რაგბი.ევროთასები. ბათუმი კონტინენტის ფარის მეოთხედფინალშია

* "ბათუმმა" რუმინული "ტიმიშოარა" 20:17 დაამარცხა.

* ქართული კლუბი "კონტინენტის ფარის" მეოთხედფინალშია,
სადაც ისევ "ტიმიშოარას" ხვდება.

* "კონტინენტის ფარის" ორი ფინალისტი 2018/19 წლების სეზონში
ჩელენჯ კაპზე იასპარეზებს

"კონტინენტის ფარის" გათამაშების ჯგუფური ეტაპის ბოლო ტურში "ბათუმმა" რუმინეთის უძლიერესი კლუბი, "ტიმიშოარა" მიიღო და 20:17 დაამარცხა. შედეგად, ბათუმელები B ჯგუფში მეორე ადგილზე გავიდნენ და მომდევნო ეტაპზე არიან, სადაც ისევ "ტიმიშოარას" დაუპირისპირდებიან.

პლეი ოფის მატჩები 2018 წლის იანვარში ჩატარდება და პირველ შეხვედრაში "ბათუმი" მასპინძელია. ეს მატჩი 13 იანვარს გაიმართება. მერე, ერთი კვირის თავზე, რუმინეთს ეწვევა და ორი თამაშის ჯამში გამარჯვებული "კონტინენტის ფარის" ნახევარფინალში გავა, სადაც მისი მეტოქე იტალიის ჩემპიონ "კალვიზანოსა" და "ჰაიდელბერგის" წყვილს შორის გამარჯვებული იქნება.

მეორე ნახევარფინალური წყვილი უკვე ცნობილია - რუსული "ენისეი-სტმ" და "კრასნი იარი". ნახევარფინალები აპრილში გაიმართება.

ფინალი 28 მაისს ბილბაოს "სან მამესზეა", ერთ-ერთ რუსულ კლუბს პლეი ოფში გასული ოთხეულიდან საუკეთესო დაუპირისპირდება.
"ბათუმს" რუმინულ გუნდთან, რომელსაც პრაქტიკულად განაღდებული ჰქონდა პლეი ოფში თამაშის უფლება, მხოლოდ გამარჯვება სჭირდებოდა.

ზღვისპირელების სასარგებლოდ უნდა ითქვას, რომ წინა სამი მატჩისგან განსხვავებით, გუნდმა ორივე ტაიმში ერთ რიტმში ითამაშა და ისეთი სერიოზული ჩავარდნა, რაც იტალიაში ჰქონდა, აღარ მოსვლია.

ბათუმელი მორაგბეები ფსიქოლოგიურად კარგად იყვნენ მომზადებულნი და ყველა მათგანს ესმოდა, რამდენად დიდი იყო გამარჯვების ფასი. მიზნის მისაღწევად თავს არავინ ზოგავდა.

თამაში სტუმრებმა უფრო აქტიურად დაიწყეს. ბათუმელები ოდნავ ნერვიულობდნენ. რუმინულმა გუნდმა კარგად გამოიყენა ეს გარემოება და მე-7 წუთზე ცხრა ნომერმა კევინ ლეიტერსმა ლელოთი ანგარიში გახსნა. ტევიტა მანუმუამ გარდასახა - 7:0.

მასპინძლებმა თამაში პირველი ტაიმის შუაწელისკენ დაალაგეს. 23-ე წუთზე ფულბეკმა ბახვა კობახიძემ ანგარიშში სხვაობა საჯარიმო დარტყმით ოთხ ქულამდე შეამცირა - 3:7. ამის შემდეგ, ტაიმის ბოლომდე "ბათუმის" უპირატესობა აშკარა იყო. 33-ე წუთზე ზღვისპირელების მშვენიერი კომბინაციის შემდეგ შუამარბმა ბექა ურჯუკაშვილმა ლელოც გაიტანა, მაგრამ მატჩის არბიტრი რომელიღაც მორაგბეს შეეჯახა, წაიქცა და ბურთის ლელოში დამიწება ვერ დააფიქსირა.

