[რაგბი. არჩევნები. პრეზიდენტობის კანდიდატი] გოჩა სვანიძე: ...სანამ თავისი სახელი არ დაერქმევა კარგსაც და ცუდსაც

საქართველოს რაგბის კავშირში ყრილობა 30 იანვარსაა დანიშნული. ყრილობაზე პრეზიდენტის არჩევნები გაიმართება, რომელშიც სამი კანდიდატი გოჩა სვანიძე, ლაშა ხურციძე და ირაკლი აბუსერიძე მიიღებენ მონაწილეობას. საქართველოს რაგბის კავშირის მოქმედმა პრეზიდენტმა გოჩა სვანიძემ ნუცუბიძის პლატოს სარაგბო სტადიონზე პრესკონფერენცია გამართა, სადაც ვრცლად ისაუბრა განვლილ ოთხ წელიწადსა და მომავლის გეგმებზე.

გოჩა სვანიძემ გაწეული ოთხწლიანი საქმიანობა ეროვნული ნაკრების მიერ ნაჩვენები შედეგების შეფასებით დაიწყო:

„როდესაც საქართველოს რაგბის კავშირის პრეზიდენტი გავხდი, მილტონ ჰეიგი უკვე დანიშნული იყო. მას ზურგს უმაგრებდა წარმატებული  მსოფლიოს თასი და, ცხადია, იგივე გადაწყვეტილებას მეც მივიღებდი. მას შესთავაზეს აერჩია, ან დარჩენილიყო მთავარ მწვრთნელად ან მაღალი მიღწევების მენეჯერად განეგრძო მუშაობა. მან მთავარი მწვრთნელობა არჩია და, ვფიქრობ, სწორად მოიქცა.

ყველაზე წარმატებული 2016 წელი იყო, როცა გვქონდა ხანგრძლივი წაუგებელი სერია. რაგბი ევროპის მოგების შემდეგ ძალიან წარმატებული იყო ივნისის ტესტები, რომლის დროსაც სამოასთან ფრედ ნათამაშები მატჩის შემდეგ ფიჯის და ტონგას ვძლიეთ.

2017 წელს ტესტებზე ოთხი თამაში მოვიგეთ. კანადას და ამერიკას ორ-ორჯერ მოვუგეთ. რაგბი ევროპაზე კი რუმინეთთან დავმარცხდით. 2018 წელს რუმინეთს კი მოვუგეთ და თასიც დავიბრუნეთ, მაგრამ თამაშის ხარისხი უკვე არადამაკმაყოფილებელი იყო. მქონდა შეხვედრა მილტონ ჰეიგთან, რომელმაც დამარწმუნა, რომ ყველაფერი გეგმის მიხედვით მიდის, რომ ტარდება ექსპერიმნტები ოპტიმალური შემადგენლობის შესარჩევად.

ამას მოჰყვა სამარცხვინო გამოსვლა ივნისის ტესტებზე. ტონგასთან გამარჯვების შემდეგ დიდი ანგარიშით წავაგეთ ფიჯისთან და იაპონიასთან.

ამ ტესტების შემდეგ ჩვენ ყველა მწვრთნელს ცალ-ცალკე შევხვდით. გადაწყდა, რომ კონკრეტული მწვრთნელები ვერ აკმაყოფილებდნენ მოთხოვნებს და ისინი ნაკრებიდან დავითხოვეთ. მდგომარეობა ოდნავ გამოსწორდა ახალი შერკინების მწვრთნელის მოსვლის შემდეგ და ნოემბრის ტესტები 2018 წელს შედარებით უკეთესი იყო. ალბათ, ყველას გახსოვთ, სამოასთან თითქმის წაგებული მატჩის შემობრუნება.

