ჟოზე მოურინიო: ჩემს ფეხბურთელებს თამაშის სურვილი არ ჰქონდათ...

"მანჩესტერ იუნაიტედმა" საკუთარ კედლებში ვერ მოუგო (1:1) "ვულვზს". ისე, მოგებას ვინ ჩივის, ბოლო წუთზე დავიდ დე ხეამ იყოჩაღა, თორემ პრემიერლიგაში დაბრუნებული "მგლები" სულაც 3 ქულას წაიღებდნენ. საინტერესოა კია - "ვულვზმა" მეორე მანჩესტერულ გრანდსაც დააკარგვინა ქულები.

"იუნაიტედის" უნიათო გარჯა მაინცდამაინც სერ ალექს ფერგიუსონის "ოლდ ტრაფორდზე" დაბრუნებას დაემთხვა. მაისში გადატანილი ინსულტის შემდეგ ის შაბათს პირველად გამოჩნდა მშობლიურ არენაზე და ლოჟაში კუთვნილი ადგილი დაიკავა. რა თქმა უნდა, "ოცნებების თეატრი" დიდ "რეჟისორს" ფეხზე წამოუდგა და აპლოდისმენტებიც არ დაიშურა... ეგ იყო, იმ დღეს მსახიობებმა ვერ ითამაშეს ისე, როგორც სერ ალექსს მოეწონებოდა...

"სტუმრები უფრო აგრესიულები და მოტივირებულები იყვნენ. ვფიქრობ, შედეგი სამართლიანია. მათ დაიმსახურებს ეს ქულა, ჩვენ კი დავიმსახურეთ ის სასჯელი, რაც მივიღეთ. პირველი ტაიმი ისე ცუდად დავიწყეთ, გაგვიმართლა, ანგარიში ჩვენ რომ გავხსენით. ფეხბურთელებს თითქოს თამაშს სურვილი არ ჰქონდათ. როცა შენი პოტენციალის მხოლოდ 30 პროცენტს ავლენ, ვერაფერს მიაღწევ", - თქვა ჟოზე მოურინიომ.

1076
მკითხველის კომენტარები / 0 /
მსგავსი ამბები
რუბრიკის სხვა სიახლეები
;