დიდი 10. VIII ტური: რვიდან რვა მოგება ხუმრობა არ არის

* "აკადემიამ" პირველი გამარჯვება მიითვალა

* მერვე ტურში ხუთივე მატჩი სტუმრებმა მოიგეს

* ქუთაისის "აიამ" რვა მატჩიდან რვავეში გამარჯვებას მიაღწია.

არმია-აია 21:34
არმია: (15-9) მერკვილიშვილი, მახარაშვილი, ცირეკიძე, ხარშილაძე, მესხი (დევიძე 65), ჭინჭარაული, ნახუცრიშვილი (დავითაშვილი 67). (1-8) ხელია (ქიტუაშვილი 50), მეკოკიშვილი (პაატაშვილი 41), კელენჯერიძე (ბარბაქაძე 68), გიგაური, ქარუხნიშვილი, აფციაური, კალმახელიძე, მასხარაშვილი (მახარაძე 41, დაუშვილი 61).
3ლ: ჭინჭარაული (2), ხარშილაძე. 3გ: მახარაშვილი.
სინბინი: აფციაური, ბარბაქაძე.
აია: (15-9) გ.ბაბუნაშვილი (ლომიძე 73), ძაგნიძე, ძნელაძე, ირემაძე, აბრამიძე, აბჟანდაძე, როხვაძე (თუთბერიძე 41). (1-8) სალდაძე (ჯინჭარაძე 59), ტორაძე (ცქიფურიშვილი 54), წაქაძე (ჩირგაძე 59), მ.ბაბუნაშვილი, შალამბერიძე (ჩიტეიშვილი 54), რევიშვილი, დანგაძე (არეშიძე 68), მაჩალაძე (მღებრიშვილი 54).
4ლ: ძნელაძე (3), აბჟანდაძე. 4გ,2ს - გ.ბაბუნაშვილი
მსაჯი: თორნიკე გვირჯიშვილი

საქართველოს ჩემპიონატს რვა თამაშიდან რვა მოგებით ქუთაისის "აია" ლიდერობს. ქუთათურებმა მერვე ტურში სტუმრად ითამაშეს "არმიასთან" და 34:21 მოიგეს.

თამაში ძალიან კარგი სანახავი გამოდგა. მაყურებელმა ერთმანეთზე უკეთესი შვიდი ლელო იხილა. "აია" საქართველოს ჩემპიონატში ყველაზე გამართულ და საინტერესო რაგბის თამაშობს. მისი მთავარი დამრტყმელი ძალა, სხვა გუნდებისგან განსხვავებით, უკანა ხაზია. თუმცა, ისიც სათქმელია, რომ შერკინებას სტატიკურ მდგომარეობაში ოდნავ უჭირს. სამაგიეროდ, შესანიშნავად აქვთ აწყობილი დერეფანში თამაში.

ცხადია, "აიას" ხარვეზებიც საკმარისად აქვს. დაცვაში თამაშისას ხშირად ჩნდებოდა დაუცველი სივრცე, განსაკუთრებით მგეზავის, ათი ნომრის სიახლოვეს, რითაც "არმიას" მგეზავმა გიორგი ჭინჭარაულმა ორჯერ ისარგებლა და ინდივიდუალური გარღვევის წყალობით ლელოში შეაღწია. პირველად ეს მატჩის 31-ე წუთზე მოხდა, როცა "აია" უკვე 17:0 იგებდა. ამდენად, შეიძლება ეს მოდუნებას დავაბრალოთ. სხვა შემთხვევაში, უფრო მაღალი დონის გუნდთან, ასეთი რამ შეიძლება უფრო ძვირად დაუჯდეთ ქუთათურებს.

შესანიშნავ ფრომაშია და ცალკე აღნიშვნის ღირსია "აიას" შუამარბი ზურაბ ძნელაძე. მისი ყველა მიძალების შემდეგ ქუთაისური გუნდი საკმაოდ დიდ ტერიტორიას იგებდა და რაც მთავარია, ბურთი ერთხელაც არ დაუკარგავს. აღარაფერს ვამბობთ სამ ლელოზე, რომელიც მან ოსტატურად გაიტანა. ყველა მათგანი თვითონვე შექმნა და თვითონვე დააბოლოვა.

პირველი ტაიმი "აიამ" 13 ქულის სხვაობით 20:7 მოიგო. ყველაფერი იმაზე მიუთითებდა, რომ ქუთათურები გამართული, აკადემიური თამაშით მორიგ წარმატებას მიაღწევდნენ. მეორე ტაიმში "არმია", რომელსაც დასაკარგი აღარაფერი ჰქონდა, საგრძნობლად გააქტიურდა. მათ "აიას" ორ ლელოს ასევე ორით უპასუხეს და საპრემიო ქულის აღება არ დაანებეს - 21:34.

