რაგბი ევროპის ჩემპიონატი. თემიდას მსახურთა ნაწილი ცნობილია, 9-ში რუმინეთში

საქართველოს ეროვნული ნაკრებისთვის სეზონი რაგბი ევროპის ჩემპიონატის გათამაშებაში 9 თებერვალს დაიწყება.

„ბორჯღალოსნები“ პირველ მატჩს ამ ტურნირზე სტუმრად, კლუჟში გამართავენ რუმინეთის ეროვნულ გუნდთან. ცნობილია ამ მატჩის მსაჯთა ბრიგადაც. შეხვედრას ირლანდიელი არბიტრები მოემსახურებიან. მთავარი მსაჯი შონ გალაჰერია. საინტერესოა, რომ მისი ერთ-ერთი ასისტენტი ქართული რაგბის ქომაგებისთვის კარგად ცნობილი ჯორჯ კლენსია, მეორე ასისტენტი კი, მარკ პეიტონი იქნება.

მეორე ტურში საქართველოს ნაკრები 17 თებერვალს თბილისში ესპანეთის ნაკრებს დაუპირისპირდება. მატჩი სავარაუდოდ ვაკის სტადიონზე გაიმართება. არბიტრი კი ინგლისელი კრისტოფ რიდლი იქნება. ასისტენტების ვინაობა ჯერ ცნობილი არაა.

ბელგიის ნაკრებს ბრიუსელში 2 მარტს დავუპირისპირდებით. ამ მატჩს შოტლანდიელ არბიტრთა ბრიგადა მოემსახურება. მთავარი მსაჯი ბენ ბლეინი იქნება. მას მაიკ ტოდი და ალისტერ ვეითი დაეხმარებიან.

ერთი კვირის თავზე „ბორჯღალოსნები“ შინ, ქუთაისში უმასპინძლებენ გერმანიის ეროვნულ გუნდს. ამ მატჩის მსაჯთა ვინაობა ჯერ ცნობილი არაა.
ასევე არ არის ცნობილი 17 მარტს რუსეთისა და საქართველოს ნაკრებების დაპირისპირების ადგილი და არბიტრთა ვინაობა. რუსები მეორე ტურში ბელგიის ნაკრებს სოჭში მასპინძლობენ. სულ კი, შინ ორჯერ თამაშობენ. მეორედ სწორედ „ბორჯღალოსნებს“ ხვდებიან და, არ არის გამორიცხული, პირველად ისტორიაში, ეს მოსკოვში მოხდეს.

აქამდე რუსებთან გასვლით შეხვედრებში კრანსოდარში, სოჭში, მარიუპოლსა (ნეიტრალურზე) და კრასნოიარსკში გვიასპარეზია.

ყოველდღიური სპორტული გაზეთი "ლელო"
1345
მკითხველის კომენტარები / 0 /
მსგავსი ამბები
რუბრიკის სხვა სიახლეები
;