[რაგბი. დიდი 10] ბოლო წამის სინდრომი

საქართველოს ჩემპიონატის მე-8 ტური, თამამად შეიძლება ითქვას, რომ ყველაზე საინტერესო გამოდგა. ლიდერთა სამეულიდან მხოლოდ ერთმა „ბათუმმა“ გაიმარჯვა. „აიამ“ და „ხარებმა“ კი, მატჩი ბოლო წუთებზე დათმეს. ასევე ბოლო წუთზე გადაწყვიტა მატჩის ბედი სათავისოდ თბილისის „ლოკომოტივმა“ ბოლნისის „ყოჩებთან დაპირისპირებაში...

  ბათუმი-არმაზი         47:3   

ბათუმი: 7ლ - საჯარიმო, ერისთავი, თოდუა, სიჭინავა, ხ. ბუჯიაშვილი, ფუტკარაძე, მიქაძე. 5გ - ურჯუკაშვილი, კ. ბუჯიაშვილი (4).

სინბინი: ქანდაურაშვილი, ტრაპაიძე

გაძევება: ურჯუკაშვილი

არმაზი: ს - მატკავა

სინბინი: კალმახელიძე, წაქაძე

მსაჯი: სულხან ჩიხლაძე

ქვეყნის ჩემპიონი „ბათუმი“ ერთადერთი გუნდია, რომელმაც მე-8 ტურში დამაჯერებლად გაიმარჯვა. თუმცა, იმის თქმა, რომ მან ეს უბრძოველად შეძლო არ იქნება სწორი. დასტურად მატჩის არბიტრის მიერ სინბინში გაშვებული ოთხი მორაგბე და ერთიც გაძევებული გამოდგება.

ბათუმელების საკუთარ მოედანზე ძლევა რთული საქმეა, მით უფრო კრიზისში მყოფი მარნეულის „არმაზისთვის“, რომელიც ამ მარცხის შემდეგ ბოლო ადგილამდე დაქვეითდა. მასპინძლებმა კი, მატჩის ბედი, ფაქტობრივად, პირველ ტაიმში გადაწყვიტეს და ლიდერობა იგდეს ხელთ.

  ყოჩები-ლოკომოტივი          31:32   

ყოჩები: 4ლ - მამულაშვილი, კიკვაძე, ჩხიკვაძე, ბიწაძე. 4გ, ს - სოხაძე.

სინბინი: კიკვაძე, გენებაშვილი, გეგენავა

ლოკომოტივი: 4ლ - ძლენაძე, გასვიანი, გედეხაური, ქვათაძე. 3გ, 2ს - გედეხაური.

სინბინი: მაისურაძე, ძნელაძე

მსაჯი: თორნიკე გვირჯიშვილი

პირველ ტაიმში დაძაბული ბრძოლის შემდეგ „ყოჩები“ ქვეყნის მრავალგზის ჩემპიონს მხოლოდ ორი ქულის სხვაობით უგებდა - 10:8. თუმცა, შესვენების შემდეგ, საწყის 15 წუთში ბოლნისელებმა სამი უპასუხო ლელო გაიტანეს და მე-60 წუთამდე 31:8 იგებდნენ. თითქოს, მატჩის ბედი გადაწყვეტილი იყო, მაგრამ, „ყოჩები“ მოტყუვდნენ. რკინიგზელებმა ფარხმალი არ დაყარეს და დასკვნით ოც წუთში ასევე სამი გარდასახული ლელო მიითავლეს. ბოლო წუთზე კი, ცხრა ნომერმა ლაშა გედეხაურმა საჯარიმო დარტყმით გამარჯვება „ლოკომოტივს“ მოუტანა - 32:31.

 იუნკერები-ხარები    30:28   

იუნკერები: 3ლ - ჟღენტი, კიკვიძე, ლომიძე. 3გ, 3ს - ხარაზიშვილი.

სინბინი: ესართია

ხარები: 4ლ - მაჭარაშვილი, ხაბაშვილი, პურიჭამიაშვილი, ხუციშვილი. 4გ - ხუციშვილი

სინბინი: მაჭარაშვილი, ბებიაშვილი, ნარიმანიძე

მსაჯი: ირაკლი ჭანუყვაძე

კიკეთის „იუნკერებისა“ და გათამაშების აწ უკვე ყოფილი ლიდერის რუსთავის „ხარების“ მატჩი გარდამავალი უპირატესობით მიმდინარეობდა. პირველი ტაიმი „ხარებმა“ 14:6 მოიგო. მეორეში „იუნკერებმა“ 55-ე წუთისთვის დაწინაურება შეძლო - 20:14. თუმცა, „ხარებმა“ ისევ იძალეს ბოლო წუთამდე 28:23 იგებდნენ. თამაშისთვის განკუთვნილი დრო ამოწურული იყო, როცა ჯაბა კიკვიძემ ლელოთი ანგარიში გაათანაბრა. კიკეთელების დამრტყმელს გარდასახვის დარტყმამ საკმაოდ არახელსაყრელი პოზიციიდან მოუწია. მან ბურთი კიდედან ნახევარ მეტრში დადო და კარის ძელებს შორის გაატარა - 30:28.

 აკადემია-აია  25:22   

აკადემია: 3ლ - მიქანაძე, მინდიაშვილი, ლომაური. 2გ, 2ს - მოძღვრიშვილი.

აია: 2ლ - ძაგნიძე, მანაგაძე. 4ს - გ. ბაბუნაშვილი

სინბინი: შალამბერიძე

მსაჯი: ირაკლი ჭანუყვაძე

დაძაბულობით წინა ორ მატჩს არც „აკადემიასა“ და „აიას“ დაპირისპირება ჩამორჩა. 68-ე წუთამდე ანგარიშში წინ მუდმივად ქუთაისური გუნდი იყო. მერე აკადემიელები დაწინაურდნენ - 18:14. თუმცა, 75-ე წუთზე სტუმრები ისევ წინ გაიჭრნენ და საქმე გამარჯვებამდე მიჰყავდათ 22:18. თუმცა, აკადემიელებმა ამ მატჩშიც ბოლომდე იბრძოლეს. დრო აქაც ამოწურული იყო, როცა მასპინძლების ძალისხმევამ შედეგი გამოიღო. ლევან ლომაურის ლელო დავით მოძღვრიშვილმა გარდასახა და თავისიანებს 25:22 მოაგებინა.

 ჯიქი-ლელო  10:19  

ჯიქი: ლ - ივანიშვილი. ს, გ - ჯინჭველაშვილი

სინბინი: მასხარაშვილი

ლელო: ლ - ტაბუცაძე. 4ს. გ - ყიასაშვილი

მსჯი: ჯანლუკა ნეკი (იტალია)

„ჯიქისა“ და „ლელოს“ დაპირისპირების პირველი ტაიმი ყველაზე დაბალშედეგიანი აღმოჩნდა. გუნდებმა თითო საჯარიმი მიითვალეს და შესვენებაზე საყაიმო ანგარიშით 3:3 გაემართნენ. მეორე ტაიმში ლელომ იძალა. ირაკლი ყიასაშვილმა ჩვეულებისამებრ კარში ზუსტად ურტყა. თავი „ლელოს“ მელელოვე აკაკი ტაბუცაძემაც გამოიჩინა და 72-ე წუთამდე 19:3 იგებდნენ. გორელებმა ერთი ლელოს გატანა კი მოახერხეს, მაგრამ მატჩის გადარჩენა ვერაფრით შეძლეს.

419
მკითხველის კომენტარები / 0 /
მსგავსი ამბები
რუბრიკის სხვა სიახლეები
;