მსოფლიოს თასზე ურუგვაისთან მატჩი კარგი იყო. გამოვყოფდი მეორე ტაიმს უელსთან. ავსტრალიასთან კი, თუ ბოლო ხუთ წუთს არ ჩავთვლით, როცა მეტოქემ კლასით გვაჯობა, ორივე ტაიმი პოზიტიური იყო. ქართველი ქომაგები ფიჯის ნაკრებთან გამარჯვებას ელოდნენ. თუმცა, ჩვენზე ძლიერ გუნდთან დავმარცხდით და ისეთი ანგარიშით, რასაც არ ვიმსხურებდით.

ამ თამაშზე ბევრი ითქვა და დაიწერა. მსაჯების თემაც აქტუალური იყო. თუმცა, ფაქტია, საქართველოს ნაკრებმა თავისზე ძლიერ გუნდთან წააგო. არ ვიტყოდი, რომ ნაკრებს ჩავარდნა ჰქონდა. უბრალოდ, განვითარების ერთი ეტაპი დასრულდა და ახლა მომდევნო ეტაპზე გადასვლაა საჭირო. ახალი ხალხი, ახალი ხედვები და პროექტებია განსახორციელებელი, რათა კიდევ უფრო წინ წავიდეთ.“

ცხადია, რაგბის კავშირის  პრეზიდენტი ასაკობრივ ნაკრებებსაც შეეხო. აქ პოზიტივი გაცილებით მეტია. ჩვენი 20-წლამდელთა ნაკრები უკევ ზედიზედ მეხუთე მსოფლოს ჩემპიონატზე იასპარეზებს. აქამდე ეს მეორე დონის ვერცერთმა ქვეყანამ შეძლო. ჩვენი ახალგაზრდა მორაგბეები კი, თვისობრივად განსხვავებულ, უფრო თამამ და შემტევ რაგბის თამაშობენ.

გოჩა სვანიძეს მიაჩნია, რომ ოცწლამდელბთან შედარებით, ოდნავ დაიჩაგრნენ 18-წლამდელები, რომლებსაც მოსამზადებლად ისეთივე კარგი მეტოქეები არ ჰყავდათ, როგორც 20-წლამდელებს. თუმცა, ეს ამჟამად გამოსწორებულია და ჩვენი 18-წლამდელთა ნაკრები ევროპის ჩემპიონატის წინ სამხრეთ აფრიკაში გაემგზავრება.

ამ უდიდეს სარაგბო ქვეყანასთან მჭიდრო კავშირი დიდი ხანია დამყარებულია და ის ახალი ხელშეკრულებით განმტკიცდა, რაც ქართული რაგბისთვის საჭირო პროექტების განხორციელებას ითვალისწინებს. 

ცხადია, რაგბის კავშირის პრეზიდენტს გვერდი არც მომავალი არჩევნების თემისთვის აუვლია.

„ჩემთან არავინ მოსულა და საკუთარი კანდიდატურის მოხსნა არ შემოუთავაზებია. თუმცა, გამიგია საუბრები, რომ ვინმე ამას მეტყვის. ჩემს კანდიდატურას იმ შემთხვევაში მოვხსნი, თუ დავინახე, რომ რაგბის კავშირს არ სჭირდება განვითარება. ამასთან ერთად, თუ დავინახავ, რომ კანდიდატი, რომელსაც პრეზიდენტობა სურს, სუფთა ხელებით მოდის.

დღეს სულ საუბრობენ, რომ რაგბის საზოგადოება გახლეჩილია, რაგბის სჭირდება გამთლიანება. ოთხი წლის წინათაც ამაზე იყო საუბარი. მაშინ, როცა საკუთარი კანდიდატურა წამოვაყენე, ერთი კვირა იყო დარჩენილი ყრილობამდე და არავის სხვას კანდიდატურა დაყენებული არ ჰქონდა. მერე ჩემთვის საპატივცემულო პიროვნებამ ილია ზედგინიძემ დააყენა საკუთარი კანდიდატურა და იქედან მოყოლებული სულ მესმის, რომ მან ეს იმიტომ გააკეთა, რომ რაგბის სამყარო გაერთიანდეს.

