რაგბი. ზაფხულის თასი პირველად და საქართველოს A ნაკრები

28 ივლისსა და 3 აგვისტოს თბილისში, ვაკის სტადიონზე ახალი ტურნირის "ზაფხულის თასის" შეხვედრები გაიმართება.

მასში მონაწილეობას ოთხი გუნდი მიიღებს. ესენია: საქართველოს A ნაკრები, ბრაზილიის ეროვნული ნაკრები, არგენტინა XV და პარიზის "მეტრო რასინგი".

ტურნირი წლეულს პირველად გაიმართება და ყველაზე მნიშვნელოვანი მასში ევროპის ერთ-ერთი საუკეთესო გუნდის პარიზული "მეტრო რასინგის" მონაწილეობაა. შეჯიბრების ორგანიზატორები მოლაპარაკებას "ტულონთან" და "ლიონთანაც" აწარმოებდნენ, მაგრამ სხვადასხა ობიექტური მიზეზის გამო მათი ჩამოსვლა არ მოხერხდა.

პარიზის "მეტრო რასინგი" საფრანგეთის ექვსგზის ჩემპიონია. წლეულს რეგულარული გათამაშება მეორე ადგილზე დაასრულა, თუმცა ნახევარფინალში დამარცხდა. პარიზელებმა ჩემპიონთა თასის ფინალიც ითამაშეს, მაგრამ ირლანდიურ "ლენსტერთან" 12:15 წააგეს.

ამ გუნდის შემადგენლობაში არაერთ საერთაშორისო დონის ვარსკვლავს უთამაშია, მათ შორისაა ტესტ-მატჩების ისტორიაში საუკეთესო მექულე, ახალზელანდიელი დენ კარტერი. ამჟამად "მეტრო რასინგის" ღირსებას იცავენ ფრანგები: დიმიტრი შარჟევსკი, მაქსიმ მაშენო, ჰენრი ჩავენსი, ვირიმი ვაკატავა და ბერნარ ლე რუ, ფიჯელები ლეონე ნაკარავა და ბენ ვოლავოლა, სამხრეთაფრიკელი პეტ ლემბი, შოტლანდიელი ფინ რასელი, არგენტინელი ხუან იმჰოფი, ახალზელანდიელი ჯო როკოთოკო, ირლანდიელი საიმონ ზებო და სხვები.

"მეტრო რასინგში" თამაშობს შერკინების ქართველი ბურჯი ვასილ კაკოვინი. სხვადასხვა დროს ამ კლუბის ღირსებას იცავდნენ "ბორჯღალოსნები" დავით ხინჩაგიშვილი, გიორგი ჩხაიძე და მამუკა მაგრაქველიძე.

საქართველოს A ნაკრები "მზარდი საქართველოს" სამართალმემკვიდრეა. მას ვეტერანი ბორჯღალოსანი ბესიკ ხამაშურიძე გაწვრთნის. ასისტენტები ბექა ყურაშვილი და დავით ნემსაძე იქნებიან. ამ ეტაპზე გუნდი საქართველოს ჩემპიონატში მონაწილე მორაგბეებით დაკომპლექტდება და ლეგიონერებს არ გამოიძახებენ.

საკმაოდ ძლიერი გუნდია არგენტინა XV, რომელსაც თბილისში არაერთხელ უთამაშია. 2005, 2008 და 2009 წლებში ეს გუნდი "ჩერჩილის თასზე" თამაშობდა.

რეგულარულად მონაწილეობდა "მსოფლიო რაგბის ერთა თასზე", როგორც რუმინეთში, ასევე თბილისში, ერთი თვის წინათ კი "ერთა თასზე" ურუგვაიში ითამაშა. არგენტინის ეს ნაკრები ასევე ასპარეზობს ამერიკის ექვს ერში აშშ-ის, კანადის, ურუგვაის, ჩილესა და ბრაზილიის ეროვნულ ნაკრებებთან ერთად.

