რაგბი. ახალგაზრდულმა ნაკრებმა ფრანგი თანატოლები დაამარცხა

საქართველოს ახალგაზრდულმა ნაკრებმა, რომელიც საფრანგეთში, ამ ქვეყნის ეროვნული ნაკრების ბაზაზე "მარკუსიში" გადის საწვრთნელ შეკრებას, საფრანგეთის 20-წლამდელთა ნაკრებთან მეორე მატჩი გამართა და 14:0 გაიმარჯვა.

ეს პირველი შემთხვევაა, როცა ასაკობრივი ნაკრებების დონეზე ჩვენი გუნდი საფრანგეთისას უგებს. აღსანიშნავია, რომ "უმცროს ბორჯღალოსნებს" უდიდესი სათამაშო და ტერიტორიული უპირატესობა ჰქონდათ.

ფრანგებს ერთი სალელოვე შეტევაც არ მიუთვლიათ. დაცვაში, რაკში, დერეფანსა და შერკინებაში ჩვენმა გუნდმა შესანიშნავად ითამაშა. ცხადია, არც მოლი დაგვიწყებია, რადგან პირველი ლელო სწორედ ამ ხერხით გავიტანეთ. ბურთით ხელში ბოლოს შერკინების ბურჯი გურამ გოგიჩაშვილი იყო.

ტაიმის მიწურულს კი, ფრანგებმა საკუთარი ლელოდან ხუთ მეტრში აუტი უხეიროდ მოაწოდეს. ბურთი ჩვენი შერკინების კვაჭის ლევან პაპიძის ნადავლი შეიქნა, რომელმაც ოთხ ფრანგთან ბრძოლაში შეძლო ლელოს გატანა. ორივეჯერ გარდასახვა ზუსტად დაარტყა ცხრა ნომერმა თენგიზ პერანიძემ - 14:0.

აღსანიშნავია, რომ ამ შეხვედრაში ჩვენს გუნდს ოთხი ლეგიონერი და 18-წლამდელთა ნაკრებში მივლინებული ამდენივე მორაგბე აკლდა.

ზურაბ ამონაშვილი, საქართველოს ახალგაზრდული ნაკრების მთავარი მწვრთნელის ასისტენტი:

"მადლობა მინდა ვუთხრა ბიჭებს თავდადებისა და მონდომებისთვის. ამ თამაშს ყველა განსაკუთრებული მობილიზებით შეხვდა და შედეგმაც არ დააყოვნა. მეტოქეს ვაჯობეთ ყველა კომპონენტში. გვქონდა მცირე ხარვეზი, რის გამოსწორებაზეც უნდა ვიმუშაოთ.

კარგია, რომ ტერიტორიულ უპირატესობას ვფლობდით და ბურთსაც ვაკონტროლებდით. თუმცა, ასეთი დომინირების ფონზე მეტი სხვაობით უნდა მოგვეგო. სამაგიეროდ, მეტოქეს ქულის აღების შანსი არ მივეცით. ფრანგები ასეთ შედეგს არ ელოდნენ და დამწუხრებულები არიან."

შეგახსენებთ, რომ მსოფლიოს ჩემპიონატზე, რომელიც საფრანგეთში 31 მაისს დაიწყება, ჯგუფურ ეტაპზე ჩვენი მეტოქეები საფრანგეთის, ირლანდიისა და სამხრეთ აფრიკის ნაკრებები არიან.

ჩვენი 20-წლამდელთა გუნდი მორიგ საწვრთნელ შეკრებას აპრილში სამხრეთ აფრიკაში გამართავს, სადაც ადგილობრივ 20-წლამდელთა ნაკრებს ასევე ორჯერ დაუპირისპირდება.

საფრანგეთი U-20-საქართველო U-20 0:14

საქართველო: 15. ბექა მამუკაშვილი, 14. კოტე მარჯანიშვილი, 13. სანდრო სვანიძე, 12. გიორგი წიკლაური, 11. ოთარ ძაგნიძე, 10. თედო აბჟანდაძე, 9. თენგიზ პერანიძე. 1. გურამ გოგიჩაშვილი, 2. ლევან პაპიძე, 3. ლუკა ჯაფარიძე, 4. ლუკა გელაშვილი, 5. ბექა საღინაძე, 6. თორნიკე ჯალაღონია, 7. სანდრო მამამთავრიშვილი, 8. არსენ მაჩალაძე
2 ლ: გოგიჩაშვილი, პაპიძე. 2 გ: პერანიძე

ყოველდღიური სპორტული გაზეთი "ლელო"
971
მკითხველის კომენტარები / 0 /
მსგავსი ამბები
რუბრიკის სხვა სიახლეები