ვერ გავიგე. თუკი, იქამდე გახლეჩილი არ იყო, მე გავხლიჩე რაგბი? იქნებ ვინმემ მიპასუხოს ამაზე. მაშინ ვკითხე ოპონენტებს - პირადად ჩემთან რამე პრეტენზია გაქვთ. რამე დაგიშავეთ? რამე ისეთი ნაბიჯი მაქვს გადადგმული, რაც ჩემი პიროვნებიდან გამომდინარე ეს თქვენთვის მიუღებელი იყო?. ვინმეს დაგიპირისპირდით? ვინმეს კარი არ გაგიღეთ ან ტელეფონზე არ გიპასუხეთ? რომელიმე შემოთავაზებულ პროექტზე, რაც რაგბის განვითარებას სჭირდება, უარი ვთქვი? პასუხები არ არის. ჩემთვის გაუგებარია ეს დაპირისპირება.

ვფიქრობ, რომ ეს დაპირისპირება იმისთვის არაა, რომ ვინმეს რაგბის განვითარება უნდა, არამედ იმისთვის, რომ ძალაუფლება მიიღონ ადამიანებმა. ძალაუფლება კი საშიში იარაღია იმ ადამიანების ხელში, ვისაც მხოლოდ ძალაუფლება სურს.

თუ შეცდომები მაქვს დაშვებული, მზად ვარ ამ შეცდომებზე პასუხი ვაგო და ამაზე ღიად ვისაუბრო, და თუ არ მაქვს ისეთი შეცდომა დაშვებული, რაც ამ თანამდებობაზე მუშაობის უფლებას მიზღუდავს, მაშინ კეთილი უნდა ინებონ და ამიხსნან, რატომ უნდა მოვხსნა კანდიდატურა.

არსებობს ერთადერთი კითხვის ნიშანი. ეს არის სახელმწიფო აუდიტის სამსახურის შემოწმება, რომელიც გაგრძელდა დაახლოებით რვა თვის განმავლობაში. თავიდან, 2016-2017 წლების შესამოწმებლად შემოვიდნენ. გამიხარდა, ვუთხარი, რომ თქვენით რომ მოხვედით კარგია. რომ არ მოსულიყავით, ჩვენ დაგიძახებდით - მეთქი. იმიტომ, რომ მინდა გავიტანო გარეთ სრული ინფორმაცია, რას აკეთებს რაგბის კავშირი. ამის მერე დაიწყეს 2014-2015 წლების შემოწმება, რაც გაუგებარია. 2018 წელი რომ დაემატებინათ შესამოწმებლად, გასაგებია, მაგრამ კიდევ უფრო უკან წავიდნენ და ვერ გავიგე, რატომ?

მათ მაშინვე ვუთხარი, რომ ეს კეთდება მიზანმიმართულად და რაგბის კავშირის მიმართ არაკეთილგანწყობილად. ისე ჩანს, რომ თქვენ არჩევნების დროს ააფრიალებთ ამ დასკვნას. აი, ეს პროცესია ახლა. ჩვენ მზად ვართ არათუ სახელმწიფო აუდიტის სამსახურის, არამედ დამოუკიდებელი სამსახურის, პროკურატურის, უშიშროების კითხვებს გავცეთ პასუხი. ყველას შეუძლია მოვიდეს და შეამოწმოს.

ვერანაირ პასკვილზე ვერ „წამომიკიდებენ“ და პროცესს ბოლომდე მივიყვან, სანამ თავისი სახელი არ დაერქმევა კარგსაც და ცუდსაც.“

ჩვენი პარტნიორია: https://supporters.ge/

ჩვენი მეტოქე- რუმინეთი (Stejarii)

449
მკითხველის კომენტარები / 0 /
მსგავსი ამბები
რუბრიკის სხვა სიახლეები
;