რაგბი. დიდი ათი: ბოლო ეტაპი-წინ ნახევარფინალებია

ხვალ, საქართველოს ჩემპიონატის ბოლო ეტაპი იწყება. ნახევარფინალში გასასვლელ მატჩებში ქვეყნის მოქმედი ჩემპიონი გორის "ჯიქი" რუსთავის "ხარებს" მასპინძლობს. "ბათუმი" კი, შინ მიიღებს ტიტულოვან თბილისის "ლელოს".

ჯიქი-ხარები

ყველაზე დიდი მოულოდნელობა რუსთავის "ხარების" პლეი ოფში გასვლაა. უმაღლეს ლიგაში რუსთავული გუნდი წლეულს დაბრუნდა და ყველა გადარჩენისთვის ბრძოლას უქადდა. თუმცა, "ლოკომოტივიდან" ცხრა ნომრის, ვაჟა ხუციშვილის დაბრუნების შემდეგ გუნდი მძლავრად ათამაშდა და "ხარებთან" გამარჯვება იოლი გასეირნება არავისთვის იყო.

რუსთაველებმა თავისი ომახიანი სიტყვა დასაწყისშივე, პირველივე ტურში, თქვეს, როცა შინ ქვეყნის ჩემპიონი გორის "ჯიქი" დაამარცხეს 27:21, რომელსაც ხვალ პლეი ოფში ეთამაშებიან.

გორელებისთვის ის მარცხი კარგი გაკვეთილი გამოდგა. გუნდმა ნელ-ნელა მოუმატა და რეგულარული გათამაშება მესამე ადგილზე დაასრულა. თუმცა, მეორე წრეში "ხარებთან" შეხვედრაში საკუთარ მოედანზე გამარჯვებას მაინც ვერ მიაღწია და ფრეს დასჯერდა - 10:10.

ერთი სიტყვით, "ხარებს" მიმდინარე სეზონში "ჯიქთან" ჯერ არ წაუგია და არც ამჯერად აპირებს, რაიმე იოლად დათმოს. შეხვედრა გორში, "ჭალის" სტადიონზე 15 საათზე დაიწყება.

ბათუმი-ლელო

უშეღავათო ბრძოლაა მოსალოდნელი ბათუმში, სადაც ადგილობრივი გუნდი, თბილისის "ლელოს" უმასპინძლებს, რომელიც ბოლო ხუთი სეზონიდან ოთხში გამარჯვებული იყო.

ლელოელთა შემადგენლობა საგრძნობლად გაახალგაზრდავდა. გუნდს, ამჯერად, ახალგაზრდულ ნაკრებში მივლინებული რამდენიმე მორაგბე აკლია, რომლებიც ასაკის მიუხედავად, "ლელოს" საკვანძო ფიგურები არიან. თუმცა, ისიც არ უნდა დაგვავიწყდეს, რომ ლელოელთა რიგებში ჩვენი ეროვნული ნაკრების გამოცდილი მორაგბეები მერაბ კვირიკაშვილი და ალექსანდრე თოდუა თამაშობენ. აქვეა საქართველოს ჩემპიონატისა და "ლელოს" საუკეთესო მექულე ირაკლი ყიასაშილი.

გამოცდილი მორაგბეების ნაკლებობას არც ბათუმელები უჩივიან. ლაშა ხმალაძე და გიორგი თხილაიშვილი ასევე "ბორჯღალოსნები" არიან. ამასთან ერთად, "ბათუმმა" წლეულს ევროპული ნათლობა მიიღო და გუნდი კიდევ უფრო შეთამაშდა, შედუღაბდა.

პირველ წრეში "ლელომ" შინ მეტოქეს 28:25 მოუგო, მეორე წრეში კი, სტუმრად 29:32 დამარცხდა. ამ ანგარიშებიდანაც კარგად ჩანს, რას უნდა ელოდოს მომავალ მატჩში რაგბის ქომაგი. შეხვედრა 22 აპრილს, ბათუმის სარაგბო სტადიონზე 16 საათსა და 30 წუთზე დაიწყება.

შეგახსენებთ, რომ ამ წყვილებს შორის გამარჯვებულები გასავარდნ ფინალში ერთმანეთს დაუპირისპირდებიან. იქ მოგებული კი, წინასწარ ფინალში შეხვდება შესარჩევ ფინალში დამარცხებულს, რომელიც თბილისის "ლოკომოტივისა" და ქუთაისის "აიას" შეხვედრაში გამოვლინდება.

წინასწარ ფინალში წაგებული ბრინჯაოს მედლებს დასჯერდება. მოგებული კი, დიდ ფინალში ითამაშებს ჩემპიონის ტიტულისთვის, შესარჩევ ფინალში გამარჯვებულის წინააღმდეგ.

ყოველდღიური სპორტული გაზეთი "ლელო"
1008
მკითხველის კომენტარები / 0 /
მსგავსი ამბები
რუბრიკის სხვა სიახლეები
;