რაგბი. დიდი ათი: რა სჯობს, პრაგმატიზმი თუ რომანტიზმი?

საქართველოს ჩემპიონის გამოსავლენად ორი მატჩიღაა გასამართავი. კვირას, 6 მაისს "ავჭალის სარაგბო სტადიონზე" თბილისის "ლოკომოტივი", რომელიც რეგულარული გათამაშების გამარჯვებულია, ქვეყნის მოქმედ ჩემპიონს, გორის "ჯიქს" წინასწარ ფინალში უმასპინძლებს.

ლოკომოტივი-ჯიქი

მიუხედავად იმისა, რომ "ლოკომოტივმა" რეგულარული გათამაშება მოიგო, შესარჩევ ფინალში მაინც წააგო მეორე ადგილზე გასულ ქუთაისის "აიასთან".
"ლოკომოტივმა" "აიასთან" 15:20 წააგო. რაც ნათლად მიუთითებს, რომ გუნდების ძალაში დიდი განსხვავება არ არის და არავინ იცის, ერთი კვირის თავზე ისევ რომ შეხვდნენ, ვისი აჯობებს. საამისოდ კი, რკინიგზელებმა ჯერ გორის "ჯიქი" უნდა დაამარცხონ.

სავარაუდოდ, "ლოკომოტივს" სტატიკაში, შერკინებასა და დერეფანში თამაშში საგრძნობი უპირატესობა ვერ ექნება. გამოსავალი, ალბათ, მაინც ერთია, რკინიგზელებმა თამაში უნდა გახსნან, რათა მეტოქეს სისწრაფესა და ხელდახელ ბურთაობაში აჯობონ. საამისოდ, გუნდს პოტენციალიც აქვს და საკმარისი დონის მოთამაშეებიც ჰყავს.

თუმცა, გამორიცხული არ არის, "ლოკომოტივმა" თავის თავს არ "უღალატოს" და ისევ ძალისმიერი, მორკინალების თამაშით მოპოვებული უპირატესობით ფონს გასვლა სცადოს. ცხადია, ამ შემთხვევაშიც დიდია წარმატების მოპოვების ალბათობა, მაგრამ არ უნდა დაგვავიწყდეს, რომ "ჯიქიც" საკმაოდ ღონიერი და ბოლომდე მებრძოლი, შეუპოვარი გუნდია.

ქვეყნის მოქმედმა ჩემპიონმა "ჯიქმა" გასავარდნ ფინალში შინ მოუგო "ბათუმს" - 25:19. ანგარიშში მცირე სხვაობის მიუხედავად, "ჯიქი" უფრო უკეთ ირჯებოდა და აშკარად ჩანდა, რომ მძიმედ, ოდნავ დუნედ მოთამაშე ზღვისპირელებზე უკეთესი გუნდია.

"ჯიქმა" სეზონი ყოჩაღად ვერ დაიწყო, მაგრამ ნელ-ნელა ძალას იკრებდა, სათანადო სათამაშო ფორმაში შედიოდა და თამამად შეიძლება ითქვას, რომ ახლა ფორმის პიკში იმყოფება. მას ჩემპიონობის შანსი ზუსტად იმდენივე აქვს, რამდენიც პლეი ოფში დარჩენილ ორ სხვა გუნდს.

გორელთა და რკინიგზელთა დაპირისპირებაში, მაინც გვგონია, ის გუნდი მოიგებს, რომლის ლიდერებიც უფრო უკეთ ითამაშებენ, უკეთ უყოჩებენ გუნდს.
მიმდინარე სეზონში "ჯიქმა" რკინიგზელებთან ორივე მატჩი წააგო. პირველ წრეში გორელებმა შინ დათმეს 14:22. მეორეში კი, სტუმრად მხოლოდ ერთი ქულით ჩამორჩნენ მეტოქეს - 11:12.

ამ მატჩში გამარჯვებული დიდ ფინალში, 13 მაისს ქუთაისის "აიას" დაუპირისპირდება. დამარცხებული კი, ბრინჯაოს მედლებს დასჯერდება.

6 მაისი
წინასწარი ფინალი
ლოკომოტივი-ჯიქი

13 მაისი
დიდი ფინალი

ყოველდღიური სპორტული გაზეთი "ლელო"
419
მკითხველის კომენტარები / 0 /
მსგავსი ამბები
რუბრიკის სხვა სიახლეები