ბორჯღალოსნები. 10 ნოემბერს ფლორენციაში: რა ბზიკმა გიკბინა ო'ში?

10 ნოემბერს საქართველოს ნაკრები მნიშვნელოვან მატჩს გამართავს ფლორენციაში.

"ბორჯღალოსნები" "არტემიო ფრანკიზე" იტალიის ნაკრებს ეთამაშებიან. ამ მატჩისა და საქართველოს ნაკრების ექვსი ერის გათამაშებაში დამატებაზე დიდი ხანია, აღარაფერი თქმულა და დაწერილა. ამიტომ, ძნელი სათქმელია, რა "ბზიკმა უკბინა" იტალიელთა ირლანდიელ თავკაცს, კონორ ო'შის.

სარაგბო ვებგვერდმა, rugbypass.com-მა გამოაქვეყნა სტატია, სადაც "სკუადრა აძურას" თავკაცი საკმაოდ უკმეხად ახსენებს საქართველოს ნაკრებს. გთავაზობთ ამონარიდს ამ პუბლიკაციიდან:

"ეჭვს გარეშეა, რომ იტალიისა და საქართველოს ნაკრებების ნოემბრის ტესტებზე გასამართავი მატჩის მოახლოებასთან ერთად, კვლავ წამოიჭრება ექვსი ერის ფორმატში ცვლილებების თემა.

2000 წლიდან მოყოლებული, რაც ხუთ ერში იტალია მიიღეს, ამ ქვეყნის ნაკრებმა 13-ჯერ "ხის კოვზი" (ბოლო ადგილზე გავიდა ისე, რომ ყველა მატჩი წააგო) დაიმსახურა. იტალიელთა ირლანდიელი თავკაცი კონორ ოში გაბრაზებულია, რადგან იტალიურ რაგბის ხშირად კლიშეებით აფასებენ, ეს კი, მისი აზრით,

არასწორია.
იტალიური რაგბი წინ მიდის, ამის დასტურია ნაკრების ივნისის ტესტები, "ბენეტონისა" და "ზებრეს" უკეთესი ასპარეზობა კელტთა ლიგაში, იტალიის ასაკობრივი გუნდების წარმატებული გამოსვლები. ახლა იტალიელებს ნოემბრის ტესტები ელით: 3-ში ირლანდიასთან ჩიკაგოში, 10-ში საქართველოსთან შინ, 17-ში პადოვაში ავსტრალიასთან და 24-ში რომში ახალი ზელანდიის ნაკრებთან.

ო"შის კარგად ესმის, რომ მიუხედავად იმისა, რომ ჯერ მთავარი მატჩი ირლანდიასთანაა, საქართველოსთან მომავალი დაპირისპირება ბევრ დებატს შეუწყობს ხელს:

"იტალია დამსახურებულად თამაშობს ექვს ერში. ხალხი ამბობს, რომ ჩვენ ამ ტურნირზე მუდმივად იოლად მოგვიგებენ. ჩვენ ამ სტერეოტიპს მხოლოდ უკეთესი თამაშით თუ შევცვლით. იაპონიაში გამარჯვება ყველას უჭირს, ჩვენ კი ეს შევძელით ივნისში. ამ დროს არავის "შეუმჩნევია", რომ ერთი კვირის თავზე იქვე საქართველოს ნაკრები 0:28 დამარცხდა.

ხალხი სტერეოტიპების ტყვეა, მათ შეუძლიათ ხშირად იმეორონ, რომ ჩვენი ნაკრები უფრო სტანდარტული სიტუაციებიდან აღწევს მიზანს, რომ ჩვენ მე-60 წუთის მერე ვეღარ ვთამაშობთ და ათასი სხვა სისულელე.

პირადად პოზიტიურად ვარ განწყობილი, რადგან კარგი მორაგბეები გვყავს და ჩვენს გუნდს შეუძლია ბევრი ლელოს გატანა. ჩვენ მოვუმატეთ ფიზიკურ მზადებაში და ამბიციურები ვართ. ჩვენი პროგრესი აშკარაა. გასულ წელს იტალიის 17-წლამდელთა ნაკრებმა მოუგო საფრანგეთს, 18-წლამდელთა გუნდმა კი - ინგლისს, 20-წლამდელთა მსოფლიოს ჩემპიონატზე მოწინავე 8 ნაკრებში მოვხვდით.

იტალიელი მორაგბეები იგებენ თამაშებს და მათ აქვთ ამბიცია, რომ ყველაფერი შეიცვლება. ნაკრები უფრო და უფრო კონკურენტუნარიანი ხდება. ჩვენ წავაგეთ იაპონიასთან პირველი ტესტი, მაგრამ შემდეგ შევძელით გამარჯვება. იტალიის ნაკრები ექვსი ერის ბოლო გათამაშებაში კონკურენტუნარიანი იყო", - ამბობს ოში.
იტალიელებს ჰყავთ ვეტერანი სერჯო პარისე, რომელმაც ზაფხულში მუხლის ოპერაცია გაიკეთა, ვისაც 35 წლის ასაკში 134 კეპი დაუგროვდა. მათ ჰყავთ გლოსტერის ფლანკერი ჯეიკ პოლედლდი.

ოშის იმედი აქვს, რომ 2019 წლის მსოფლიოს თასზეც პარისე თავის სიტყვას იტყვის:

"გუნდი ახალგაზრდულია, თუმცა ჩვენ გვყავს გამოცდილი მოთამაშეებიც, როგორიცაა პარისე", - ოპტიმისტურადაა განწყობილი იტალიელთა ირლანდიელი თავკაცი.

როგორც ჩანს, საქართველოსა და იტალიის ნაკრებების დაპირისპირების წინ "სკუადრა აძურას" თავკაცი იმდენად ღელავს, რომ ნერვებმა უმტყუნა. უნდა შეიცვალოს თუ არა ექვსი ერის ფორმატი, ამას ერთი კონკრეტული მატჩის შედეგი ვერ გადაწყვიტავს და ეს კარგად უნდა ესმოდეს ო"შის. "ბორჯღალოსნების" გამარჯვების შემთხვევაში ექვსი ერის კარებს ფართოდ არავინ გაგვიღებს. თუმცა, არც მარცხი უნდა იყოს მისი სამუდამოდ ჩარაზვის საბაბი.

ისე კი, ვინ უფრო ძლიერია მოედანზე, ერთმანეთთან ჯახით წყდება და არა ისე, ვინ ვისთან რამდენი სხვაობით წააგო ან მოიგო. დაველოდოთ ათ ნოემბერს...

ყოველდღიური სპორტული გაზეთი "ლელო"
927
მკითხველის კომენტარები / 0 /
მსგავსი ამბები
რუბრიკის სხვა სიახლეები