[რაგბი ევროპის ჩემპიონატი] პორტუგალიასთან ორი დებიუტანტით

რაგბი ევროპის ჩემპიონატის მეოთხე ტურში პორტუგალიასთან გასამართ მატჩში, „ბორჯღალოსანთა“ რიგებს კიდევ ორი მორაგბე შეემატება.

საქართველოს ნაკრების მთავარმა მწვრთნელმა ლევან მაისაშვილმა, პარიზში, „სტად ჟან-ბუენზე“  გასამართი მატჩისთვის 23-კაციანი შემადგენლობა დაასახელა. ამათგან ორი დებიუტანტია:

სათადარიგოთა შორის იქნებიან მესამეხაზელი თორნიკე ჯალაღინია (ბიარიცი) და შუამარბი ლაშა ლომიძე (აია).

ორი კვირის წინ ბელგიასთან 78:6 მოგებული მატჩის შემდეგ, მთავარმა მწვრთნელმა სასტარტო შემადგენლობაში ერთბაშად რამდენიმე მორაგბე შეცვალა.

სრულადაა განახლებული შერკინების პირველი ხაზი და თამაშს გიორგი თეთრაშვილი, შალვა მამუკაშვილი და ლევან ჩილაჩავა იწყებენ. თეთრაშვილი 2018 წლის შემდეგ პირველადაა ძირითადში. მან ბელგიასთან შეცვლაზე ითამაშა.

მესამე ხაზში ადგილი შეინარჩუნა გუნდის კაპიტანმა ბექა გორგაძემ, ასევე ფლანკერმა გიორგი თხილაიშვილმა. მეორე ფლანკერი ბექა საღინაძე იქნება, რომელიც ძირითადში ბრუნდება.

შეცვლილია ღერძი და 9 ნომრის პოზიციაზე თამაშს გიორგი ბეგაძე, ხოლო მგეზავად ლაშა ხმალაძე იწყებს. ბეგაძე წელს სასტარტო შემადგენლობაში პირველადაა. ორი კვირის წინ მან ბელგიასთან მეორე ტაიმში ითამაშა და პირველი სანაკრებო ლელო გაიტანა. ხმალაძემ მგეზავად თამაში ბოლოს 2019 წლის მსოფლიო თასზე, ავსტრალიის ნაკრებთან დაიწყო.

ცენტრში გამოცდილი მორაგბეები - ლაშა მალაღურაძე და დავით კაჭარავა შეწყვილდებიან. მალაღურაძესთვის ეს 99-ე კეპი იქნება და თუ რაგბი ევროპის ჩემპიონატის დასკვნით ტურში რუსეთის წინააღმდეგაც ითამაშა, მეოთხე ქართველი ცენტურიონი გახდება, ხოლო კაჭარავა საფრანგეთში 122-ე კეპს მოიხვეჭს.

ფრთებზე გამოცდილ ალექსანდრე თოდუას და ახალბედა დემე თაფლაძეს ვიხილავთ. 20-წლამდელთა კაპიტან თაფლაძეს, ეროვნულ გუნდში დებიუტი ორი კვირის წინ ბელგიასთან ჰქონდა და მაშინ ცენტრში ითამაშა, ახლა კი ფრთაზე გადაინაცვლა. ფულბეკი წინა შეხვედრის მსგავსად სოსო მათიაშვილია.

დამწყებთა შორის ადგილი შეინარჩუნა მეორეხაზელმა ლაშა ჯაიანმა, რომელსაც „ბორჯღალოსნებში“ დებიუტი ორი კვირის წინ, ბელგიასთან ჰქონდა. მას დავით გიგაური შეუწყვილდება, რომელიც ესპანეთთან და ბელგიასთან მარქაფაში იყო, ახლა კი სასტარტო შემადგენლობაშია.

თამაში შაბათს თბილისის დროით 19 საათზე დაიწყება.

2517
მკითხველის კომენტარები / 0 /
მსგავსი ამბები
რუბრიკის სხვა სიახლეები
;