რაგბი. ევროთასი: ქართველთა ორი გუნდი დაუმარცხებელია

ევროთასების გათამაშება მესამე ტურის შეხვედრებით განახლდა. ყველაზე პრესტიჟულ ტურნირზე, ჩემპიონთა თასზე, სამი ტურის შემდეგ ქართველ მორაგბეთა გუნდებიდან დაუმარცხებლად ლიდერობენ თავიანთ ჯგუფებში "ლა როშელი" და "ტულონი". დანარჩენი სამი, "მეტრო რასინგი", "კლერმონი" და "მონპელიე" კი ჯერაც ინარჩუნებენ პლეი ოფში გასვლის შანსს.

ჩემპიონთა თასი

A ჯგუფში მოასპარეზე ლექსო ყაულაშვილის "ლა როშელმა" დაამტკიცა, რომ ის არა მარტო ჯგუფის, არამედ, ტურნირის ფავორიტია. ჩვენებურის ამ გუნდმა სამი თამაშიდან სამივე მოიგო და სამივეში საპრემიო ქულების მოპოვება შეძლო.

მესამე ტურში ლაროშელელებმა შინ დაამარცხეს უშუალო კონკურენტი, ინგლისური "ვოსფსი" - 49:29. სამწუხაროდ, ყაულაშვილს ტრავმა აქვს და დიდი ხანია, არ თამაშობს.

აღსანიშნავია, რომ "ლა როშელის" ერთ-ერთი მწვრთნელი ყოფილი "ბორჯღალოსანი" აქვსენტი გიორგაძეა. ყოველდღიური სარაგბო გაზეთის, "მიდი ოლიმპიკის" ინფორმაციით, "ლა როშელის" ხელმძღვანელობა იმდენად კმაყოფილია მწვრთნელთა შტაბის მუშაობით, რომ ყველა მის წევრთან კონტრაქტი ოთხი წლით გაახანგრძლივა.

B ჯგუფში დავით ზირაქაშვილის, ვიქტორ კოლელიშვილის, ბექა კაკაბაძისა და ოთარ გიორგაძის "კლერმონის" მატჩი სტუმრად ინგლისურ "სარასენზთან" დიდთოვლობის გამო ერთი დღით გადაიდო. ამან, ცხადია, "ვულკანებს" დისკომფორტი შეუქმნა. ქართველთაგან განაცხადში მხოლოდ კაკაბაძე იყო.

C ჯგუფში  მოასპარეზე მიხეილ ნარიაშვილის, კონსტანტინე მიქაუტაძისა და დავით ქუბრიაშვილის "მონპელიემ" პირველი გამარჯვება მოიპოვა. ჩვენებურთა ამ გუნდმა უმძიმესი მატჩი გადაიტანა სტუმრად შოტლანდიურ "გლაზგო ვორიორზთან" და 29:22 დაამარცხა.

ნარიაშვილმა თავიდან ბოლომდე ითამაშა, მიქაუტაძე თამაშში 74-ე წუთიდან ჩაერთო, ქუბრიაშვილი განაცხადში არ იყო.
ამ ჯგუფში ლიდერი ირლანდიური "ლენსტერია", რომელსაც პირველი ადგილი უდანაკარგოდ უჭირავს.

ვასილ კაკოვინის "მეტრო რასინგმა"  D ჯგუფში მეორე მატჩი წააგო. პარიზელები, ამჯერად, სტუმრად ვერას გახდნენ "კასტრთან" - 13:16. კაკოვინი თამაშში 66-ე წუთიდან ჩაერთო. ამ გუნდების შეხვედრა მომდევნო უქმეებზე პარიზში გაიმართება და "მეტრო რასინგს" რევანშის აღება ჰმართებს. წინააღმდეგ შემთხვევაში, უშანსოდ დარჩება. ლიდერი აქ ირლანდიური "მანსტერია", რომელმაც შინ შეძლო ინგლისური "ლესტერის" დამარცხება - 33:10.

