რაგბი. დიდი ათი: ჩემპიონობისთვის სურვილი არ კმარა

კვირას, "ავჭალის სარაგბო სტადიონზე" საქართველოს ჩემპიონატის ყველაზე მნიშვნელოვანი მატჩი, დიდი ფინალი გაიმართება, სადაც ერთმანეთს ძველი მეტოქეები, ქუთაისის "აია" და თბილისის "ლოკომოტივი" დაუპირისპირდებიან.

ეს გუნდები წლეულს მეოთხედ ხვდებიან. რეგულარულ გათამაშებაში მათ თითოჯერ აჯობეს ერთმანეთს. მერე შესარჩევ ფინალში გამარჯვება "აიას" დარჩა და პირდაპირ დიდ ფინალში მოხვდა. რკინიგზელებს კი, კიდევ ერთი რთული ბრძოლის გადატანამ მოუწია მოქმედ ჩემპიონ გორის "ჯიქთან". თუმცა, მოიგო და სეზონის ტრიუმფატორად ყოფნის კარგი შანსი აქვს.

ქუთაისის "აიას" ამ მატჩისთვის მოსამზადებლად ორი კვირა ჰქონდა. მიუხედავად ამისა, დანაკლისი, რომელიც გუნდს გააჩნია, არ შევსებულა. ისევ ტრავმირებულნი არიან მგეზავი გიორგი ბაბუნაშვილი და ფულბეკი მირიან მოდებაძე, საქართველოს ახალგაზრდულ ნაკრებში არიან მივლენილი არსენ მაჩალაძე, ლაშა ლომიძე და ოთარ ძაგნიძე.

იმის გარდა, რომ ბაბუნაშვილი გამოცდილი ნომინალური მგეზავია, ის გუნდის მთავარი დამრტყმელიცაა და "აიასთვის" ეს კომპონენტი დიდ ფინალში პრობლემური იქნება.

გავრცელებული ვერსიით მოიკოჭლებს ქუთათურთა შერკინება სტატიკურ მდგომარეობაში თამაშისას. ეს თანაბრად ეხება შერკინებასაც და დერეფანსაც. თუმცა, შესარჩევ ფინალში "ლოკომოტივის" წინააღმდეგ მატჩში თუ პირველ ტაიმში უპირატესობას რკინიგზელები ფლობდნენ, მეორეში "აიამ" მდგომარეობა საგრძნობლად გამოასწორა და, ალბათ, სწორედ ამის შედეგი იყო იმდღევანდელი გამარჯვება.

უმგეზავოდაა დარჩენილი "ლოკომოტივი". გიორგი აფციაური, რომელსაც ამ პოზიციაზე თამაშის გამოცდილება აქვს, სწორედ "აიასთან" მატჩში დაშავდა და, სავარაუდოდ, ვერც დიდ ფინალში დაეხმარება გუნდს. შესაბამისად, მგეზავად ისევ ბექა წიკლაური ითამაშებს.

"ლოკომოტივის" მთავარი იარაღი მაინც შერკინება იქნება და თუ რკინიგზელებმა უპირატესობა მთელი მატჩის განმავლობაში შეინარჩუნეს, გამარჯვებას ხელიდან არ გაუშვებენ.

"აიამ" ფინალში ბოლოს 2011 წელს ითამაშა და "არმიასთან" 22:29 დამარცხდა. "ლოკომოტივი" კი, ფინალში ორჯერ ზედიზედ 2015-2016 წლებში იყო და ორივეჯერ თბილისის "ლელოსთან" დამარცხდა.

საქართველოს ჩემპიონი ქუთაისის "აია" ბოლოს 1991 წელს იყო. მაშინ ქუთათურებმა ფინალში თბილისის "ვესტა" 11:6 დაამარცხეს და ზედიზედ მეორედ გახდნენ ჩემპიონები. მას შემდეგ, "აიას" მკერდი ოქროს მედლით აღარ დაუმშვენებია. რკინიგზელებმა ქვეყნის საუკეთესო გუნდის ტიტული ბოლოს 2010 წელს მოიგეს, როცა ფინალში "ლელოს" 16:11 სძლიეს.

მოკლედ რომ ვთქვათ, უფრო "მოწყურებული" ქუთაისის "აიაა", მაგრამ მხოლოდ ეს გამარჯვებისთვის არ კმარა.

13 მაისი

დიდი ფინალი

აია-ლოკომოტივი 20:00

ყოველდღიური სპორტული გაზეთი "ლელო"
328
მკითხველის კომენტარები / 0 /
მსგავსი ამბები
რუბრიკის სხვა სიახლეები