რაგბი. დიდი ათი: ქუთაისის "აიასა" და თბილისის "ლოკომოტივის ლიდერობა საბჭოეთის ხანიდან

საქართველოს ჩემპიონატის მე-14 ტურის წინ სატურნირო ცხრილში საგრძნობლად დაწინაურებული ორი გუნდია. ესენია: ქუთაისის "აია" და თბილისის "ლოკომოტივი".

ორივე, ჯერ კიდევ საბჭოეთის ხანაში ლიდერობდა ქართულ რაგბის და, როგორც ჩანს, წლეულს ჩემპიონობისთვის ბრძოლაში ერთმანეთის ყველაზე რეალური მეტოქეები არიან.

მათ კვალში ქვეყნის მოქმედი ჩემპიონი გორის "ჯიქი" ჩაუდგა, რომელიც კვირას გორში სწორედ "აიას" უმასპინძლებს. ორივე გუნდისთვის ამ მატჩს ძალზე დიდი მნიშვნელობა აქვს. არადა, ორივემ სერიოზული დანაკარგი განიცადა.

"ჯიქმა" საქართველოს შვიდკაცა რაგბის ნაკრებში, რომელიც სამხრეთ აფრიკაში საწვრთნელ შეკრებაზე გაემგზავრა, სამი მორაგბე, ირაკლი სვანიძე, რევაზ ჯინჯიხაძე და გიორგი მჭედლიშვილი მიავლინა.

ქუთაისური გუნდიდან კი, ამ ნაკრებში მთავარი მელელოვეები ზურაბ ძნელაძე და გიორგი აბრამიძე მოხვდნენ.

მიუხედავად ამისა, თამაში საინტერესო, დაძაბული იქნება და ძნელია, წინასწარ რომელიმეს უპირატესობა მიანიჭო.

ამასობაში, არანაკლებ რთული მატჩი ელის გასვლაზე "ბათუმში" თბილისის "ლოკომოტივს". მით უფრო, რომ რკინიგზელებსაც დააკლდებათ შვიდკაცა რაგბის ნაკრებში მივლენილი ლევან გოგოლაძე, მაშინ, როცა "ბათუმს" ეროვნული ნაკრებიდან ლაშა ხმალაძე და გიორგი თხილაიშვილი დაუბრუნდნენ. შესაბამისად, "ბათუმი" მრისხანე მეტოქეს თითქმის ოპტიმალური შემადგენლობით დაუხვდება.

"ლელოს" ეროვნულ და ახალგაზრდულ ნაკრებში უხვად მივლინებული მოთამაშეები დაუბრუნდნენ და "ლელო არენაზე" თბილისის "აკადემიას" უმასპინძლებს. ლელოელები ამჟამად მე-4 ადგილზე არიან, რაც ბოლო წლებს თუ გავიხსენებთ, ამ გუნდისთვის უჩვეულო პოზიციაა.

ბოლო მატჩებში ტრავმის გამო "აკადემიას" ლიდერი, სოსო მათიაშვილი დააკლდა, რაც გუნდს აშკარად დაეტყო და სატურნირო ცხრილში პოზიციები დათმო.
რუსთავის "ხარები", რომელიც პლეი ოფში მოხვედრისთვის იბრძვის, შინ მიიღებს აუტსაიდერს, ქუთაისის "ბაგრატს". წესით, მასპინძლებს გამარჯვების მიღწევა ძალიან არ უნდა გაუჭირდეთ, რაც მოწინავე ექვსეულში პოზიციის გამყარებაში დაეხმარება.

"ხარებს" ხუთი ქულით ჩამორჩება უშუალო კონკურენტი მარნეულის "არმაზი", რომელიც უმაღლეს ლიგაში დარჩენისთვის მებრძოლ "არმიას" დაუპირისპირდება.

საქართველოს შვიდკაცა რაგბის ნაკრებში ამ გუნდებიდანაც არიან მიწვეულნი. განსაკუთრებით "არმია" "დაზარალდა". "არმაზთან" მატჩში გუნდს ვერ დაეხმარებიან დავით მესხი, ნიკო აფციაური და გიორგი მიქანაძე. მარნეულელებს კი, მესამეხაზელი ილია სპანდერაშვილი დააკლდება.

XIV ტური

23 თებერვალი
ბათუმი-ლოკომოტივი

24 თებერვალი
ლელო-აკადემია
ხარები-ბაგრატი

25 თებერვალი
არმაზი-არმია
ჯიქი-აია

თ მ ფ წ ბ ქ(პ)
1. აია 13 12 0 1 +189 52(4)
2. ლოკომოტივი 13 11 0 2 +140 51(7)
3. ჯიქი 13 8 1 4 +130 43(9)
4. ლელო 13 9 0 4 +86 41(5)
5. ბათუმი 13 7 1 5 +87 37(7)
6. ხარები 13 6 1 6 -55 28(2)
7. არმაზი 13 4 1 8 -71 23(5)
8. აკადემია 13 3 0 10 -10 21(9)
9. არმია 13 2 0 11 -196 10(2)
10. ბაგრატი 13 1 0 12 -296 5(1)

ყოველდღიური სპორტული გაზეთი "ლელო"
527
მკითხველის კომენტარები / 0 /
მსგავსი ამბები
რუბრიკის სხვა სიახლეები