რაგბი. ევროთასები. რომიც ავიღეთ და პრემიაც - 'ლოკომოტივის' გამარჯვება იტალიაში

ფიამე ორო-ლოკომოტივი 22:29

ფიამე ორო (15-9): ბიონდელი, ჯ.დონოფრიო, კვარტაროლი, (ბუშემა 76), მასარო (ფორკუჩი 67), ბაკეტი, ამბროზინი, მარინარო; (1-8): ძაგო, კუდინ (მორიკონი 57), ნოჩერა, ფრანიტო (უ.დონოფრიო 61), მაკქართი (ფავარო 73), ბიანკი, კრისტიანო, კაფინი
3ლ: კვარტაროლი მარინარო მაკქართი; 2გ, ს: ამბროზინი
სინბინი: კრისტოანო

ლოკომოტივი (15-9): გოგოლაშვილი (ხელაია 33), ძნელაძე, გაგოშვილი, ტალახაძე (გედეხაური 67), კავთიძე, წიკლაური ბეგაძე; (1-8): ვ. ქვათაძე (მაჭარაშვილი 51), ი. ქვათაძე (ჭავჭავაძე 54), ქართველიშვილი (გორგასლიძე 56-79), კოპაძე (ამირანაშვილი 56), არაბული (გეგია 41), გასვიანი, ყველაიძე (დარასელია 54), ზვ. მაისურაძე
4ლ: გასვიანი, დარასელია, გედეხაური, ჭავჭავაძე; 3გ, ს: წიკლაური

მსაჯი: ნ. ქოქსი (ინგლისი)

* პირველი გამარჯვება კონტინენტის ფარზე სტუმრად.
* გამარჯვების ლელო ბოლო წამებზე ლევან ჭავჭავაძემ გაიტანა.

საქართველოს ჩემპიონმა თბილისის "ლოკომოტივმა" კონტინენტის ფარის გათამაშებაში მეორე შეხვედრა გამართა და პირველი გამარჯვება მოიპოვა. რკინიგზელებმა, სტუმრად, რომში "ფიამე ოროსთან" ითამაშეს და 29:22 მოიგეს.

აღსანიშნავია, რომ ჩვენმა გუნდმა მეტოქეს ოთხი ლელო გაუტანა, რის გამოც საპრემიო ქულა დაიმსახურა და საბოლოო წარმატების მიღწევის შანსი გაზარდა. "ლოკომოტივმა" მეტოქეს თავიდანვე თამამად შეუტია და მე-8 წუთზე, მორკინალების რამდენიმე მოკლე დარტყმის შემდეგ, მესამეხაზელმა ფარნავაზ გასვიანმა ლელო გაიტანა. ბექა წიკლაურს, რომელიც იმ დღეს მგეზავად ირჯებოდა, გარდასახვა არ გასჭირვებია - 7:0.

მასპინძლებმა ანგარიშის გაქვითვა მალევე, ხუთ წუთში შეძლეს. ტაიმის მიწურულს კი, საჯარიმოც გაგვიტანეს და სამი ქულით დაწინაურდნენ. რკინიგზელებმა კი, მონაგრის გაზრდა ვერაფრით შეძლეს და პირველი ნახევარი 7:10 წავაგეთ.

შესვენების შემდეგ წიკლაურმა თანაფარდობა მალევე აღადგინა საჯარიმო დარტყმით - 10:10. მერე კი, როცა რიცხობრივი უპირატესობა გვქონდა, შვიდწუთიან მონაკვეთში მეტოქის ორი კონტრშეტევა გამოგვეპარა და ორივე შემთხვევაში ლელოთი დავისაჯეთ, რომელთაგან იტალიელებმა მხოლოდ ერთი გარდასახეს. 56-ე წუთისთვის "ლოკომოტივი" უკვე 12 ქულით აგებდა - 10:22.

რკინიგზელთა სასახელოდ უნდა ითქვას, რომ მატჩის დარჩენილი ოცი წუთი დიდი მონდომებით ჩაატარეს და თამაშის სათავისოდ შემობრუნება შეძლეს. ანგარიშში სხვაობა რკინიგზელებმა 68-ე წუთზე შეამცირეს, როცა მეტოქის ლელოს მისადგომებთან დანიშნული შერკინებიდან შეუტიეს. წარმოქმნილი რაკიდან ბურთი შეცვლაზე შესულ ლევან დარასელიას გაუტანეს, რომელმაც თანაგუნდელების დახმარებით ის ლელოში დაამიწა. წიკლაურმა გარდასახა - 17:22.

ხუთ წუთში რკინიგზელებმა კიდევ ერთი იერიში წამოიწყეს მარჯვენა ფრთაზე. დერეფნის მოგების შემდეგ ჩვენმა მორაგბეებმა რამდენჯერმე სცადეს მიძალებით მეტოქის ხაზის გაჭრა, თუმცა ეს მხოლოდ შუამარბმა გიგა გაგოშვილმა მოახერხა. მისი შეჩერება მასპინძლებმა მაინც შეძლეს. წარმოქმნილი რაკიდან გიორგი ბეგაძემ ბურთი მარცხნივ, გრძელ ფრთაზე წიკლაურს გადააწოდა, რომელმაც მოსხეპით კიდესთან ახლოს კიდევ ერთი შეცვლაზე შესული გარემარბი ლაშა გედეხაური მოძებნა, რომელსაც ლელოს გატანა არ გასჭირვებია. წიკლაურმა ვერ გარდასახა - 22:22.

თამაშის დასრულებამდე დარჩენილ დროში იტალიელებს ორჯერ შეეძლოთ საჯარიმოდან გატანა, მაგრამ ორივეჯერ მიზანმა უმტყუნათ. "ლოკომოტივის" მიერ ბოლო წამებზე დაწყებული იერიში კი, სპრინტერული გარბენითა და ლელოს გატანით პირველხაზელმა ლევან ჭავჭავაძემ დაასრულა - ისიც შეცვლაზე შესულია. წიკლაურმა გარდასახვა გაიტანა და თამაშიც დასრულდა - 29:22.

"ლოკომოტივი" მომავალ უქმეებზე იქვე, იტალიაში ჯგუფის ლიდერ "კალვიზანოს" დაუპირისპირდება. პირველ ადგილზე გასასვლელად ჩვენმა გუნდმა მეტოქე ისე უნდა დაამარცხოს, რომ ან საპრემიო ქულა აართვას, ანაც 11 ქულაზე მეტი სხვაობით მოუგოს. ამით არ დასრულდება. ბოლო თამაში რკინიგზელებს იანვარში "ფიამე ოროსთან" ექნება და ეს გუნდიც საპრემიო ქულით უნდა დაამარცხოს. აღსანიშნავია, რომ მეორე ჯგუფის გამარჯვებულის ვინაობა უკვე ცნობილია. ეს იტალიური "პადოვაა".

A ჯგუფი

სატურნირო მდგომარეობა
1. კალვიზანო - 9 ქულა, 2. ლოკომოტივი - 5, 3. ფიამე ორო - 1

III ტური

15 დეკემბერი
კალვიზანო-ლოკომოტივი

IV ტური

12 იანვარი
ლოკომოტივი-ფიამე ორო

808
მკითხველის კომენტარები / 0 /
მსგავსი ამბები
რუბრიკის სხვა სიახლეები
;