რაგბი. დიდი ათი. აია თუ ლოკომოტივი?

საქართველოს ჩემპიონატის უმაღლეს ლიგაში ბოლო ტურის წინ თითქმის ყველაფერი გარკვეულია. დასადგენი მხოლოდ ისაა, რეგულარულ გათამაშებაში ვინ დაიკავებს პირველ ადგილს.

ჯერჯერობით, სატურნირო ცხრილის სათავეში ქუთაისის "აიაა", რომელიც რეგულარულ გათამაშებას გასვლითი მატჩით დაასრულებს რუსთავში "ხარებთან". ამ უკანასკნელს პლეი ოფში თამაში განაღდებული აქვს. თუმცა, შეუძლია, "აიას" დამარცხების შემთხვევაში, ერთი საფეხურით წინ წაიწიოს, "ხარები" ნახევარფინალის შესარჩევს სტუმრად ითამაშებს. სავარაუდო მეტოქე კი, ორივე სერიოზულია - გორის "ჯიქი" და "ბათუმი".

"აიას" აუცილებლად გამარჯვება სჭირდება, რადგან პირველი ადგილის დაკავების შემთხვევაში, შესარჩევ ფინალში მეორეადგილოსან თბილისის "ლოკომოტივს" შინ მიიღებს.

იგივე მიზანი აქვს დასახული რკინიგზელთა გუნდსაც, რომელიც "აიას" ერთი ქულით ჩამორჩება და თბილისში უმოტივაციო "არმიას" დაუპირისპირდება. "ლოკომოტივი", სავარაუდოდ, არმიელთა დამარცხებას შეძლებს, რადგან "არმიას" ყველაზე მნიშვნელოვანი თამაში გასავარდნ პლეი ოფში ელის.

ის, როგორც ბოლოსწინა ადგილზე გასული, გადათამაშებაში დაუპირისპირდება პირველ ლიგაში მეორე ადგილზე გასულ გუნდს. სავარაუდოდ, ეს ბოლნისის "ყოჩები" უნდა იყოს. თუ "არმიამ" ამ მატჩში მარცხი განიცადა, უმაღლესი ლიგის დატოვება მოუწევს.

მესამე ადგილზე მყოფი საქართველოს მოქმედი ჩემპიონი გორის "ჯიქი" შინ მიიღებს მეოთხეადგილოსან "ბათუმს", რომელსაც სამი ქულით უსწრებს. ამ შეხვედრაში გამარჯვებული რეგულარულ გათამაშებას მესამე ადგილზე დაასრულებს. თუმცა, ეს რაიმე დიდ შეღავათს არ იძლევა. ნებისმიერ შემთხვევაში ორივე გუნდი ნახევარფინალის შესარჩევ პლეი ოფში მეტოქეს შინ მიიღებს.

თბილისის "ლელოს" მეტოქე ბოლო ტურში მარნეულის "არმაზია". ამ მატჩის შედეგს გუნდებისთვის პრინციპული მნიშვნელობა არ აქვს. ისევე როგორც, უმაღლესი ლიგიდან უკვე გავარდნილი ქუთაისის "ბაგრატის" დაპირისპირებას თბილისის "აკადემიასთან".

აღსანიშნავია, რომ ბოლო ტურის მატჩები ერთ დღეს - 14 აპრილს, ერთსა და იმავე დროს - 16 საათზე დაიწყება.

XVIII ტური. შაბათი, 14 აპრილი

არმაზი-ლელო 16:00
არმია-ლოკომოტივი 16:00
ხარები-აია 16:00
ჯიქი-ბათუმი 16:00
ბაგრატი-აკადემია 16:00

თ მ ფ წ ბ ქ(პ)
1. აია 17 15 0 2 +287 66(6)
2. ლოკომოტივი 17 14 0 3 +177 65(9)
3. ჯიქი 17 11 1 5 +165 57(11)
4. ბათუმი 17 11 1 5 +129 54(8)
5. ლელო 17 10 0 7 +50 46(6)
6. ხარები 17 9 1 7 +8 44(6)
7. აკადემია 17 4 0 13 -15 28(12)
8. არმაზი 17 5 1 11 -89 28(6)
9. არმია 17 3 0 14 -292 15(3)
10. ბაგრატი 17 1 0 16 -420 5(1)

ყოველდღიური სპორტული გაზეთი "ლელო"
124
მკითხველის კომენტარები / 0 /
მსგავსი ამბები
რუბრიკის სხვა სიახლეები