2009-2014 წლებში ტურნირში ოთხი გუნდი იღებდა მონაწილეობას და არგენტინა ყველა ჯერზე ჩემპიონი გახდა. 2016 წლიდან ტურნირი ექვსგუნდა გახდა და არგენტინა XV წლეულს კვლავ პირველი იყო. შარშან კი მეორე ადგილს დასჯერდა.

ტურნირის კიდევ ერთი მონაწილე, ბრაზილიის ნაკრები, ბოლო წლებში საგრძნობ პროგრესს განიცდის. დღესდღეობით მსოფლიო რეიტინგში ის 26-ე ადგილზეა.

გუნდი რეგულარულად მონაწილეობს ამერიკის ექვს ერში და "მსოფლიო რაგბის" დახმარებით, უკანასკნელ წლებში რეგულარულად მართავს მაღალი დონის ტესტ-მატჩებს.

გოჩა სვანიძე, საქართველოს რაგბის კავშირის პრეზიდენტი:

"ზაფხულის თასის წლევანდელი ტურნირი, რომელიც წლეულს პირველად ტარდება, საქართველოს რაგბის კავშირისა და თიბისი ბანკის ერთობლივი ძალისხმევით გაიმართება.

შეჯიბრებაში ოთხი გუნდი მიიღებს მონაწილეობას. მათ შორის საქართველოს A ნაკრები, რომელიც მხოლოდ საქართველოს ჩემპიონატში მოთამაშე მორაგბეებით იქნება დაკომპლექტებული.

ვფიქრობთ, საინტერესო სიახლეა. განსაკუთრებით აღსანიშნავი კი თბილისში ფრანგული რაგბის გრანდის "მეტრო რასინგის" სტუმრობაა, რომელიც მსოფლიო დონის მორაგბეებითაა დაკომპლექტებული. ისე გამოვიდა, რომ თამაში ჩვენ მხოლოდ ბრაზილიის ეროვნულ ნაკრებთან და არგენტინა XV-სთან გვიწევს. სამაგიეროდ, პარიზელებთან ერთობლივ წვრთნებს გავმართავთ, რაც არანაკლებ წაადგებათ ჩვენს მორაგბეებს."

ნიკა ქურდიანი, თიბისი ბანკის გენერალური დირექტორის მოადგილე:

"ჩვენი კომპანიისთვის რაგბის კავშირთან თანამშრომლობა მნიშვნელოვანი მოვლენაა. ეს სპორტის ის სახეობაა, რომელიც ქვეყნის ცნობადობას ზრდის საერთაშორისო დონეზე.

ჩვენც ყველანაირად ვცდილობთ ხელი შევუწყოთ რაგბის შემდგომ განვითარებას და პოპულარიზაციას საქართველოში. აქამდე რაგბის კავშირთან ერთად უამრავი პროექტი განვახორციელეთ და ეს ტურნირი მორიგი ერთობლივი საქმიანობის ნაყოფია.

თბილისში მაღალი დონის გუნდები ჩამოვლენ. მათ შორის "მეტრო რასინგი", რომელშიც მსოფლიოს დონის ვარსკვლავები ასპარეობენ და სხვა შემთხვევაში თბილისში შესაძლოა ვერასდროს გვენახა ისინი.

მართალია ცხელი ზაფხული გვაქვს, მაგრამ დარწმუნებული ვარ, ეს თამაშის ხარისხზე ნაკლებად აისახება და რაგბის "გურმანები" კარგი რაგბობის მომსწრე შეიქნებიან".

ზაფხულის თასი

28 ივლისი
საქართველო A-არგენტინა XV
მეტრო რასინგი-ბრაზილია

3 აგვისტო
საქართველო A-ბრაზილია
მეტრო რასინგი-არგენტინა XV

ყოველდღიური სპორტული გაზეთი "ლელო"
478
მკითხველის კომენტარები / 0 /
მსგავსი ამბები
რუბრიკის სხვა სიახლეები