რაგბი. გიორგი ბერია საფრანგეთის ნაკრებში

საქართველოს ახალგაზრდული ნაკრები, რომელიც მსოფლიოს რაგბის 20-წლამდელთა ჩემპიონატისთვის ემზადება, თებერვალში საფრანგეთში გაემგზავრება. "უმცროსი ბორჯღალოსნები" იქ ამ ქვეყნის 19-წლამდელთა გუნდს ორჯერ გაეჯიბრება.

ამასობაში კი, ფრანგთა 20-წლამდელთა ნაკრები, რომელიც ჯგუფურ ტურნირში ჩვენი გუნდის მეტოქეა, ექვსი ერის გათამაშებაში ჩაებმება და პირველ ტურში ირლანდიის ნაკრებს ეთამაშება, რომელიც ასევე ჩვენი მეტოქეა.

ფრანგთა ნაკრების მწვრთნელმა გუნდის ის შემადგენლობა დაასახელა, რომელიც ირლანდიელებს დაუპირისპირდება. იქ სრულიად მოულოდნელად, ქართული წარმოშობის მორაგბე, პირველხაზელი, შერკინების ბურჯი გიორგი ბერია აღმოვაჩინეთ.

მასზე ძალზე მწირი ინფორმაცია გვაქვს. ვიცით, რომ 1999 წელსაა დაბადებული და "კლერმონის" შესაბამისი ასაკის გუნდში ვარჯიშობს. ცხადია, ეს გასაკვირი არაა.

ის ქართველები, რომლებიც უცხო ქვეყნის ახალგაზრდულ თუ ეროვნულ ნაკრებებში თამაშობენ, ყველა უკლებლივ, პირველხაზელები არიან. რაც შერკინების ამ პოზიციის ქართული სკოლის სიძლიერეზე კიდევ ერთხელ მეტყველებს.

ერთი სიტყვით, გამორიცხული არ არის, მსოფლიოს ახალგაზრდულ ჩემპიონატზე, რომელიც საფრანგეთში გაიმართება, ბერიას საქართველოს ნაკრების წინააღმდეგ მოუწიოს თამაშმა.

შეგახსენებთ, რომ ჩვენი გუნდის მეტოქე, საფრანგეთისა და ირლანდიის ნაკრებებთან ერთად სამხრეთ აფრიკის ახალგაზრდული ნაკრებიც იქნება.

ყოველდღიური სპორტული გაზეთი "ლელო"
1606
მკითხველის კომენტარები / 0 /
მსგავსი ამბები
რუბრიკის სხვა სიახლეები
;