაუზოგავად ვმუშაობდით და შედეგიც მოვიდა".

რატომ ამჯობინებს ბოლო დროს მოურინიო მაკტომინის პოლ პოგბას? ბევრი მიიჩნევს, რომ 21 წლის ფეხბურთელის მთავარი კოზირი დიდი სამუშაოს შესრულება და მცველებს შორის ძალიან კარგად გახსნაა.

მაკტომინი არასოდეს ეხვევა სკანდალებში, არის ძალიან თავმდაბალი, არ ატარებს არანაირ ტატუს და აქვს ჩვეულებრივი ვარცხნილობა. ვისურვოთ, რომ მომავალშიც ასე გაგრძელდეს და მსოფლიო ფეხბურთმა კიდევ ერთი დიდი ვარსკვლავი მიიღოს...

ყოველდღიური სპორტული გაზეთი "ლელო"
552
მკითხველის კომენტარები / 0 /
მსგავსი ამბები
რუბრიკის სხვა სიახლეები