რაგბი. ახალგაზრდული ნაკრები: ფრანგებმა ბოლოს გვაჯობეს

საქართველოს ახალგაზრდულმა ნაკრებმა, რომელიც საფრანგეთში, ამ ქვეყნის ეროვნული ნაკრების ბაზაზე, "მარკუსიზე" საწვრთნელ შეკრებას გადის, მასპინძელთა 20-წლამდელთა ნაკრებთან ითამაშა და 19:24 დამარცხდა.

მატჩის უკანასკნელ წუთზე, როდესაც ანგარიში 19:19 იყო და უმცროსი "ბორჯღალოსნები" უტევდნენ, ფრანგებმა ბურთს ფეხი წაჰკრეს, კონტრშეტევა ლელოთი დაასრულეს და საფინალო სასტვენიც გაისმა - 24:19.

"საფრანგეთში რომ ჩამოვედით, დიდთოვლობა დაგვხვდა. გაცივდა და პირველ მატჩში მონაწილეობა ვერ მიიღო კოტე მარჯანიშვილმა. გაციების შემდეგ თავს სუსტად გრძნობდა კიდევ რამდენიმე მოთამაშე.

ფრანგების წინააღმდეგ პირველ მატჩში არ უთამაშიათ 9 ნომერ თენგიზ პერანიძეს, შერკინების კვაჭ ლევან პაპიძეს და ლუკა ჯაფარიძეს. ფეხის ტრავმის გამო იძულებით მოუწია დასვენება მგეზავ თედო აბჟანდაძეს.

თედო ირლანდიიდან ტრავმირებული ჩამოვიდა და ინდივიდუალური პროგრამით ემზადება. ექიმების თქმით, ის მეორე მატჩისთვის მზად იქნება. აბჟანდაძე ირლანდიაში თამაშობს, ჩვენთან ერთად ვერ ემზადება და მნიშვნელოვანია, რომ თამაში შეძლოს.

მეორე შეხვედრაში ყველა ის მოთამაშე მიიღებს მონაწილეობას, რომელმაც პირველი მატჩი გამოტოვა" - თქვა რაგბის კავშირის ოფიციალურ ვებგვერდთან საუბრისას ნაკრების მთავარი მწვრთნელის ასისტენტმა ზურა ამონაშვილმა.

მასპინძლებმა პირველ ტაიმში ორი ლელო გაიტანეს და ორივე გარდასახეს, ხოლო მეორე ტაიმის დასაწყისში მესამე ლელო მიითვალეს და 19:0 დაწინაურდნენ. მას შემდეგ, რაც სათადარიგოთა სკამიდან თამაშში საქართველოს ნაკრების გამოცდილი ლიდერები ჩაერთვნენ, ინიციატივას ქართველი მორაგბეები დაეუფლნენ, გურამ გოგიჩაშვილმა, ლუკა გელაშვილმა და სანდრო სვანიძემ თითო ლელო გაიტანეს და ანგარიში 19:19 გახდა.

დასკვნითი წუთები "უმცროსმა ბორჯღალოსნებმა" შეტევებში გაატარეს, მაგრამ მეტოქის კონტრშეტევა გამოეპარათ და მასპინძლებმა გამარჯვება იზეიმეს.

"კარგია, რომ ასეთი ჩამორჩენის შემდეგ თამაშის შემობრუნება შევძელით. ეს იმის დასტურია, რომ გუნდს ბრძოლის დიდი უნარი გააჩნია და მენტალურად კარგად ვართ მომზადებული.

მინდა ბიჭებს მადლობა გადავუხადო თავდადებისა და მონდომებისთვის. ამ ფორმაციის ნაკრებით ასეთი ძლიერი გუნდის წინააღმდეგ პირველად ვითამაშეთ და დარწმუნებული ვარ, მეორე თამაში ბევრად უკეთესი იქნება." - დასძინა ზურა ამონაშვილმა.

მეორე შეხვედრას საქართველოს ნაკრები ფრანგ თანატოლებთან 16 თებერვალს გამართავს.

საქართველოს ნაკრები

შერკინება: გურამ გოგიჩაშვილი (ლოკომოტივი), გიორგი ნუცუბიძე, ლუკა გელაშვილი, თორნიკე ჯალაღონია (სამივე - ჯიქი), ლევან პაპიძე, თენგიზ ზამთარაძე,

ლუკა ჯაფარიძე, ბექა საღინაძე, სანდრო მამამთავრიშვილი, არჩილ აბესაძე, რატი ჟორჟოლიანი (ყველა - ლელო), გიორგი მენაბდე (ბათუმი), გიორგი

ხარაიშვილი (ხაშური), ლაშა მაჭარაშვილი (მონ-დე-მარსანი), სანდრო კალმახელიძე (არმია), თენგიზ გიგოლაშვილი (არმაზი), არსენ მაჩალაძე (აია).

უკანა ხაზი: ლუკა დვალიშვილი, სანდრო სვანიძე (ორივე-არმაზი), ელგუჯა კიკვაძე (ბაგრატი), თენგიზ პერანიძე, ბექა აბულაშვილი, ბექა მამუკაშვილი, გიორგი ასათიანი (ყველა-ლელო),

თედო აბჟანდაძე (ტერენორ კოლეჯი), რევაზ ხარაზიშვილი (ლოკომოტივი), გიორგი წიკლაური (ჯიქი), ლევან ნარიმანიძე (ხარები),

ოთარ ძაგნიძე (აია), კოტე მარჯანიშვილი (ჩოხოსნები), დურმიშხან ჯაბნიძე (ბათუმი).

ყოველდღიური სპორტული გაზეთი "ლელო"
455
მკითხველის კომენტარები / 0 /
მსგავსი ამბები
რუბრიკის სხვა სიახლეები