რაგბი. დიდი ათი: ვინ უკეთ გამოიყენა შესვენება?

დღეს დიდი ათის ტურნირი მე-11 ტურის ერთი მატჩით განახლდება. შაბათ-კვირას კი დანარჩენი შეხვედრებიც გაიმართება. თუ არ ჩავთვლით ერთ გადმოტანილ მატჩს, რომელიც წლის მიწურულს გაიმართა, საქართველოს ჩემპიონატი 7-კვირიანი პაუზის მერე განახლდება...

ათი ტურის შემდეგ გათამაშებას ქუთაისის "აია" ლიდერობს 38 ქულით. ჩემპიონატის მე-11 ტურის წინათქმაც სწორედ "აიას" ამბებით დავიწყოთ - ქუთათურები შაბათს, შინ მიიღებენ თბილისის "აკადემიას", რომელიც 20 ქულით მე-7 ადგილზეა და პლეი ოფში მოხვედრის კარგი შანსი აქვს. თუმცა, აკადემია კვლავ დასუსტდა, რადგან წამყვანი მორაგბეები დაკარგა.

"აკადემიასა" და საქართველოს ნაკრების ფულბეკი სოსო მათიაშვილი რუსულ "კრასნი იარში" გადავიდა; შერკინების ლიდერმა საბა შუბითიძემ კი ფრანგული ფედერალ 1 დივიზიონის "ვალანსს" მიაშურა. ეს გუნდისთვის სერიოზული, თითქმის აუნაზღაურებელი დანაკლისია, რაც აკადემიელთა თამაშს კვალს უდავოდ დააჩნევს.

დანაკლისი აქვს "აიასაც": ოპერაცია გაიკეთა და ჯერ არ ვარჯიშობს ნაკრების გარემარბი მირიან მოდებაძე, რომელიც "აიაში" ძირითადად ფულბეკის პოზიციაზე ირჯება. "აიას" აქამდე წაგებათა გრაფაში ერთიანი უწერია და ნაკლებად სავარაუდოა, ის "აკადემიასთან" მატჩის შემდეგ შეიცვალოს.

* * *

ქუთაისურ გუნდს ქულით ჩამორჩება თბილისის "ლოკომოტივი", რომელიც შინ მიიღებს რუსთავის "ხარებს". ამ უკანასკნელმა წლევანდელი ჩემპიონატი რიხით დაიწყო, სამი ტურის შემდეგ ლიდერიც იყო, მაგრამ მერე მიჯრით რამდენიმე მატჩი წააგო და ახლა მე-6 ადგილზეა. სამართლიანობა მოითხოვს აღინიშნოს, რომ "ხარებს" სატურნირო ცხრილის თუნდაც ამ პოზიციაზეც არავინ ელოდა.

რკინიგზელთა მეორე ადგილი, ცხადია, გასაკვირი არავისთვისაა. "ლოკომოტივმა" ჩემპიონატის პირველი ნაწილი სტაბილურად ჩაატარა და ჩემპიონობისთვის ბრძოლაში უმთავრესი კანდიდატია. ერთი შეხედვით, "ხარები" სტუმრად მარცხისთვის არიან განწირულნი, მაგრამ გადაჭრით ვერაფერს ვიტყვით. მათ იოლად შეუძლიათ, სიურპრიზი შემოგვთავაზონ.

* * * 

"ლოკომოტივს" ასევე ერთი ქულით ჩამორჩება თბილისის "ლელო", რომელიც წლეულს საგრძნობლად გადახალისებულია და უმეტეს მატჩებში სრულიად ახალგაზრდული შემადგენლობით მოუწია თამაშმა. ლელოელების მეტოქე ერთ-ერთი აუტსაიდერი "არმიაა", რომელსაც სეზონის განახლების წინ პრობლემები შეექმნა.
"არმიას" დაფინანსებაზე უარი თქვა თავდაცვის სამინისტრომ. შედეგად, გუნდი დაშლის პირას იყო მისული. საქმე იქამდე მივიდა, რომ შესაძლებელი იყო, არმიელებს ჩემპიონატი ვერ განეგრძოთ.

თუმცა, პრობლემა დროებით, მაგრამ მაინც მოგვარდა და "არმია" საქართველოს ჩემპიონატს ჩაამთავრებს. აი, მერე რა ბედი ეწევათ არმიელებს, ეს ჯერჯერობით, ბურუსითაა მოცული.

* * *

მესამეადგილოსან "ლელოს" რვა ქულით ჩამორჩება ქვეყნის მოქმედი ჩემპიონი გორის "ჯიქი". გორელებს მე-11 ტურში გასვლითი მატჩი აქვთ მარნეულის "არმაზთან", რომელიც ამჟამად მე-8 ადგილზეა და პლეი ოფში მოხვედრის შანსს ჯერ კიდევ ინარჩუნებს.

"ჯიქის" ასეთი ჩამორჩენა, ცხადია, მოულოდნელია. თუმცა, გუნდი სეზონის მიმდინარეობისას ნელ-ნელა ძალას იკრებს. ფიზიკურ კონდიციებსაც იბრუნებს და, სავარაუდოდ, პლეი ოფების დროს სრულ ფიზიკურ და ფსიქოლოგიურ მზადყოფნაში იქნება. იქამდე კი, თუ "ჯიქს" კიდევ აქვს ჩემპიონობის ამბიცია, "არმაზს" აუცილებლად უნდა მოუგოს.

* * *

"ბათუმისთვის", რომელიც სატურნირო ცხრილში მე-5 ადგილზეა შესვენება არც ყოფილა. ზღვისპირელებმა ორი მატჩი გამართეს "კონტინენტის ფარის" გათამაშებაში და, სამწუხაროდ, შეჯიბრებას გამოეთიშნენ.

ამ ფაქტიდან გამომდინარე, ბათუმელები ან სხვებზე უკეთეს ფორმაში შეხვდებიან ჩემპიონატის განახლებას ან გადაღლილებს, შესაძლოა, პრობლემებიც შეექმნათ.

ეს ყოველივე, სავარაუდოდ, აუტსაიდერთან, ქუთაისის "ბაგრატთან" გასვლით მატში გამოჩნდება. ქუთაისური გუნდი ბოლოსწინა ადგილზე მყოფ "არმიას" ოთხი ქულით ჩამორჩება და უმაღლეს ლიგაში ადგილის შენარჩუნების შანსი ჯერ კიდევ აქვს.

XI ტური.

პარასკევი, 26 იანვარი
ლოკომოტივი-ხარები 16:00

შაბათი, 27 იანვარი
აია-აკადემია 14:00
არმია-ლელო 16:00

კვირა, 28 იანვარი
ბაგრატი-ბათუმი 14:00
არმაზი-ჯიქი 16:00

თ მ ფ წ ბ ქ(პ)
1. აია 10 9 0 1 +147 38(2)
2. ლოკომოტივი 10 8 0 2 +96 37(5)
3. ლელო 10 8 0 2 +96 36(4)
4. ჯიქი 10 5 1 4 +26 28(6)
5. ბათუმი 10 5 1 4 +87 28(6)
6. ხარები 10 5 1 4 -34 23(1)
7. აკადემია 10 3 0 7 +9 20(8)
8. არმაზი 10 2 1 7 -59 15(5)
9. არმია 10 2 0 8 -140 9(1)
10. ბაგრატი 10 1 0 9 -228 5(1)

ყოველდღიური სპორტული გაზეთი "ლელო"
286
მკითხველის კომენტარები / 0 /
მსგავსი ამბები
რუბრიკის სხვა სიახლეები