E ჯგუფში, მართალია ძნელად, მაგრამ მაინც იგებს მამუკა გორგოძის, ლევან ჩილაჩავასა და ბადრი ალხაზაშვილის "ტულონი". მესამე შეხვედრა ტულონელებმა შინ მოიგეს ინგლისურ "ბასთან" - 24:20. შედეგად ჩვენებურთა ამ გუნდს 12 ქულა დაუგროვდა და ჯგუფში ლიდერია. ჩილაჩავა ძირითად შემადგენლობაში იყო და 30-ე წუთზე შეცვალეს. გორგოძე და ალხაზაშვილი განაცხადში არ იყვნენ.

ჩემპიონთა თასი

A ჯგუფი

ჰარლიქვინზი-ალსტერი 5:17, ლა როშელი-ვოსფსი 49:29
სატურნირო მდგომარეობა
1. ლა როშელი - 15 ქულა, 2. ალსტერი - 8, 3. ვოსფსი - 6, 4. ჰარლიქვინზი - 1

IV ტური

ალსტერი-ჰარლიქვინზი, ვოსფსი-ლა როშელი

B ჯგუფი

ნორსჰემპთონი-ოსფრიზი 32:43, სარასენზი-კლერმონი 14:46.
სატურნირო მდგომარეობა

1. კლერონი - 14, 2. სარასენზი - 10 ქულა, 3. ოსფრიზი - 8, 4. ნორსჰემპთონი - 1

IV ტური

ოსფრიზი-ნორსჰემპთონი, კლერმონი-სარასენზი

C ჯგუფი

გლაზგო-მონპელიე 22:29, ექსეტერი-ლენსტერი 8:18
სატურნირო მდგომარეობა
1. ლენსტერი - 14 ქულა, 2. ექსეტერი - 8, 3. მონპელიე - 8, 4. გლაზგო - 1.

IV ტური

მონპელიე-გლაზგო, ლენსტერი-ექსეტერი

D ჯგუფი

კასტრი-მეტრო რასინგი 16:13, მანსტერი-ლესტერი 33:10
სატურნირო მდგომარეობა
1. მანსტერი - 11 ქულა, 2. კასტრი - 7, 3. ლესეტერი - 6, 4. მეტრო რასინგი - 6.

IV ტური

მეტრო რასინგი-კასტრი, ლესტერი-მანსტერი

E ჯგუფი

ჰლანეჰლი-ბენეტონი 33:28, ტულონი-ბასი 24:20
სატურნირო მდგომარეობა
1. ტულონი - 12 ქულა, 2. ბასი - 9, 3. ჰლანეჰლი - 7, 4. ბენეტონი - 4

IV ტური

ბენეტონი-ჰლანეჰლი, ბასი-ტულონი

ჩელენჯ კაპის გათამაშებაში ქართველ მორაგბეთა გუნდები ლიდერები არ არიან. თუმცა, რუსული გუნდების გარდა, მომდევნო ეტაპზე გასვლის შანსს ყველა ინარჩუნებს.

A ჯგუფში დავით კაჭარავასა და მიხეილ გაჩეჩილაძის "ენისეიმ" სტუმრად, უელსურ "ნიუპორტს" დიდი ბრძოლა გაუმართა, თუმცა მშრალი ანგარიშით დამარცხდა 0:15. კაჭარავამ სრულად ითამაშა, გაჩეჩილაძე 62-ე წუთზე შეცვალეს.

B ჯგუფში პირველი მარცხი იგემა და ლიდერობა დაკარგა ანტონ ფეიქრიშვილის "კარდიფ ბლუზმა". უელსურმა კლუბმა სტუმრად წააგო ინგლისურ "სეილ შარქსთან" - 0:24. ფეიქრიშვილი ძირითად შემადგენლობაში იყო და 52-ე წუთზე შეცვალეს.

C ჯგუფში ცუდად ასპარეზობს თამაზ მჭედლიძის, გიორგი თეთრაშვილისა და ვახტანგ ახობაძის "აჟენი". ჩვენებურთა გუნდმა შინ წააგო "პოსთან" - 21:40. თეთრაშვილი ძირითად შემადგენლობაში იყო და 55-ე წუთზე შეცვალეს, ახობაძემ ცხრა წუთით მეტი ითამაშა. მჭედლიძე განაცხადში არ იყო.

