რაგბის კავშირის პრეზიდენტი გოჩა სვანიძე: რუსულმა კლუბებმა ნადირობა გამოაცხადეს ჩვენს მორაგბეებზე

2019 წელი ქართული რაგბისთვის უმნიშვნელოვანესია. წლეულს მსოფლიოს თასის გათამაშება გაიმართება, რომელზეც ჩვენი ნაკრების მიერ ნაჩვენები შედეგი საქართველოს რაგბის კავშირის ოთხწლიანი მუშაობის ერთგვარი შეფასება, შეჯამება იქნება. იქამდე კი, სულ მალე, საქართველოს ახალგაზრდულმა ნაკრებმა უნდა ითამაშოს მსოფლიოს ჩემპიონატზე. ახლახან დასრულდა საქართველოს ჩემპიონატი, რომელიც საკმაოდ საინტერესო და დაძაბულ ბრძოლებში წარიმართა. ცხადია, ყოველივე ამის უკან მრავალი ადამიანის მუხლჩაუხრელი შრომა დგას. ამას გარდა სხვა მრავალი აქტუალური სარაგბო თემაც არსებობს, რომელთა შესახებ დეტალური საუბარი, საქართველოს რაგბის კავშირის პრეზიდენტ გოჩა სვანიძესთან ვცადეთ.

გოჩა სვანიძე: მომავლის არ გვეშინია! - ნაკრები თავს არ შეირცხვენს

- საქართველოს ჩემპიონატი ახლახან დასრულდა, რომელიც საინტერესო და საკმაოდ დაძაბული გამოდგა. კვარლცხბეკის სამივე საფეხური რეგიონების გუნდებმა დაიკავეს, რაც ძალზედ იშვიათად ხდება. როგორ, ფიქრობთ, არის თუ არა ეს რაგბის სწორი, მიზანმიმართულად განვითარების შედეგი?

- ვფიქრობ, რომ ჩემპიონატის დონე არ ამაღლებულა. სავარაუდოდ, გუნდების დონე გათანაბრდა და სწორედ ესაა მიზეზი მრავალი დაძაბული მატჩისა. შეინიშნება გარკვეული სტაგნაცია, რაც, ვფიქრობთ, კლუბების მწირი დაფინანსების ბრალია. ის ბიუჯეტი რაც გააჩნიათ კლუბებს არ არის საკმარისი განვითარებისთვის. იზრდება მოთამაშეთა მიგრაცია და ეს გუნდების თამაშის ხარისხზეც აისახება.

ყველაზე სტაბილური მდგომარეობა "ბათუმს" აქვს, რომლიც საბიუჯეტო კლუბია. ეს გუნდის თამაშსაც დაეტყო. ის ნელ-ნელა, ნაბიჯ-ნაბიჯ მიდიოდა დასახული მიზნსისკენ და წლეულს დამსახურებულად, ისე რომ კონკურენტი, ფაქტობრივად, არც ყოლია, ჩემპიონი გახდა. "ბათუმმა" რეგულარული გათამაშებაც დიდი უპირატესობით მოიგო და პლეი ოფშიც სათანადო წინააღმდეგობა ვერავინ გაუწია.

- მოთამაშეთა მიგრაციის დიდი ნაკადი აქამდე დასავლეთისკენ, საფრანგეთისკენ მიემართებოდა. ახლა, თითქოს მიმართულება შეიცვალა...

- დიახ, რუსულმა კლუბებმა პირდაპირ ნადირობა გამოაცხადეს ჩვენს მორაგბეებზე. ქართული კლუბები წინააღმდეგობას ვერ უწევენ და იძულებულნი არიან მოთამაშეები გაუშვან. ისინი, ვისაც ჯერ კდევ აქვს იმის პოტენციალი და იმედი, რომ ნაკრებში ითამაშებს, რუსეთში წასვლისგან თავს იკავებენ. აი 25-27 წლის მოთამაშეების შეჩერება კი, რომლებსაც ოჯახები ყავთ სარჩენი, შეუძლებელია. ცხადია, მათი გადინება ჩვენს კლუბებს ასუსტებს.

- რა გზა არსებობს ყოველივე ამას წინ რომ აღვუდგეთ?