დაინიშნა შერკინება, რომელშიც ჩვენი გუნდი უპირატესობას ფლობდა. ბურთი შერკინებიდან მესამეხაზელმა ხვიჩა ბუჯიაშვილმა აიტაცა, თუმცა ლელომდე ორ მეტრში შეაჩერეს, რამდენიმე მიძალების შემდეგ ლელო ძელთან ახლოს შერკინების კვაჭმა ბექა მამრიკიშვილმა მიითვალა. კობახიძეს გარდასახვა არ გასჭირვებია - 10:7. ასე დასრულდა პირველი ტაიმი.

შესვენების შემდეგ, მალევე, 44-ე წუთზე რაკში თამაშისას ბურთი ყველასთვის მოულოდნელად, შუამარბ ტევიტა მანუმუასთან აღმოჩნდა, რომელმაც "ბათუმის" ლელოსკენ ფეხით გადაკიდა და მიჰყვა. მას წინააღმდეგობა ფაქტობრივად არ შეხვედრია. გარდასახვა თვითონვე დაარტყა და ააცილა - 10:12.

დასანანი ლელოს შემდეგ "ბათუმს" გონს მოსასვლელად დიდი დრო არ დასჭირვებია. 11 წუთში მასპინძელთა მორიგი იერიში ცხრა ნომერმა ზურაბ თუთბერიძემ ლელოთი დაასრულა, მაგრამ არბიტრმა ვერც ეს დააფიქსირა.

ისევ შერკინება დაინიშნა, რომელშიც "ტიმიშოარას" მორკინალები ერთიანად ჩაწვნენ. ბუჯიაშვილმა ბურთი თუთბერიძეს გაუტანა, რომელმაც რუმინელთა ხაზში დაუცველი სივრცე დროულად შენიშნა და ლელო ძელებს შორის გაიტანა. კობახიძემ, ცხადია, ესეც გარდასახა - 17:12.

ანგარიშში ხუთქულიანი სხვაობა არაფრის გარანტიას არ იძლეოდა. ამიტომ, 62-ე წუთზე საჯარიმო აუტში არ გადაიტანეს. კობახიძემ კარში დარტყმა არჩია და მიზანმაც არ უმტყუნა - 20:12. როგორც საბოლოოდ გაირკვა, ეს სწორი გადაწყვეტილება აღმოჩნდა, რამაც "ბათუმს" გამარჯვება მოუტანა.

"ტიმიშოარამ" ანგარიშის შემცირება და საპრემიო ქულის აღება მატჩის ბოლო წუთზე შეძლო. მოლს მესამეხაზელი ვასილე რუსი მოსწყდა და ლელო ალამთან ახლოს გაიტანა. გარდასახვა მანუმუას გაუცუდდა - 20:17.

IV ტური

ბათუმი-ტიმიშოარა 20:17

კალვიზანო-როვიგო 34:0

პადოვა-ვიადანა 41:7

ლისაბონი-ჰაიდელბერგი 7:38

A ჯგუფი
თ მ ფ წ ბ ქ (პ)

1. ტიმიშოარა 4 3 0 1 +38 14 (2)
2. ჰაიდელბერგი 4 3 0 1 +22 13 (1)
3. როვიგო 4 2 0 2 +3 11 (3)
4. ვიადანა 3 1 0 3 -62 6 (2)

B ჯგუფი
თ მ ფ წ ბ ქ (პ)

1. კალვიზანო 4 2 0 2 +55 12 (4)
2. ბათუმი 4 2 0 2 +12 12 (4)
3. პადოვა 4 2 0 2 +31 11 (3)
4. ლისაბონი 4 1 0 3 -99 4 (0)

პლეი ოფი. 13 იანვარი

ბათუმი-ტიმიშოარა
ჰაიდელბერგი-კალვიზანო

ყოველდღიური სპორტული გაზეთი "ლელო"
1193
მკითხველის კომენტარები / 0 /
მსგავსი ამბები
რუბრიკის სხვა სიახლეები
;