[რაგბი] ევროპული შვიდკაცა 12 წლის შემდეგ საქართველოში ბრუნდება

2020 წლის ივნისში საქართველო, კერძოდ ქუთაისი, შვიდკაცა რაგბის კაცთა და ქალთა ნაკრებებს შორის ევროპის გრან პრის ეტაპებს უმასპინძლებს.

2013 წლამდე ტურნირს ევროპის შვიდკაცას ჩემპიონატი ეწოდებოდა, ახლა კი ის სამ დონედ იმართება - ევროპის გრან-პრი, ალაფა და კონფერენც დივიზიონი. 2011 წლამდე, მთელი ევროპის მასშტაბით რამდენიმე შესარჩევი ტურნირი ტარდებოდა და 12 საუკეთესო ნაკრები გამარჯვებულს დასკვნით ეტაპზე არკვევდა. მას შემდეგ უმაღლეს დონეზე (გრან პრიზე) ოთხი ეტაპი იმართება, სადაც 12 გუნდი, თითოეულ ეტაპზე დაკავებული ადგილების მიხედვით ქულებს იღებს და გამარჯვებული, სხვადასხვა ადგილოსნები და „ალაფაზე“ დაქვეითებული გუნდები, მათი ჯამის მიხედვით ვლინდება.

ორ ეტაპად იმართება შვიდკაცა გრან პრი ქალთა ნაკრებებს შორის და გამარჯვებული აქაც ქულათა ჯამით ირკვევა.

2008 წლის ჩათვლით, ევროპის შვიდკაცა ჩემპიონატის ერთ ეტაპს საქართველო მასპინძლობდა.

და აი, 12 წლის შემდეგ ევროპული შვიდკაცა, უკვე გრან პრის ერთ-ერთი ეტაპის სახით, ჩვენს ქვეყანაში ბრუნდება, თანაც როგორც კაცთა, ასევე ქალთა ტურნირის სახით და მათ ქუთაისის „აია არენა“ 13-14 ივნისს უმასპინძლებს.

საქართველოს რაგბის კავშირის პრეზიდენტი გოჩა სვანიძე გრან პრის ეტაპების მასპინძლობის უფლების მოპოვებას, როგორც სპორტული, ასევე ტურისტული თვალსაზრისით, უმნიშვნელოვანესს უწოდებს საქართველოს რაგბის კავშირის პრეზიდენტი გოჩა სვანიძე:

„მინდა მივულოცო ქართული რაგბის ყველა გულშემატკივარს და განსაკუთრებით ქუთაისელებს ამ უმნიშვნელოვანესი ტურნირების მასპინძლობის უფლების მოპოვება. ქვეყნისთვის, მისი ტურისტული პოტენციალის ამაღლებისთვის, ეს ძალიან კარგია. ქუთაისის აეროპორტიდან იაფი და პირდაპირი ფრენები ხორციელდება ევროპის არაერთ ქალაქში. ტურნირზე ჩამოსული სპორტსმენები და გულშემატკივრები არა მხოლოდ ქუთაისს, არამედ მარტვილისა და ოკაცეს კანიონებს დაათვალიერებენ, გაეცნობიან წყალტუბოს პოტენციალს, რომელიც სპორტსმენებისთვის განსაკუთრებით საინტერესო იქნება.

რაც შეეხება სპორტულ მხარეს, როგორც კაცებში, ასევე ქალებში, საქართველოში ძალიან კარგი ნაკრებები ჩამოდიან და ეს შვიდკაცას პოპულარიზაციას შეუწყობს ხელს. მართალია ჩვენი 7-კაცა რაგბისნაკრები 2020 წლის ზაფხულის ოლიმპიურ თამაშებზე ვერ მოხვდა, მაგრამ სამომავლოდ იმედს არ ვკარგავთ და ჩამოვაყალიბებთ ისეთ გუნდს, რომელიც მიზნის მიღწევას აუცილებლად მოახერხებს.

ასევე მნიშვნელოვანია, რომ მაქსიმალურად დავეხმაროთ ქალთა რაგბის განვითარებას, ასეთი მაღალი დონის ტურნირების მასპინძლობა კი ამაში აუცილებლად დაგვეხმარება“.

site.rugby.ge

282
მკითხველის კომენტარები / 0 /
მსგავსი ამბები
რუბრიკის სხვა სიახლეები
;