- უწინარესად, უნდა განვაახლოთ კლუბების დხმარების სახელმწიფო პროგრამა. ამაზე მუშაობა უკვე მიმდინარეობს და ეს დიდი შეღავათი იქნება ჩვენი გუნდებისთვის. ასევე, საჭიროა რაგბის კავშირმა დააწესოს დამატებითი რეგულაციები, რაც ხელს შეუწყობს მოთამაშეების ინდივიდუალურ ზრდას. როცა კლუბები მოღონიერდებიან, გაიზრდება კონკურენცია, ამაღლდება დონე და რაგბის პოპულარობა, გაიზრდება კერძო სექტორის დაინტერესაბაც, რომლებიც ქართული კლუბების სპონსორობას მოინდომებენ. ზოგადად, განვითარების ახალი სტრატეგიის შექმნაა საჭირო. ამაზე უკვე ვმუშაობთ.

- საქველმოქმედო ფონდმა ქართუმ სერიოზული ინფრასრტუქტურული პროექტები განახირციელა. რა სიახელს გეგმავს რაგბის კავშირი ამ მიმართულებით?

- ცნობილია, რომ უკვე ოფიციალურად ჩაბარდა სარაგბო სტადიონები ნუცუბიძეზე და თელავში. ამჟამად, რაგბის კავშირი მუშაობს არქიტექტორთა ჯგუფთან, რომლებიც შეიმუშავებენ მცირებიუჯეტიან სარაგბო მოედნების პროექტებს. ამით ჩვენ გვინდა დავეხმაროთ რეგიონის ქალაქებისა და რაიონების ხელმძღვანელებს, რათა მათ შეძლონ რაგბის ახალი კერების გაჩენა. ამასთან ერთად, ჩვენი მიზანია, არა მარტო სარაგბო მოედნის, არამედ ზოგადად სპორტული კომპლექსის მოწყობა, რომელსაც სპორტის სხვა სახეობების წარმომადგენლებიც გამოიყენებენ. მაგალითად, სარაგბო ბაზაზე აუცილებლად უნდა იყოს ფიტნეს ანუ ძალოსნობისა და ჭიდაობის დარბაზები, რომლებიც სპორტის ამ სახეობების წარმომადგენლებსაც გამოადგებათ.

- სულ მალე, საქართველოს ახალგაზრდული ნაკრები არგენტინაში გასამართ მსოფლიოს ჩემპიონატში ჩაებმება. გუნდმა მზადება უკვე დაასრულა და არგენტინაში გაემგზავრა. რამდენად შეძლო რაგბის კავშირმა "უმცროსი ბორჯღალოსნებისთვის" სათანადო მოსამზადებელი პირობების შექმნა?

- ამ ნაკრების მოსამზადებლად ყოველ წელიწადს თანხას არ ვიშურებთ. ყველანაირად ვცდილობთ ხელი შევუწყოთ. ტრადიციად იქცა სამხრეთ აფრიკაში საწვრთნელი შეკრება და იქ საკონტროლო მატჩების გამართვა. ეს ხელს უწყობს მორაგეებს ახლოს ეზიარონ დიდ რაგბის და მსოფლიოს ჩემპიონატზე პლანეტის საუკეთესო გუნდებთან თამაშისას თავი უცხოდ არ იგრძნონ. გუნდის მწვრთნელებს დეტალურად გაწერილი გეგმა აქვთ და რაგბის კავშირი ყველა ღონეს ხმარობს მზადებას სწორედ ამ გეგმის მიხედვით შეუწყოს ხელი.

ახალგაზრდული ნაკრების მწვრთნელები აგერ უკვე მეხუთე წელიწადია უცვლელად მუშაობენ. ყოველ წელიწადს გუნდი საინტერესო, კარგ, ხარისხიან რაგბის თამაშობს და იმედი გვაქვს არც არგენტინაში გასამართი მსოფლიოს ახალგაზრდული ჩემპიონატი იქნება გამონაკლისი.

- ამ მსოფლიოს ჩემპონატზე პირველად ქართველი მსაჯი მიიწვიეს...

- დიახ, მსოფლიოს ახალგაზრდულ ჩემპიონატზე სულ ცხრა მსაჯია მიწვეული. აქედან ერთი ქართველია - ნიკა ამაშუკელი. ის ერთადერთია მეორე დონის სარაგბო ქვეყნებიდან. ვფიქრობთ, ეს კარგი წინაპირობაა იმისთვის, რომ ქართველმა არბიტრმა მომავალ, 2023 წლის მსოფლიოს თასზე იმსაჯოს. ვნახოთ, საამისოდ ჯერ კიდევ ბევრია სამუშაო. თუმცა, პროგრესი ამ მიმართულებით თვალნათელია.

- მალე ტოკიოს ოლიმპიური თამაშების ლიცენზისთვის ბრძოლაში საქართველოს შვიდკაცა რაგბის ნაკრები ჩაებმება. რა პერსპექტივა აქვს ამ ტურნირში ჩვენ გუნდს?