D ჯგუფში თავი გამოიჩინეს "კრასნი იარის" ქართველებმა. თუმცა, კრასნოიარსკული გუნდი მაინც დამარცხდა სტუმრად ზურაბ ჟვანიასა და გიორგი მელიქიძის "სტად ფრანსესთან" - 24:39.

ლაშა მალაღურაძემ "იარის" შემადგენლობაში შუამარბის პოზიციაზე სრულად ითამაშა და 14 ქულა მოუტანა (სამი საჯარიმო, ერთი გარდასახვა და ამდენივე არეკნი). გარემარბმა გიორგი ფრუიძემ კი, რომელმაც ასევე თავიდან ბოლომდე ითამაშა, 46-ე წუთზე ლელო გაიტანა.

მიხეილ წიკლაური თამაშში 75-ე წუთიდან ჩაერთო. თადარიგში იყო მელიქიძეც, რომელიც მოედანზე 67-ე წუთიდან გამოჩნდა, ჟვანიას არ უთამაშია.
ამავე ჯგუფში, ლაშა ლომიძის "ლონდონ აირიში" სტუმრად დამარცხდა შოტლანდიურ "ედინბურგთან" - 20:50. ლომიძე ძირითად შემადგენლობაში იყო 47-ე წუთზე შეცვალეს.

E ჯგუფში ზედიზედ მეორედ წააგო კარლენ ასიეშვილის, სოსო ბეკოშვილისა და ვასილ ლობჟანიძის "ბრივმა". ჩვენებურთა გუნდი ამჯერად შინ დამარცხდა ირლანდიურ "ქონოთთან" - 31:38. ქართველებს არ უთამაშიათ.

ჩელენჯ კაპი

A ჯგუფი

ნიუპორტი-ენისეი 15:0, ნიუკასლი-ბორდო 52:24
სატურნირო მდგომარეობა
1. ნიუკასლი - 14 ქულა, 2. ნიუპორტი - 10, 3. ბორდო - 6, 4. ენისეი - 1

IV ტური
ნიუპორტი-ნიუკასლი, ბორდო-ენისეი

B ჯგუფი

ტულუზი-ლიონი 30:23, სეილ შარქსი-კარდიფ ბლუზი 24:0
სატურნირო მდგომარეობა
1. ტულუზი - 9 ქულა, 2. კარდიფი - 9, 3. სეილ შარქსი - 7, 4. ლიონი - 3.

IV ტური

კარდიფ ბლუზი-სეილ შარქსი, ლიონი-ტულუზი

C ჯგუფი

აჟენი-პო 21:40, ზებრე-გლოსტერი 26:33
სატურნირო მდგომარეობა
1. პო - 14 ქულა, 2. გლოსტერი - 11, 3. აჟენი - 5, 4. ზებრე - 3.

IV ტური
პო-აჟენი, გლოსტერი-ზებრე

D ჯგუფი

სტად ფრანსე-კრასნი იარი 39:24, ედინბურგი-ლონდონ აირიში 50:20
სატურნირო მდგომარეობა
1. ედინბურგი - 15 ქულა, 2. სტად ფრანსე - 7, 3. ლონდონ აირიში - 5, 4. კრასნი იარი - 5.

IV ტური

ედინბურგი-კრასნი იარი, ლონდონ აირიში-სტად ფრანსე

E ჯგუფი

ვორსტერი-ოიონაქსი 35:14, ბრივი-ქონოთი 31:38

სატურნირო მდგომარეობა

1. ქონოთი - 14 ქულა, 2. ვორსტერი - 11, 3. ბრივი - 7, 4. ოიონაქსი - 0.

IV ტური

ოიონაქსი-ვორსტერი, ქონოთი-ბრივი

ყოველდღიური სპორტული გაზეთი "ლელო"
990
მკითხველის კომენტარები / 0 /
მსგავსი ამბები
რუბრიკის სხვა სიახლეები
;