რაგბი.ევროთასები.ბათუმის შეუსრულებელი მისია?

კონტინენტის ფარის" პლეი ოფის პირველ მატჩში, საქართველოს ვიცე-ჩემპიონმა "ბათუმმა" რუმინეთის ჩემპიონ "ტიმიშოარას" უმასპინძლა და 6:11 დამარცხდა.

* "ბათუმმა" პლეი ოფში პირველი მატჩი დათმო
რუმინულ "ტიმიშოარასთან" - 6:11.
* საპასუხო მატჩი 20 იანვარს გაიმართება.
* "ბათუმს" 6-ქულიანი გამარჯვება სჭირდება.

ბათუმელებს მომავალ უქმეებზე რუმინულ ქალაქ კლუჟში, საპასუხო შეხვედრაში ხუთქულიანი ჩამორჩენის აღმოფხვრისთვის ბრძოლა მოუწევთ. წინააღმდეგ შემთხვევაში, ქართული კლუბი გათამაშებას გამოეთიშება.

მატჩი ბათუმის სარაგბო სტადიონზე ცუდ მეტეოროლოგიურ პირობებში წარიმართა, რაც ორივე გუნდის მორაგბეებს ხელს უშლიდა გაშლილი, სწრაფი რაგბი ეთამაშათ. საბოლოოდ, ისე გამოვიდა, რომ თავსხმა წვიმასთან ადაპტირებული უფრო სტუმართა გუნდი იყო.

პირველი ტაიმის საწყისი ოცდაათი წუთი ბათუმელების უპირატესობით წარიმართა. თუმცა, ამის ქულებში ასახვა ვერაფრით მოხერხდა. ანგარიშის გახსნა მასპინძელთა ფულბეკ ბახვა კობახიძეს მე-5 წუთზე შეეძლო, მაგრამ საჯარიმო დარტყმა 43 მეტრიდან ვერ გაიტანა.

ამას თან დაერთო წუნი დერეფანში თამაშისას. ბათუმელებმა ზედიზედ სამჯერ წააგეს საკუთარი აუტი და შეტევის ნაცვლად დაცვაში თამაშმა და ბურთის მოგერიებამ მოუწიათ. ამან, ცხადია, გავლენა იქონია თამაშის საერთო სურათზე.

დასკვნით ათ წუთში "ტიმიშოარამ" უპირატესობის მოპოვება შეძლო. მალე, მათაც გაუშვეს ხელიდან ანგარიშის გახსნის შანსი, როცა საჯარიმო ხელსაყრელი პოზიციიდან ტევიტა მანუმუამ ვერ გაიტანა. თუმცა, 33-ე წუთზე, როცა რუმინელები საჯარიმო დარტყმის უპირატესობას ათამაშებდნენ, ჯოდი როუზმა არეკნით კარის დალაშქვრა სცადა და გამოუვიდა - 3:0.

სამ წუთში კობახიძემ მეტოქეს ზუსტი საჯარიმოთი უპასუხა - 3:3. ასე დასრულდა პირველი ტაიმი.

შესვენების შემდეგ რუმინელები კიდევ უფრო გააქტიურდნენ. 50-ე წუთზე მათ დერეფნიდან მოლი ააგორეს. შერკინების კვაჭი ანდრეი რადოი მოლს მოსწყდა და ლელოში შეაღწია.

მეტოქემ ლელო ვერ გარდასახა და ხუთი ქულით დაწინაურდა - 8:3. ამ დროისთვის "ბათუმი" კაცნაკლული თამაშობდა. არბიტრმა სინბინში მესამეხაზელი გიორგი თხილაიშვილი გაუშვა.

ამის შემდეგ ბათუმელებმა მეტოქეზე ხანგრძლივი იერიში მიიტანეს და, ჯერ კიდევ კაცნაკლულებმა, კობახიძის საჯარიმოს წყალობით ანგარიშში სხვაობა ორ ქულამდე შეამცირეს - 6:8.

"ბათუმს" მცდელობა არ დაუკლია მატჩის ბედი სათავისოდ მოეტრიალებინა, მაგრამ გრძელი სათადარიგო სკამის წყალობით, "ტიმიშოარამ" შეძლო დასკვნით 10 წუთში უპირატესობის მოპოვება.

76-ე წუთზე კი, შეცვლაზე შესულმა გაბრიელ კონაკემ საჯარიმო გაიტანა და ანგარიშში სხვაობა ხუთ ქულამდე გაზარდა - 11:6.
საპასუხო მატჩი კლუჟში 20 იანვარს გაიმართება. თუმცა, ხუთქულიანი ჩამორჩენის და ისიც სტუმრად აღმოფხვრა, ცხადია, იოლი არ იქნება.

ბათუმი-ტიმიშოარა 6:11
ბათუმი (15-9) კობახიძე, ტუჩაშვილი (გრიგოლია 73), ტრაპაიძე, გოგიტიძე, ნინიძე, ხმალაძე, თუთბერიძე (ჯაბნიძე 71); (1-8) ერისთავი (კვანტიძე 63),

თედორაძე (მამრიკიშვილი 51), დონაძე (გოგისვანიძე 58), მიქაძე (ალიქაძე 69), ქოიავა, თხილაიშვილი, ფუტკარაძე, ბუჯიაშვილი

2 ს: კობახიძე
სინბინი: თხილაიშვილი

ტიმიშოარა (15-9) პოპა (კონაკე 60), ლემნარუ, მანუმუა, უმანგა, შენანი (სიმიონესკუ 55), როუზი, სენილოლი (ლეიტერსი 50); (1-8) ბადიუ (აპოუა 63), რადოი (საბეუ 63), პუნჯა (მარიში), პოპირლანი დრენჩანუ, მორისონი, რუსი (იანუში 67) სტიუარტი (დოილი 71)

1 ლ: რადოი. ს: კონაკე. ა: როუზი
მსაჯი: ჯ. გროუვ-ვაით (შოტლანდია)

ყოველდღიური სპორტული გაზეთი "ლელო"
1268
მკითხველის კომენტარები / 1 /
daTo
0
ეს ანგარიში რა წაღმაუკუღმა წერია სტატიაში,
არადა მარტივია
მასპინძელი X : სტუმარი Y
მსგავსი ამბები
რუბრიკის სხვა სიახლეები
;