რაგბი. დიდი 10. ბათუმი საჩემპიონოდ გაძლიერდა

საქართველოს ჩემპიონატი 31 აგვისტოს დაიწყება. იქამდე კი სატრანსფერო ფანჯარა ღიაა და გუნდებმა განაცხადები 7 აგვისტომდე უნდა წარადგინონ. თუმცა, "ბათუმმა" გუნდის განახლებული სია რაგბის კავშირში გუშინ წარადგინა.

ბათუმური გუნდი საკმაოდ მოღონიერებულა - ზღვისპირელთა რიგები მხოლოდ ფულბეკმა ბახვა კობახიძემ დატოვა, რომელიც, სავარაუდოდ, თბილისის "არმიაში" განაგრძობს კარიერას. ბათუმელთა ექვსი ახალწვეულიდან კი, ოთხი საქართველოს ეროვნული ნაკრების წევრია.

ესენია: ალექსანდრე თოდუა (ლელო), საბა შუბითიძე, ანზორ სიჭინავა (ორივე - აკადემია) და ვაჟა ხუციშვილი (ხარები). მათ გარდა გუნდს დაემატნენ მამუკა ნინიძე (ჯიქი) და გუგა ხანთაძე (აია). შეგახენებთ, რომ "ბათუმში" კიდევ ორი "ბორჯღალოსანი", ლაშა ხმალაძე და გიორგი თხილაიშვილი ირჯება.

უნდა ვივარაუდოთ, რომ "ბათუმი" წლეულს ჩემპიონობის უმთავრესი კანდიდატი იქნება და გამორიცხული არ არის, გუნდმა ისევ ითამაშოს ევროთასებზე.

საქართველოს ჩემპიონატის უმაღლესი ლიგის დებიუტანტს, პატარძეულის "ვეფხვებს" რაგბის კავშირში განაცხადი ჯერ არ გაუგზავნია, მაგრამ გუნდის ოფიციალურ ვებ გვერდზე გამოქვეყნდა სია იმ მორაგბეებისა, რომლებსაც ახალ სეზონში დაიმატებენ.

ესენია: გიორგი ჭურაძე, ვალერი ლეგაშვილი (ორივე - არმაზი), რევაზ ბროძელი, ოთარ ქარჩავა (ორივე - ჯიქი), ჟორა მღებრიშვილი (აია), მიხეილ ზურიკაშვილი (არმია), გიორგი თუთბერიძე (ბაგრატი), ნიკა ბეჟუაშვილი (ხარები), ლევან გომიაშვილი (როდეზი).

აღსანიშნავია, რომ იაპონური "სანვულვზი" დატოვა და კარიერას მარნეულის "არმაზში" განაგრძობს შერკინების ბურჯი ნიკოლოზ ხატიაშვილი.

ყოველდღიური სპორტული გაზეთი "ლელო"
601
მკითხველის კომენტარები / 0 /
მსგავსი ამბები
რუბრიკის სხვა სიახლეები