რაგბი. დღეს დიდი ათი იწყება

დღეს საქართველოს ჩემპიონატი იწყება. ახალი სარაგბო სეზონი, როგორც საკლუბო, ისე სანაკრებო რაგბიში ბევრ საინტერესოს გვპირდება.

ცხადია, საშინაო რაგბის მოწყურებული ქომაგი ეროვნული ჩამპიონატის დაწყებას მოუთმენლად ელოდება. გუნდების უმრავლესობა, სხვადასხვა გზით მოღონიერდა და პირველობისთვის ბრძოლა, წესით, საინტერესოდ უნდა წარიმართოს.

პირველ ტურს დღეს, ავჭალის სარაგბო სტადიონზე თბილისის "არმიასა" და ქუთაისის "აიას" შორის დაპირისპირება გახსნის. არმიელებმა შარშან წარუმატებლად ითამაშეს და ბოლოსწინა ადგილს დასჯერდნენ. ამას, ცხადია, ობიექტური მიზეზი ჰქონდა.

თავდაცვის სამინისტრომ ამ კლუბის დაფინანსებაზე უარი თქვა. გუნდი სულაც დაშლის პირას იყო მისული, თუმცა ახალი პატრონი, ვეტერანთა საბჭო გამოუჩნდა.

გუნდს ახალი მთავარი მწვრთნელი ჰყავს. ლეგენდარული ქართველი მორაგბე ლევან ცაბაძე პოლიტიკიდან ისევ რაგბის დაუბრუნდა და "არმიას" ჩაუდგა სათავეში. გუნდს დაუბრუნდნენ მისი ყოფილი მოთამაშეები ბახვა კობახიძე, საბა ნიკოლავა, ბექა გუგეშაშვილი და ირაკლი ქორიძე.

ქუთაისის "აია" ამ შეხვედრაში მაინც ფავორიტია, მიუხედავად იმისა, რომ გასული ჩემპიონატის ერთ-ერთი საუკეთესო მელელოვე ზურაბ ძნელაძე დაკარგა. ქუთათურთა გუნდში საკმაოდ ბევრია ახალგაზრდული და შვიდკაცა რაგბის ნაკრების წევრები. "აიას" მგეზავ თედო აბჟანდაძეს თამაშს კი, რაგბის ქომაგები დიდი იმედითა და გულისყურით მიადევნებენ თვალს.

შაბათს "შევარდენის სანაკრებო ბაზაზე" მარნეულის "არმაზი" გორის "ჯიქს" უმასპინძლებს. ამ უკანასკნელის სამწვრთნელო შტაბში საინტერესო ცვლილებები მოხდა: პალიკო ჯიმშელაძის ნაცვლად, მთავარ მწვრთნელად ფრანგი ოლივიე საოში დაინიშნა, რომელსაც ყოფილი "ბორჯღალოსანი", ახლო წარსულში "ორიაკის" მეორეხაზელი ლევან დათუნაშვილი დაეხმარება. ამდენად, საინტერესოა, აქამდე შეუპოვრობით ცნობილი გუნდი ახალ სეზონში რა სიახლეს, შემოგვთავაზებს.

საინტერესო შევსება აქვს "არმაზსაც". ამ გუნდს ახალგაზრდული ნაკრების სამი მორაგბე მიხეილ ალანია, კოტე მარჯანიშვილი და გიორგი მიქანაძე დაემატა. არმაზელების შემადგენლობაში ბევრი კარგი მორაგბეა და თამაშის ხარისხიც, იმედი გვაქვს შესაბამისი იქნება.

შაბათსვე თბილისის "ლელო", რომელსაც თამამად შეიძლება ითქვას, რომ გასულ სეზონში ჩავარდნა ჰქონდა (მე-5 ადგილი დაიკავა), სტუმრად ითამაშებს რუსთავის "ხარებთან", რომელმაც ორი წამყვანი მოთამაშე - ვაჟა ხუციშვილი და რევაზ წიკლაური დაკარგა.

ალექსანდრე თოდუა ერთადერთია, რომელმაც თბილისის "ლელო" დატოვა. სანაცვლოდ მნიშვნელოვანი შევსება მიიღო. გუნდს თბილისის "აკადემიიდან" შეუერთდა სოსო მათიაშვილი, გორის "ჯიქიდან" კი, ასევე "ბორჯღალოსანი" გიორგი ჭყოიძე დაუბრუნდა. აქვე ითამაშებს შუამარბი რევაზ ჯინჯიხაძე. ამერიკიდან საქართველოში დაბრუნდა მესამეხაზელი გრიგოლ ქერდიყოშვილი. ერთი სიტყვით, "ლელო" ის გუნდია, რომელმაც ჩემპიონობისთვის უნდა იბრძოლოს.

კვირას ორი მატჩია. ქვეყნის ჩემპიონი თბილისის "ლოკომოტივი" სტუმრად ეთამაშება უმაღლესი ლიგის დებიუტანტს პატარძეულის "ვეფხვებს". კახელები, თავიანთ საშინაო მატჩებს, როგორც ჩანს, რუსთავში გამართავენ და მათი სადებიუტო შეხვედრაც სწორედ რუსთავის სარაგბო სტადიონზე გაიმართება.

რკინიგზელებს პირველ ტურში მუდამ უჭირთ ხოლმე, მაგრამ თუ შემადგენლობებს თვალს გადავავლებთ, წესით, მათ მეტოქის დამარცხება არ უნდა გაუჭირდეთ. თუმცა, "ვეფხვები" ჯერაც ყველასთვის უცნობი გუნდია და, იმედია, სეზონის განმავლობაში, ქართული რაგბის "ბობოლებს" ბევრ პრობლემას შეუქმნის.

ტურის ბოლო შეხვედრაში თბილისის "აკადემია", რომელიც შემადგენლობის მხრივ საგრძნობლად დაზარალდა, მოღინიერებულ "ბათუმს" უმასპინძლებს.

თბილისურმა გუნდმა დაკარგა ერთბაშად ოთხი ლიდერი - "ბორჯღალოსნები" სოსო მათიაშვილი და ანზორ სიჭინავა, ასევე იოანე ხელაია და თორნიკე ზოიძე. სანაცვლოდ კი, სხვა გუნდებიდან არავინ დაუმატებია. ისევ საკუთარი აღზრდილებით შეივსო რიგები.

ზღვისპირელებმა საჩემპიონო შემადგენლობას მოუყარეს თავი. მათ რიგებში რამდენიმე "ბორჯღალოსანი" გაირჯება: ესენია: ლაშა ხმალაძე, ალექსანდრე თოდუა, ანზორ სიჭინავა, საბა შუბითიძე, გიორგი თხილაიშვილი და ვაჟა ხუციშვილი. გუნდს დაუბრუნდა გასული ჩემპიონატის საუკეთესო მექულე მამუკა ნინიძე. ასე რომ, თავად განსაჯეთ, შეუძლია თუ არა ამ გუნდს ჩემპიონის ტიტულის მოპოვება.

I ტური

31 აგვისტო
არმია-აია

1 სექტემბერი
არმაზი-ჯიქი
ხრები-ლელო

2 სექტემბერი
ვეფხვები-ლოკომოტივი
აკადემია-ბათუმი

ყოველდღიური სპორტული გაზეთი "ლელო"
1327
მკითხველის კომენტარები / 0 /
მსგავსი ამბები
რუბრიკის სხვა სიახლეები
;