რაგბი. ეროვნული. ბელგია სამხიარულოდ მოდის

საქართველოს ნაკრებმა გუშინ, "შევარდენის სანაკრებო ბაზაზე" ღია ვარჯიში გამართა და ქუთაისისკენ აიღო გეზი, სადაც "რაგბი ევროპის ჩემპიონატის" პირველი ტურის მატჩში ბელგიის ნაკრებს დაუპირისპირდება.

"ბორჯღალოსნების" ახალზელანდიელმა მწვრთნელმა მილტონ ჰეიგმა ბელგიელებთან მატჩისთვის საბრძოლო რაზმი დაასახელა. ჩვენი ეროვნული გუნდი საგრძნობლად გადახალისებულია.

მოედანზე 11 ისეთი ბორჯღალოსანი გავა, რომელთაც 10-ზე ნაკლები სანაკრებო კეპი აქვთ. მათგან ორი დებიუტანტია - მიხეილ გაჩეჩილაძე (ენისეი) და გურამ შენგელია (ჯიქი). ისინი სათადარიგოთა შორის არიან.

ძირითად შემადგენლობაში პირველად ითამაშებს ცხრა ნომერი გელა აფრასიძე (მონპელიე), რომელიც აქამდე სათადარიგოთა სკამიდან ერთვებოდა ბრძოლაში. მგეზავად ასევე შედარებით გამოუცდელი რეზო ჯინჭველაშვილი (არმაზი) ითამაშებს.

ერთწლიანი შესვენების შემდეგ ნაკრებში ბრუნდება გარემარბი გიორგი ფრუიძე (კრასნი იარი). ფულბეკის პოზიციას ბექა წიკლაური (ლოკომოტივი) დაიკავებს, რომელმაც ძირითად შემადგენლობაში ბოლოს ორი წლის წინათ, გერმანიის წინააღმდეგ ითამაშა.

"2013 წელს ბელგიასთან ბრიუსელში რთული თამაში გვქონდა. ახლა ვფიქრობთ, რომ ასე არ იქნება. ფიზიკურად კარგად ვართ მომზადებულები, შერკინებაში დიდი ბიჭები გვყავს და ამ უპირატესობას კარგად გამოვიყენებთ. ტრავმის გამო მერაბ შარიქაძეს ვასვენებთ, თუმცა ეს პრობლემას არ შეგვიქმნის.

"ბორჯღალოსნებს" პირველად უკაპიტნებს გიორგი ნემსაძე, რომელსაც უდიდესი გამოცდილება აქვს და ამ გამოცდილებას კარგად გამოიყენებს. რაც საქართველოს ნაკრების მწვრთნელი ვარ, პირველად ვითამაშებთ ქუთაისში, საიდანაც ნაკრებში ძალიან ბევრი მოთამაშე გვყავს.

ვფიქრობ, გულშემატკივრისგან დიდი მხარდაჭერა გვექნება" - თქვა საქართველოს ნაკრების მთავარმა მწვრთნელმა მილტონ ჰეიგმა.

"ბორჯღალოსნებს" პირველად უკაპიტნებს "ბრისტოლის" მეორეხაზელი, ქუთაისური რაგბის აღზრდილი გიორგი ნემსაძე:

"მნიშვნელოვანია, რომ სანაკრებო რაგბი რეგიონებში გავიტანოთ. ამჯერად ქუთაისში ვთამაშობთ, მომავალში ბათუმში და სხვა ქალაქებშიც უნდა ვითამაშოთ.
ბელგია ყოველთვის ცდილობს ხელდახელ ითამაშოს.

ვეცდებით, მათ ჩვენი სტილი მოვახვიოთ და ტოლს არც გახსნილ თამაშში დავუდებთ. ფავორიტები ვართ, თუმცა მაქსიმალური მობილიზებით ვემზადებით და ვეცდებით ის შედეგი დავაფიქსიროთ, რასაც ჩვენგან მაყურებელი ელის.

