რაგბი. იაპონია და იტალია დამტკიცებულია

საქართველოს ნაკრებმა მიმდინარე წლის ნოემბრის ტესტები წარმატებით დაასრულა. ახლა, უკვე მომდევნო წლის ივნისისა და ნოემბრის ტესტების დაგეგმვა მიმდინარეობს. უკვე ცნობილია, რომ 2018 წლის ნოემბერში ერთი შეხვედრა სტუმრად გვექნება იტალიის ნაკრებთან.

ახლა კი ოფიციალურად დადასტურდა ინფორმაცია, რომ ივნისის ტესტებზე ერთ-ერთი მეტოქე იაპონიის ნაკრები იქნება.

"ბორჯღალოსნები" 23 ივნისს იაპონიას ეწვევიან და "საკურებს" ტოიოტა სიტიში, "ტოიოტა სთედიუმზე" დაუპირისპირებიან. ეს ის არენაა, რომელზეც 2019 წლის მსოფლიოს თასის გათამაშების ჯგუფურ ეტაპზე პირველ მატჩში საქართველოს ნაკრები უელსის ეროვნულ გუნდს უნდა ეთამაშოს.

ეს იქნება ჩვენი და იაპონელების მეექვსე ტესტ-მატჩი. განვლილ ხუთ შეხვედრაში ოთხჯერ "ამომავალი მზის ქვეყნის შვილებმა" მოგვიგეს. გუნდი ბოლო წლებში აშკარად სწრაფ პროგრესს განიცდის.

ახალხან, ნოემბრის ტესტებზე აიპონელებმა ფრედ ითამაშეს სტუმრად საფრანგეთის ძლიერ ნაკრებთან - 23:23, რაც იოლი საქმე სულაც არაა. მართალია, ავსტრალიის ნაკრებთან დიდი სხვაობით დამარცხდნენ 30:63, მაგრამ მერე დამაჯერებლად გაიმარჯვეს ტონგასთან - 39:6. ერთი წლის წინათ კი კარდიფში, უელსის ნაკრებმა "საკურებს" ბოლო წუთზე გატანილი არეკნის წყალობით მოუგო - 33:30.

"მოხარული ვარ, რომ მომავალ წელს ივნისში, ტოიოტა სიტიში მოგვეცა იაპონიასთან თამაშის შესაძლებლობა. აღსანიშნავია, რომ იმავე სტადიონზე ვითამაშებთ, რომელზეც 2019 წლის მსოფლიოს თასზე პირველ მატჩში უელსს დავუპირისპირდებით. იმავე ბაზაზე ვივარჯიშებთ, იმავე სასტუმროში დავბინავდებით და იმავე სატრანსპორტო სისტემას გამოვიყენებთ, მსოფლიოს თასისთვის მოსამზადებლად ამაზე კარგი რა უნდა იყოს...

ჩვენთვის დიდი პატივია, იაპონიას მათსავე ქვეყანაში ვეთამაშოთ. რაც "ბორჯღალოსნების" მწვრთნელი ვარ, მათ სამჯერ ვეთამაშეთ თბილისში და ერთხელ ბრიტანეთში, აქედან გამომდინარე, კიდევ უფრო საინტერესო იქნება იაპონიის ნაკრებთან მათსავე მშობლიურ არენაზე დაპირისპირება" - თქვა რაგბის კავშირის ვებგვერდთან საუბრისას საქართველოს ნაკრების მთავარმა მწვრთნელმა მილტონ ჰეიგმა.

ზაფხულის ტესტებთან დაკავშირებით თავის მოსაზრება გამოთქვა იაპონიის ნაკრების მთავარმა მწვრთნელმა ჯეიმი ჯოზეფმაც:

"იაპონელ ქომაგს უნდა ვაჩვენოთ, რომ გვაქვს გამარჯვების ჟინი და სურვილი. მატჩები იტალიისა და საქართველოს ნაკრებების წინააღმდეგ მსოფლიოს თასისთვის მოსამზადებლად იდეალური შესაძლებლობაა. დარწმუნებული ვარ, რომ ჩვენს მხარდასაჭერად სტადიონზე ქომაგი მრავლად მოვა".