- საკვალიფიკაციო შეჯიბრებები ივნისში, საფრაგეთის ქალაქ ტულუზში დაიწყება. გამარჯვებული პირდაპირ იღებს ოლიმპიადის ლიცენზიას. მეორე და მესამეადგილოსანი კი, რეპეშაჟში ჩაერთვება. ჩვენი მიზანი სწორედ ამ მოწინავე სამეულში მოხვედრაა. ბოლო ერთი წელიწადია, რაც თვისობრივად ახალი გუნდის შექმნა მიმდინარეობს. იყო ტურნირები, სადაც ეროვნული ნაკრების მოთამაშეები ემატებოდა ამ გუდს და გარკვეულ, სერიოზულ წარმატებას ვაღწევდით. თუმცა, მერე ეს მოთამაშეები ეროვნულ ნაკრებს უბრუნდებოდნენ და შვიდკაცა ნაკრებს იგივე დონის შენარჩუნება უჭირდა. ამჟამად, ნაკრების მწვრთნელებმა უარი თქვეს ეროვნული გუნდის მოთამაშეებზე და ნელ-ნელა საქართველოს ჩემპიონატში მოასპარეზე მორაგბეებზე დაყრდნობით საკმაოდ ბრძოლისუნარიანი, ამბიციური გუნდი შექმნეს. იმედი გვაქვს, რომ ჩენი შვიდკაცა რაგბის ნაკრები დასახულ მიზანს მიაღწევს.

- 2019 წლის ყველაზე დიდი სარაგბო მოვლენა, ცხადია, იაპონიაში გასამართი მსოფლიოს თასის გათამაშებაა, სადაც ჩენი გუნდი ზედიზედ მეხუთედ მიიღებს მონაწილეობას. როგორაა დაგეგმილი "ბორჯღალოსნების" მზადება მსოფლიოს უდიდესი სარაგბო ფორუმისთვის?

- საქართველოს ნაკრების გაფართოებული შემადგენლობა "შევარდენის სანაკრებო ბაზაზე" 24 ივნისიდან დაიწყებს ვარჯიშს. ივლისში მზადების მეორე ეტაპზე გუნდი თურქეთში, ანტალიაში გაემგზავრება და აგვისტომდე იქ დაჰყოფს. მესამე ეტაპი ისევ თბილისში გაიმართება. 27 აგვისტოს რუსეთის ნაკრებს ვუმასპინძლებთ. 31 აგვისტოს კი, პირველად ქართული რაგბის ისტორიაში ელიტური, პირველი დონის ქვეყნის, შოტლანდიის ეროვნული ნაკრები გვეწვევა. ერთი კვირის თავზე საპასუხო ვიზიტით ედინბურგში გავემგზავრებით. იქიდან კი, გეზს პირდაპირ იაპონიისკენ ავიღებთ, სადაც ოსაკასთან ახლოს მდებარე ბაზაზე დასკვნით საწვრთნელ შეკრებას გავივლით.

- მსოფლიოს თასზე ერთ-ერთ ურთულეს ჯგუფში ვართ. ძალზედ ძლიერი მეტოქეები გვყავს...

- ჩვენი გუნდისთვის ცუდი ის არის როცა სუსტ ჯგუფში ვართ. როცა მეტოქე ძლიერი გვყავს მეტად კონცენტრირებულიც ვართ და მონდომებულიც. ვფიქრობ, ჩვენი ნაკრები საკუთარ შესაძლებლობებს მაქსიმალურად გამოავლენს.

- დიდი აურზაური გამოიწვია მსოფლიოს რაგბის სამყაროში მსოფლიოს სარაგბო ლიგის შექმნის იდეამ, რომლის შესახებაც დუბლინში ახლახან სპეციალური სხდომა გაიმართა. რა გადაწყვეტილება მიიღეს საბოლოოდ მსოფლიო რაგბის მამებმა?

- გადაწყვეტილება ჯერ კიდევ არ არის მიღებული. კონსულტაციები ისევ მიმდინარეობს. შესაძლებელია, მსოფლიო ლიგა მაინც შედგეს, მაგრამ ჯერ გადაწყვეტილი არაფერია.

18151
მკითხველის კომენტარები / 1 /
სტატუს ქუო
2
რუსეთში დიდი ფულის გამო თამაში ნაკრებში დონეს დააგდებს.
მსგავსი ამბები
რუბრიკის სხვა სიახლეები
;