რაგბი. ევროთასები: პლეი ოფში ქართველთა შვიდი გუნდით

დასრულდა ჯგუფური ეტაპი ევროთასების გათამაშებებში. ყველაზე პრესტიჟულ, ჩემპიონთა თასზე პლეი ოფში ქართველ მორაგბეთა ოთხი გუნდი გავიდა. ესენია: "კლერმონი", "ლა როშელი", "ტულონი" და "მეტრო რასინგი".

A ჯგუფში პირველი ადგილი ლექსო ყაულაშვილის "ლა როშელმა" დაიკავა, რომელმაც ბოლო ტურში შინ დაამარცხა ინგლისური "ჰარლიქვინზი" - 16:7. ქართველი პირველხაზელი თამაშში 55-ე წუთიდან ჩაერთო.

ასევე პირველი ადგილი დაიკავა C ჯგუფში დავით ზირაქაშვილის, ვიქტორ კოლელიშვილის, ოთარ გიორგაძისა და ბექა კაკაბაძის "კლერმონმა". "ვულკანებმა" ბოლო ტურში, შინ დაამარცხეს უშუალო კონკურენტი უელსური "ოსფრიზი" - 24:7. ზირაქაშვილი ძირითად შემადგენლობაში იყო და 50-ე წუთზე შეცვალეს. სხვა ქართველებს არ უთამაშიათ.

მეორე ადგილებზე გავიდნენ თავიანთ ჯგუფებში "ტულონი" და "მეტრო რასინგი". ტულონელებმა, მართალია, სტუმრად წააგეს უელსურ "ჰლანეჰლისთან" 27:30, მაგრამ აქამდე დაგროვებულ 18 ქულას ერთი საპრემიო ქულაც დაუმატეს, რაც საკმარისი აღმოჩნდა პლეი ოფში გასასვლელად. ქართველ მორაგბეებს, მამუკა გორგოძეს და ლევან ჩილაჩავას არ უთამაშიათ.

ვასილ კაკოვინის "მეტრო რასინგმა" კი სტუმრად დაამარცხა ჯგუფის აუტსაიდერი, ინგლისური "ლესტერი" - 23:20. კაკოვინი თამაშში 58-ე წუთიდან ჩაერთო.
ჩემპიონთა თასი

1/4 ფინალი
ლენსტერი-სარასენსი
ჰლანეჰლი-ლა როშელი

მანსტერი-ტულონი
კლერმონი-რასინგი


* * *

ჩელენჯ კაპის გათამაშების მომდევნო ეტაპზე ქართველ მორაგბეთა სამმა გუნდმა გააღწია. ესენია: "სტად ფრანსე", "კარდიფი" და "ბრივი".
უელსურმა "კარდიფ ბლუზმა", სადაც საქართველოს ნაკრების პირველხაზელი ანტონ ფეიქრიშვილი თამაშობს, პირველობა არავის დაუთმო B ჯგუფში.

კარდიფელებმა ბოლო ტურში სტუმრად დაამარცხეს ფრანგული "ლიონი" 21:18 და 21 ქულით დაასრულეს ასპარეზობა. ფეიქრიშვილს არ უთამაშია.
"კარდიფის" მეტოქე მეოთხედფინალში შოტლანდიური "ედინბურგი" იქნება, რომელმაც D ჯგუფში დაიკავა პირველი ადგილი.

ამავე ჯგუფში, მეორე ადგილზე გავიდა და პლეი ოფის საგზური მიიღო ზურაბ ჟვანიასა და გიორგი მელიქიძის "სტად ფრანსემ", რომელმაც ჯგუფური ეტაპის ბოლო მატჩში, შინ სწორედ "ედინბურგს" აჯობა - 17:10. ჟვანია ძირითად შემადგენლობაში იყო და 48-ე წუთზე შეცვალეს, მელიქიძე თამაშში 69-ე წუთიდან ჩაერთო.

"სტად ფრანსე" მეოთხედფინალში სტუმრად დაუპირისპირდება ფრანგულ "პოს", რომელმაც პირველი ადგილი ჩ ჯგუფში დაიკავა.

E ჯგუფში მეორე ადგილზე გავიდა და პლეი ოფში ითამაშებს, კარლენ ასიეშვილის, სოსო ბეკოშვილისა და ვასილ ლობჟანიძის "ბრივი", რომელმაც შინ დაამარცხა ინგლისური "ვორსტერი" - 33:7.

ასიეშვილი ძირითად შემადგენლობაში იყო და 59-ე წუთზე შეცვალეს, ოთხი წუთით ადრე კი მოედანი ლობჟანიძემ დატოვა, იმავდროულად თამაშში ბეკოშვილი ჩაერთო.

"ბრივის" მეტოქე მეოთხედფინალში ინგლისური "ნიუკასლი" იქნება. მატჩი ინგლისში გაიმართება.

"ჩელენჯ კაპის" ბოლო ტურში თავი გამოიჩინეს რუსულ კლუბებში მოთამაშე ქართველმა მორაგბეებმა. "ენისეიმ" და "კრასნი იარმა" თავიანთი მატჩები თბილისში, "ავჭალის სარაგბო სტადიონზე" გამართეს.

დავით კაჭარავასა და მიხეილ გაჩეჩილაძის "ენისეიმ" ინგლისურ "ნიუკასლთან" 19:33 წააგო. გაჩეჩილაძემ 79-ე წუთზე ლელო გაიტანა. კაჭარავამ სრულად ითამაშა.

ლაშა მალაღურაძის, სოსო მათიაშვილის და გიორგი ფრუიძის "კრასნი იარმა" კი შეხვედრა "ლონდონ აირიშთან" დათმო - 17:24. ფრუიძე მატჩის საუკეთესო მორაგბედ დაასახელეს. მალაღურაძემ, რომელიც 42-ე წუთზე მძიმედ დაშავდა და შეცვალეს, თითო საჯარიმო და გარდასახვა გაიტანა, მათიაშვილი ტრავმირებულია და არ უთამაშია.

ჩელენჯ კაპი
1/4 ფინალი

პო-სტად ფრანსე
ედინბურგი-კარდიფი

ქონოთი-გლოესტერი
ნიუკასლი-ბრივი

ყოველდღიური სპორტული გაზეთი "ლელო"
932
მკითხველის კომენტარები / 0 /
მსგავსი ამბები
რუბრიკის სხვა სიახლეები
;