იაპონიის ნაკრებთან მატჩამდე საქართველოს ეროვნულმა გუნდმა კიდევ ორი მატჩი უნდა გამართოს. არაოფიციალური ინფორმაციით, ეს ორი მეტოქე სამი კუნძულელიდან (ფიჯი, ტონგა, სამოა) ორი იქნება. იქამდე კი, 31 მაისს "ბორჯღალოსნებმა" შინ უნდა ითამაშონ. მეტოქის ვინაობას რაგბის კავშირი სასიამოვნო სიურპრიზად ინახავს.

ახლა, მოდი ვიმსჯელოთ, რომელი გუნდის სტუმრობა იქნება სასიამოვნო ქართველი ქომაგებისთვის. ყველაზე რეალური კანდიდატი "ბარბაროსებია". საქართველოში მათი ერთადერთი სტუმრობიდან საკმაოდ დიდი დრო გავიდა, არადა, მაშინ მათი ხელმძღვანელები დაგვპირდნენ, კიდევ არაერთელ გეწვევითო.

მეორე, მაგრამ ნაკლებად სავარაუდო, ვარიანტია ახალზელანდიელი მაორები. თუმცა, როგორც წესი, მათი სტუმრობა მასპინძლებს საკმაოდ ძვირი უჯდებათ ხოლმე. თუ გავითვალისწინებთ, რომ ნაკრების თავკაცი ახალზელანდელი გვყავს, იმის ვარაუდიც შეიძლება, რომ მაორების ჩამოსვლა მან გაჩარხა.

არის მესამე ვარიანტიც. ეს, არც მეტი, არც ნაკლები, ინგლისის ეროვნული გუნდია. ჯერ კიდევ ნოემბრის ტესტების დაწყებამდე "პომების" ავსტრალიელი მწვრთნელი ამბობდა, მინდა ჩვენი გუნდის შერკინებამ მსოფლიოს ერთ-ერთ საუკეთესო, საქართველოს ნაკრების შერკინებასთან ერთობლივი წვრთნა გამართოსო, მაგრამ ჩვენგან ძალიან შორს არიანო.

ამიტომ, ინგლისელები უელსთან ერთობლივ წვრთნას დასჯერდნენ. ივნისის ტესტებზე ინგლისელები სამხრეთ ნახევარსფეროს სტუმრობენ და გამორიცხული არაა, გზად თბილისში შემოიარონ.

ერთი სიტყვით, სანამ დაფარულს ნათელი მოეფინება მხოლოდ მჩხიბავობა თუ შეგვიძლია. არც ის არის გამორიცხული, რომ ამ სამი ვარიანტიდან არც ერთი გამართლდეს.

2018 წლის ნომებრის ტესტებზე, როგორც უკვე ვთქვით, იტალიას ვესტუმრებით. შინ კი, სავარაუდოდ, ისევ ორ კუნძულელს ვუმასპინძლებთ, ოღონდ რომელს, მოგვიანებით გაირკვევა.

ყოველდღიური სპორტული გაზეთი "ლელო"
2596
მკითხველის კომენტარები / 1 /
სოსო
0
ორივე უაღრესად საინტერესო თამაში იქნება.იაპონია პრაქტიკულად მთელი მსოფლიოდან შეკრებილი მოთამაშეებითაა დაკომპლექტებული და მსოფლიო თასისათვის ალბათ კიდევ უფრო ძლიერ მოთამაშეებს დაიმატებენ,იტალია კი როგორც იქნა გვაღირსეს და ისინიც ,ისევე როგორც ჩვენ, თავებს მოიკლავენ გასამარჯვებლად,ეს მატჩი ხომ მათთვის შეიძლება უფრო მნიშვნელოვანიც გამოდგეს,ვიდრე მსოფლიოს თასზე შედეგი.
მსგავსი ამბები
რუბრიკის სხვა სიახლეები
;