რაგბი. დიდი 10. უხვლელოიანობა-გახდება ტენდენცია?

საქართველოს ჩემპიონატის პირველი ტური უხვლელოიანი გამოდგა. საინტერესოა, რა მოხდება მეორეში. გახდება თუ არა მრავალლელოიანობა ტენდენცია.

თუ გუნდების მზადყოფნას და სათამაშო დონეს გავითვალისწინებთ, ეს სავსებით შესაძლებელია. მეორე ტურში არანაკლებ საინტერესო მატჩები შეიძლება ვიხილოთ.

ყველაზე დიდ ინტერესს ქუთაისში, ადგილობრივი "აიასა" და მარნეულის "არმაზის" დაპირისპირება იწვევს. ორივე გუნდს, თამამად შეიძლება ითქვას, საქართველოს ჩემპიონატში საუკეთესო უკანა ხაზი აქვს. ქუთათურებს შვიდკაცა რაგბის ნაკრებში მივლენილი უკანახაზელები ლაშა ლომიძე და ოთარ ძაგნიძე დააკლდებათ.

"არმაზმა" კი ამ ნაკრებში მხოლოდ მესამეხაზელი ილია სპანდერაშვილი მიავლინა. მიუხედავად ამისა, "აია" მაინც სოლიდური შემადგენლობით დახვდება მეტოქეს და, გამორიცხული არ არის, ტრავმის მოშუშების შემდეგ გუნდს მირიან მოდებაძე დაუბრუნდეს.

"არმაზი" ნელ-ნელა ანგარიშგასაწევ ძალად ჩამოყალიბდა და "აიასთან" დაპირისპირება გვიჩვენებს, რამდენად საფუძვლიანია ამ გუნდის ამბიციები.

კიდევ ერთი გუნდი, რომელსაც გამორჩეული უკანა ხაზი ჰყავს, "ბათუმია". ზღვისპირელები შინ ეთამაშებიან რუსთავის "ხარებს", რომელმაც დაძაბულ ბრძოლაში დათმო მატჩი შინ, "ლელოსთან". ბათუმელების მეტოქე კი, საგრძნობლად გაახალგაზრდავებული "აკადემია" იყო, რომელიც საბოლოოდ მხოლოდ მეორე ტაიმში გატეხა.

საშინაო არენაზე, ცხადია, "ბათუმი" ფავორიტია. ძნელი წარმოსადგენია, ზღვისპირელებმა "ხარებს" რაიმე შანსი მისცენ. თუმცა, ისიც არ უნდა დაგვავიწყდეს, რომ რუსთავული გუნდი სწორედ ისაა, ვისაც სიურპრიზების შეთავაზება შეუძლია.

შეჯიბრების დებიუტანტს, პატარძეულის "ვეფხვებს" პირველად მოუწევს უმაღლეს ლიგაში გასვლითი მატჩის გამართვა. გამომცდელი კი, არანაკლებ სერიოზული ჰყავს, ვიდრე პირველ ტურში. კახურ გუნდს "ლელო არენაზე" თბილისის "ლელო" დაუხვდება, რომელსაც ასევე ერთ-ერთი გამორჩეული უკანა ხაზი ჰყავს მიმდინარე ჩემპიონატში.

"ვეფხვებმა" პირველ მატჩში ქვეყნის ჩემპიონს, თბილისის "ლოკომოტივს" სამი ლელო გაუტანეს, რაც ამ გუნდის შესაძლებლობებზე ნათლად მეტყველებს. თანაც, პატარძეულელებს შანსი უჩნდებათ, რადგან "ლელომ" საქართველოს შვიდკაცა რაგბის ნაკრებში სამი მოთამაშე მიავლინა. ესენია: ნიკო აფციაური, სოსო მათიაშვილი და თენგიზ პერანიძე.

საქართველოს ჩემპიონი თბილისის "ლოკომოტივი" კი, თბილისის "არმიას" მასპინძლობს, რომელმაც პირველ ტურში ყველაზე დიდი სხვაობით წააგო. პირველი ტაიმი არმიელებმა "აიასთან" სულაც 50:0 დათმეს. ძნელი დასაჯერებელია, მთავარმა მწვრთნელმა ლევან ცაბაძემ გუნდში ისეთი ცვლილება განახორციელოს, რომ რკინიგზელებთან გამარჯვების შანსი მიეცეთ. თუმცა, ისიც გასათვალისწინებელია, რომ "ლოკომოტივს" უკანახაზელები ზურაბ ძნელაძე და იოანე ხელაია დააკლდებათ, რომელნიც ასევე შვიდკაცა რაგბის ნაკრების წევრები არიან.

სეზონის წინ განხორციელებული ცვლილებები გორის "ჯიქის" თამაშის ხარისხს აშკარად დაეტყო. გუნდის ფრანგმა თავკაცმა ჯერ კიდევ ვერ შეძლო თავისი სათამაშო კონცეფციის ინიექცია. ეს გასაკვირიც არაა. ჯერ მხოლოდ ერთი ტურია გამართული და ყველაფერი წინაა. გორელები ამჯერად შინ ითამაშებენ გაახალგაზრდავებულ "აკადემიასთან" და შეეცდებიან, მოგებათა გრაფაში ერთიანი ჩაიწერონ.

II ტური

პარასკევი. 7 სექტემბერი
ბათუმი-ხარები 17:00
შაბათი. 8 სექტემბერი
ლელო-ვეფხვები 15:00
აია-არმაზი 17:15

კვირა. 9 სექტემბერი
ჯიქი-აკადემია 15:00
ლოკომოტივი-არმია 17:15

თ მ ფ წ ბ ქ(ს)
1. აია 1 1 0 0 +43 5(1)
2. ბათუმი 1 1 0 0 +39 5(1)
3. ლოკომოტივი 1 1 0 0 +25 5(1)
4. არმაზი 1 1 0 0 +23 4(0)
5. ლელო 1 1 0 0 +3 4(0)
6. ხარები 1 0 0 1 -3 1(1)
7. ჯიქი 1 0 0 1 -23 0(0)
8. ვეფხვები 1 0 0 1 -25 0(0)
9. აკადემია 1 0 0 1 -39 0(0)
10. არმია 1 0 0 1 -43 0(0)

ყოველდღიური სპორტული გაზეთი "ლელო"
413
მკითხველის კომენტარები / 0 /
მსგავსი ამბები
რუბრიკის სხვა სიახლეები