რაგბი. ევროთასები. 'ლოკომოტივი' იტალიელების წინააღმდეგ

საქართველოს ჩემპიონი "ლოკომოტივი" ევროპის საკლუბო რაგბის მესამე დონის ტურნირში, კონტინენტის ფარზე ითამაშებს და ჯგუფურ ეტაპზე ორ იტალიურ კლუბთან ოთხ თამაშს გამართავს.

წლეულს კონტინენტის ფარზე ექვსი კლუბი ითამაშებს. შესაბამისად, შეიცვალა ასპარეზობის ფორმატიც. კლუბები ორ სამგუნდა ჯგუფში განაწილდნენ და თითოეულს თანაჯგუფელებთან შინ და გარეთ ორ-ორი თამაშის გამართვა მოუწევს. ჯგუფის გამარჯვებულები ერთმანეთს ორმატჩიან ფინალში, ასევე შინ და გარეთ შეხვდებიან, აქ მოგებული 2019-2020 წლების "ჩელენჯ კაპის" საგზურს მიიღებს.

წლეულს კონტინენტის ფარზე ოთხი იტალიური კლუბი, თბილისის "ლოკომოტივი" და "ბელგიელი ბარბაროსები" ითამაშებენ. საქართველოს ჩემპიონი A ჯგუფში "კალვიზანოსა" და "რომასთან" ერთად ითამაშებს. B ჯგუფში "პადოვა", "როვიგო" და ბელგიელი "ბარბაროსები" დაუპირისპირდებიან ერთმანეთს.

"ლოკომოტივი" პირველ თამაშს 13 ოქტომბერს გამართავს და "ავჭალის სარაგბო სტადიონზე" "კალვიზანოს" უმასპინძლებს.

"ლოკომოტივის" მთავარმა მწვრთნელმა თემურ ბენდიაშვილმა რაგბის კავშირის ოფიციალურ ვებგვერდთან საუბრისას თქვა, რომ მიუხედავად სირთულეებისა, გუნდის მიზანი ფინალში გასვლა და "ჩელენჯ კაპის" საგზურის მოპოვებაა:

"ჩვენ ვუყურებთ სანაკრებო მატჩებს, საფრანგეთის ჩემპიონატს და ინგლისის პრემიერშიპს, მაგრამ თითქმის არაფერი ვიცით სხვა სარაგბო ქვეყნების შესახებ. ისინი თავისი გზით ვითარდებიან და მნიშვნელოვანია, რომ მათ მხარი ავუბათ. სწორედ ამიტომ, მიუხედავად დიდი სირთულეებისა, გადავწყვიტეთ კონტინენტის ფარზე თამაში, მით უმეტეს, რომ ფორმატი შეიცვალა ეს ძალიან ძვირიც აღარ ჯდება.

გვჯერა, რომ მეტოქეების დამარცხება და ჩელენჯ კაპზე გასვლა შეგვიძლია. ამისთვის ძალ-ღონეს არ დავიშურებთ".

კონტინენტის ფარი

13 ოქტომბერი
ლოკომოტივი-კალვიზანო

8 დეკემბერი
რომა-ლოკომოტივი

15 დეკემბერი
კალვიზანო-ლოკომოტივი

12 იანვარი
ლოკომოტივი-რომა

ყოველდღიური სპორტული გაზეთი "ლელო"
456
მკითხველის კომენტარები / 0 /
მსგავსი ამბები
რუბრიკის სხვა სიახლეები