რაგბი. ევროთასები. რუმინეთიდან გაგახარებთ!

საქართველოს ვიცე-ჩემპიონი "ბათუმი" რუმინეთში გაემგზავრა. "კონტინენტის ფარის" პლეი ოფის განმეორებით მატჩში ქართული გუნდი კლუჟში ამ ქვეყნის ჩემპიონს, "ტიმიშოარას" დაუპირისპირდება.

ბათუმელებმა პირველი მატჩი შინ ხუთი ქულის სხვაობით დათმეს - 6:11. სამწუხაროდ, ტრავმა ვერ მოიშუშა და ისევ ვერ ითამაშებს შუამარბი ბექა ურჯუკაშვილი. სამაგიეროდ, ისევ მწყობრში ჩადგა პირველხაზელი ტარიელ დონაძე.

"ექიმებმა კარგად იმუშავეს და ტარიელ დონაძე უმოკლეს დროში ფეხზე დააყენეს. ტრავმა მოიშუშა და ითამაშებს ალექსი ტუჩაშვილიც. ბევრად უკეთ გრძნობს თავს ბექა მამრიკიშვილი და რუმინეთში სასტარტოში იქნება.

ვიდეო-ანალიზის შემდეგ სამი დღე ჩვენი შეცდომების გამოსწორებას დავუთმეთ. ვფიქრობთ, რომ კარგ ფორმაში ვართ და რუმინეთიდან რაგბის ქართველ ქომაგს გავახარებთ" - თქვა რაგბის კავშირის საიტთან საუბრისას "ბათუმის" მთავარმა მწვრთნელმა დავით გუგუშვილმა.

ხუთ ქულაზე მეტი სხვაობით გამარჯვების შემთხვევაში "ბათუმი" კონტინენტის ფარის ორრაუნდიან ნახევარფინალში გერმანული "ჰაიდელბერგისა" და იტალიური "კალვიზანოს" წყვილს შორის გამარჯვებულს შეხვდება. პირველი მატჩი შინ გერმანელებმა ასევე ხუთი ქულით 34:29 მოიგეს.

ბათუმი: 15. ბახვა კობახიძე, 14. ნიკა ნინიძე, 13. დავით ტრაპაიძე, 12. გიორგი გოგიტიძე, 11. ალექსანდრე ტუჩაშვილი, 10. ლაშა ხმალაძე, 9. ზურაბ თუთბერიძე;

1. ზურაბ ერისთავი, 2. ბექა მამრიკიშვილი, 3. ტარიელ დონაძე, 4. არჩილ ალიქაძე, 5. სანდრო ქოიავა, 6. ვანო ფუტკარაძე, 7. გიორგი თხილაიშვილი, 8. ხვიჩა ბუჯიაშვილი;

მარქაფა: 16. გიორგი თედორაძე, 17. ირაკლი კვანტიძე, 18. შოთა გოგისვანიძე, 19. ამირან მიქაძე, 20. ჯონდი კორტავა, 21. დურმიშხან ჯაბნიძე, 22. მანუჩარ გრიგოლია, 23. ნუკრი ფერსელიძე.

ყოველდღიური სპორტული გაზეთი "ლელო"
955
მკითხველის კომენტარები / 0 /
მსგავსი ამბები
რუბრიკის სხვა სიახლეები