ბაგრატი-ლოკომოტივი 10:45
ბაგრატი: 2ლ - სართანია, გოშაძე
სინბინი: ჭელიძე
ლოკომოტივი: 6ლ - შკინინი (3), გოგიჩაშვილი, კავთიძე, გეგია. 4გ - კავთიძე (2), წიკლაური (2).
სინბინი: დარასელია
მსაჯი: შოთა თევზაძე

როგორც მოსალოდნელი იყო, ქვეყნის მრავალგზის ჩემპიონმა თბილისის "ლოკომოტივმა" სტუმრად აუტსაიდერ ქუთაისის "ბაგრატს" მოუგო - 45:10. რკინიგზელთა უპირატესობა, ანგარიშიდანაც კარგად ჩანს, რომ დიდი იყო.

სამი ლელო გაიტანა და მელელოვეთა დავაში დაწინაურდა "ლოკომოტივის" გარემარბი გიორგი შკინინი. მას შემდეგ, რაც მგეზავის პოზიციიდან, ის თავის ჩვეულ ადგილზე, გარემარბად დააბრუნეს, მისი თამაში ბევრად უფრო ეფექტური და შედეგიანი გახდა.

ჯიქი-ლელო 7:20
ჯიქი: ლ - საჯარიმო
ლელო: 2ლ - კვირიკაშვილი, ჯღარკავა. 2გ,2ს - ყიასაშვილი.
სინბინი: ჯულაყიძე, ტაბუცაძე
მსაჯი: სულხან ჩიხლაძე

საქართველოს ჩემპიონი გორის "ჯიქი" შინ ვერას გახდა თბილისის "ლელოსთან". თამაში საკმაოდ დაძაბული გამოდგა. პირველ ტაიმში, ერთი ხანობა ლელოელები მოედანზე 13 კაცითაც დარჩნენ, თუმცა მეტოქე მხოლოდ ოთხი ქულით გაუშვეს წინ - 3:7. შესვენების შემდეგ "ლელომ" მატჩის სადავეები ხელთ იგდო. ორ გარდასახულ ლელოს ორი საჯარიმოც მიაყოლა და უმნიშვნელოვანესი გამარჯვება მიითვალა.

ხარები-ბათუმი 14:41
ხარები: 2ლ - გოგიაშვილი, ქანდაურაშვილი. 2გ - მჭედლიშვილი
სინბინი: ჩომახაშვილი
ბათუმი: 6ლ - საჯარიმო, ხმალაძე, თხილაიშვილი, თხილაიშვილი, გრიგოლია, კირინი. 3გ,ს - კობახიძე.
სინბინი: კორტავა, ერისთავი
მსაჯი: გია ამირხანაშვილი

"ბათუმმა", რომლის თამაშსაც მუდამ ევროთასების ჭრილში ვუყურებთ, სტუმრად რუსთავის "ხარებთან" დამაჯერებელ გამარჯვებას მიაღწია - 41:14. ზღვისპირელებმა პირველი ტაიმი მშრალი ანგარიშით 24:0 მოიგეს.

შესვენების შემდეგ მასპინძლებმა ხელი გამოიღეს და ორი ლელო მიითვალეს, თუმცა ეს საკმარისი არაფრისთვის აღმოჩნდა. "ბათუმმა" ექვსი ლელო გაიტანა და საპრემიო ქულაც აიღო.

არმაზი-აკადემია 14:18
არმაზი: 2ლ - წიკლაური, ბარბაქაძე. 2გ - ჯინჭველაშვილი.
სინბინი: წიკლაური
აკადემია: 2ლ - შუბითიძე, მათიაშვილი. 2ს,გ - მათიაშვილი
სინბინი: სიჭინავა
მსაჯი: ნიკა ამაშუკელი

თბილისის "აკადემიამ" პირველი გამარჯვება მოიპოვა. აკადემიელებმა რუსთავის სარაგბო სტადიონზე მარნეულის "არმაზი" დაამარცხეს - 18:14. ანგარიშიდანაც ნათლად ჩანს, რომ ბრძოლა უშეღავათო იყო. ის 51-ე წუთზე დაფიქსირდა და 29 წუთის განმავლობაში ძნელი სათქმელი იყო, გამარჯვება ბოლოს ვის დარჩებოდა. "აკადემიამ" თავდაუზოგავად იბრძოლა და მოიგო.

დიდი 10. IX ტური

17 ნოემბერი
ლოკომოტივი-არმია

18 ნოემბერი
ლელო-არმაზი
აია-ხარები

19 ნოემბერი
აკადემია-ბაგრატი
ბათუმი-ჯიქი

ყოველდღიური სპორტული გაზეთი "ლელო"
483
მკითხველის კომენტარები / 0 /
მსგავსი ამბები
რუბრიკის სხვა სიახლეები