ნაკრებს პირველად ვუკაპიტნებ. ეს დიდი პასუხისმგებლობაა, განსაკუთრებით ისეთი ავტორიტეტული მოთამაშეების შემდეგ, როგორებიც მამუკა გორგოძე და მერაბ შარიქაძე არიან. ბიჭებს ვთხოვე, რომ ყველანაირად დამეხმარონ და ყველანი ერთად ვიყოთ კაპიტნები" - თქვა მან.

ძირითად შემადგენლობაში პირველად ითამაშებს შუამარბი გიორგი კვესელაძეც (არმაზი), რომელიც ამ მატჩში მესამე კეპს მოიხვეჭს.

"ნაყოფიერი საწვრთნელი შეკრება გვქონდა და მომავალ თამაშს დიდი იმედებით ვხვდებით. გავაანალიზეთ ბელგიის ნაკრების ძლიერი და სუსტი მხარეები და კარგი თამაშის მოლოდინში ვართ. გულშემატკივრის თანადგომა ძალიან ბევრს ნიშნავს. მოვუწოდებ ქუთაისელ მაყურებელს, რომ მოვიდნენ სტადიონზე და ერთად მოვიგოთ ეს თამაში" - თქვა გიორგი კვესელაძემ.

* * *

ყველა კომენტარიდან და "ბორჯღალოსანთა" საქმისადმი დამოკიდებულებიდან ჩანს, რომ ჩვენი გუნდი მატჩისთვის სერიოზულად ემზადება. ბელგიელები კი, ქუთაისში გასართობად ჩამოდიან.

აი, რა უთხრა "შავი ეშმაკების" მთავარმა მწვრთნელმა გიომ აჟაკმა ბელგიურ სპორტულ ვებგვერდ sportkipik.be-ს.

"საქართველოს ნაკრების ადგილი რაგბი ევროპის ჩემპიონატში არ არის. მას უნდა მისცენ შესაძლებლობა, ექვსი ერის გათამაშებაში იასპარეზოს, რაზეც ნათლად მიუთითებს ნოემბრის ტესტებზე ქართველების მიერ ნაჩვენები შედეგები.

ჩვენთან შედარებით საქართველოს ნაკრები უზარმაზარი მონსტრია. ჩვენ საქართველოში სამხიარულოდ მივდივართ, გვინდა სულიერი სიმშვიდე მოვიპოვოთ. გუნდი, შესაბამისად, საკმაოდ ახალგაზრდულია.

ერთადერთი, რაც მაშინებს, ისაა, რომ საქართველოს ნაკრების მთავარმა მწვრთნელმა ყველა პროფესიონალი ქართველი მორაგბე გამოიძახა. კრივის ენით რომ ვთქვათ, ეს იქნება საშუალოწონოსანი მოკრივის ბრძოლა მძიმეწონოსანთან. მოკლედ, რაც უნდა მოხდეს, ჩვენი ნაკრების მორაგბეებისთვის ეს უდიდესი გამოცდილება იქნება." - დასძინა მან.

10 თებერვალი: საქართველო-ბელგია 14:00

საქართველო: 15. ბექა წიკლაური, 14. გიორგი ფრუიძე, 13. დავით კაჭარავა, 12. გიორგი კვესელაძე, 11. ალექსანდრე თოდუა, 10. რეზო ჯინჭველაშვილი, 9. გელა აფრასიძე;

1. ზურაბ ჟვანია, 2. შალვა მამუკაშვილი, 3. ლევან ჩილაჩავა, 4. გიორგი ნემსაძე, 5. ნოდარ ჭეიშვილი, 6. ოთარ გიორგაძე, 7. გიორგი თხილაიშვილი, 8. ბექა ლომიძე.

სათ: 16. გიორგი ჭყოიძე, 17. თორნიკე მატარაძე, 18. გიორგი მელიქიძე, 19. მიხეილ გაჩეჩილაძე, 20. გურამ შენგელია, 21. ვასილ ლობჟანიძე, 22. ლაშა მალაღურაძე, 23. ანზორ სიჭინავა.

რუსეთი-ესპანეთი 16:00
რუმინეთი-გერმანია 18:00

ყოველდღიური სპორტული გაზეთი "ლელო"
761
მკითხველის კომენტარები / 0 /
მსგავსი ამბები
რუბრიკის სხვა სიახლეები