რაგბი. დიდი ათი. ვინ იქნება მეექვსე ნახევარფინალისტი?

საქართველოს ჩემპიონატის უმაღლეს ლიგაში რეგულარული გათამაშების დასრულებამდე სამი ტურიღა დარჩა.

უკვე თამამად შეიძლება ითქვას, რომ პლეი ოფში მოთამაშე ხუთი გუნდის ვინაობა გარკვეულია. დასადგენი ისღა დარჩა, ვინ იქნება მეექვსე და რომელი ორი გუნდი გავა პირდაპირ ნახევარფინალში.

პირდაპირ ნახევარფინალში გასვლის ყველაზე კარგი შანსი ქუთაისის "აიას" და თბილისის "ლოკომოტივს" აქვთ. ქუთათურები 56 ქულით პირველ ადგილზე არიან და მე-16 ტურში აუტსაიდერ "ბაგრატს" ეთამაშებიან, რომელიც უკიდურსად რთულ ვითარებაშია და შარშანდელის მსგავსი სასწაული თუ გადაარჩენს.

"აია" ამ მატჩს სერიოზული დანაკლისით ხვდება. ამ გუნდის სამი მორაგბე საქართველოს 18-წლამდელთა ნაკრებშია მიწვეული. მგეზავი გიორგი ბაბუნაშვილი კი, ტრავმირებულია. მიუხედავად ამისა, ვფიქრობთ, "აიას" სრულად შესწევს ძალა აუტსაიდერი დაამარცხოს და საპრემიო ქულაც მიითვალოს.

ქუთაისურ გუნდს ერთი ქულით ჩამორჩება თბილისის "ლოკომოტივი", რომელიც რუსთავში მარნეულის "არმაზს" დაუპირისპირდება. არმაზელები 28 ქულით მე-7 ადგილზე არიან და ჯერ კიდევ ინარჩუნებენ პლეი ოფში გასვლის პრაქტიკულ შანსს. ამ გუნდების შეხვედრა პირველ წრეში ერთ-ერთი ყველაზე უხვლელოიანი იყო. რკინიგზელებმა 45:25 მოიგეს (ჯამში 10 ლელო გავიდა).

სავარაუდოდ, ასეთივე ლაღი და სანახაობრივად ლამაზი თამაში უნდა გამოდგეს დღევანდელი შეხვედრაც. "ლოკომოტივს" აუცილებლად სჭირდება მოგება მოწინავე დუეტში ადგილის შესანარჩუნებლად. წინააღმდეგ შემთხვევაში, მას ქვეყნის მოქმედი ჩემპიონი გორის "ჯიქი" მჭიდროდ მიუახლოვდება.

"ჯიქი" ნელ-ნელა, შედის ფორმაში და ჩემპიონატის ფინიშისკენ ტიტულის შენარჩუნებისთვის სრულ მზადყოფნაში იქნება. "ჯიქის" მეტოქე მე-16 ტურში თბილისის "აკადემიაა", რომელსაც პლეი ოფში გასვლის მხოლოდ თეორიული შანსიღა აქვს დარჩენილი.

ეს შეხვედრა გორში გაიმართება და, ძნელი წარმოსადგენია, "ჯიქმა" იქიდან აკადემიელებს რაიმე გამოატანოს. პირველ წრეში გორულმა გუნდმა სტუმრად დაძაბულ ბრძოლაში მოიგო - 19:18.

ტურის ცენტრალური მატჩი ბათუმში გაიმართება, სადაც ადგილობრივი გუნდი თბილისის "ლელოს" უმასპინძლებს. ორივე გუნდს ეროვნული ნაკრებიდან წამყვანი მორაგბეები დაუბრუნდნენ და, შესაბამისად, თამაში ძალზე საინტერესო უნდა გამოდგეს. ორივე გუნდს პლეი ოფში თამაში გარანტირებული აქვს და ახლა იმისთვის იბრძვის, რომ სატურნირო ცხრილში რაც შეიძლება მაღალი საფეხური დაიკავოს.

რუსთავის "ხარებმა" წინა ტურში სენსაციურად, დიდი ანგარიშით დაამარცხა სტუმრად "ლელო" და ახლა "არმიას" უმასპინძლებს. რუსთავული გუნდი 38 ქულით მე-6 ადგილზეა და ამ მატჩში გამარჯვების შემთხვევაში, ცალი ფეხით პლეი ოფში იქნება. ხოლო თუ "არმაზმა" თავისი შეხვედრა დათმო რკინიგზელებთან, "ხარები" მედლებისთვის ბრძოლას გაინაღდებს.

"არმია", მართალია, ათი ქულით უსწრებს ბოლოადგილოსან "ბაგრატს", მაგრამ მშვიდად მაინც ვერ იქნება. თანაც, ჯერ კიდევ აქვს შანსი, "აკადემიას" გაასწროს და პირველლიგელთან გადათამაშება აიცილოს თავიდან.

XVI ტური
პარასკევი, 23 მარტი

არმაზი-ლოკომოტივი 16:00
შაბათი, 24 მარტი
ბაგრატი-აია 14:00
ჯიქი-აკადემია 16:00
კვირა, 25 მარტი
ხარები-არმია 14:00
ბათუმი-ლელო 16:00

თ მ ფ წ ბ ქ(პ)
1. აია 15 13 0 2 +168 56(4)
2. ლოკომოტივი 15 12 0 3 +109 55(7)
3. ჯიქი 15 9 1 5 +154 49(11)
4. ბათუმი 15 9 1 5 +122 46(8)
5. ლელო 15 10 0 5 +61 45(5)
6. ხარები 15 8 1 6 +9 38(4)
7. არმაზი 15 5 1 9 -70 28(6)
8. აკადემია 15 3 0 12 -22 23(11)
9. არმია 15 3 0 12 -192 15(3)
10. ბაგრატი 15 1 0 14 -321 5(1)

ყოველდღიური სპორტული გაზეთი "ლელო"
1114
მკითხველის კომენტარები / 0 /
მსგავსი ამბები
რუბრიკის სხვა სიახლეები
;