რაგბი. ინგლისელთა მწვრთნელი აღფრთოვანებულია: Fantastic, Brilliant!

საქართველოსა და ინგლისის ნაკრებებმა ლონდონში ერთობლივი ვარჯიშები გამართეს. ვარჯიში ნაყოფიერი რომ ყოფილიყო, მასპინძლებმა ცნობილი ინგლისელი მსაჯი უეინ ბარნსი მიიწვიეს.

თავდაპირველად, შერკინებისა და ხაზის მოთამაშეებმა ცალ-ცალკე ივარჯიშეს. ხოლო ვარჯიშის ბოლოს ერთობლივი წვრთნა ჩატარდა. შერკინების ვარჯიშით კმაყოფილებას ვერ მალავდა ავსტრალიელი თავკაცი ედი ჯონსი, რომელმაც "ტელეგრაფთან" საუბრისას თქვა:

"ეს ფანტასტიკური იყო. საქართველოს ნაკრებს სწორედ ისეთი შერკინება ჰყავს, რომლის წინააღმდეგაც მუდამ უნდა გინდოდეს ვარჯიში. ესაა ძალიან ძლიერი შერკინება, რომელიც სხვებისგან განსხვავებულად მუშაობს. ვერც კი ვინატრებდი, ისეთი ვარჯიში იყო და ბიჭებმა ბევრი ახალი რამ ისწავლეს. მე მათ ვესაუბრე და აღტაცებულები არიან.

ქართველები თავსა და მხრებს განსხვავებულად იყენებენ, რითაც წნეხს თავიდანვე, ფეხების მოძრაობამდე ქმნიან. მათი შერკინება ძველი და ახალი სტილის სინთეზია. შერკინება ლამისაა მათი ცხოვრების ნაწილია. მერწმუნეთ, ჩვენმა ბიჭებმა ბევრი ახალი რამ ისწავლეს და შესანიშნავად გაიარეს ადაპტაცია.

ბევრი გუნდი ცდილობს ასე შერკინებას, მაგრამ საქართველოს ამ ასპექტში ვერავინ შეედრება. სხვებიც ცდილობენ თავისა და მხრების გამოყენებით მეტოქის შერკინება არასტაბილური გახადონ, მაგრამ ქართველებს ეს საუკეთესოდ გამოსდით.

ქართველ მწვრთნელებთან ძალიან კარგი ურთიერთობა გვაქვს, ერთობლივი ვარჯიშით ორივე მხარე დიდ სარგებელს იღებს და არაა გამორიცხული, მსგავსი ღონისძიებები მომავალშიც დაიგეგმოს. თუმცა უნდა გვახსოვდეს, რომ ამისათვის ლიმიტირებული დრო გვაქვს.

ჩვენი სურვილია, რომ მსოფლიოში ყველაზე დომინანტი შერკინება გვყავდეს. ამისგან ჯერ შორს ვართ, თუმცა სწორი მიმართულებით მივდივართ. დღეს გვქონდა შესანიშნავი შანსი, გვესწავლა, თუ როგორ უნდა ვითამაშოთ შერკინებაში უფრო ეფექტურად".

ინგლისელებთან ერთობლივი წვრთნით კმაყოფილია საქართველოს ნაკრების ახალზელანდიელი თავკაცი მილტონ ჰეიგი:

"პირველი ერთობლივი ვარჯიშით ძალიან კმაყოფილები ვართ. ის დიდი სარგებლის მომტანი იქნება, როგორც ჩვენთვის, ასევე ინგლისელებისთვის. ვარჯიში კონკრეტულ კომპონენტებზე იყო კონცენტრირებული - შერკინება შერკინებაზე და ხაზი ხაზზე. ჩვენმა უკანახაზელებმა ინგლისელების წინააღმდეგ შეტევასა და დაცვაში ივარჯიშეს, რითაც ბევრი საინტერესო და მნიშვნელოვანი რამ ისწავლეს.

ცხადია, ერთობლივი ვარჯიში ორივე მხარეს გამოგვადგება. ჩვენთვის ის შესანიშნავი საშუალებაა მოვემზადოთ, როგორც რაგბი ევროპის ჩემპიონატის, ასევე შემდგომი თამაშებისთვის. ორივე გუნდის მწვრთნელები და მოთამაშეები ვთანხმდებით, რომ ფასდაუდებელი გამოცდილება შევიძინეთ.
მეორე დღეს უფრო საინტერესო პროგრამა გველის. ვარჯიშები დაეთმობა მოლს და უშუალოდ ტაქტიკურ მონახაზებს, როგორც შერკინებაში, ასევე უკანა ხაზში".

P. შ. საქართველოს ნაკრებმა გუშინ კიდევ ერთი ვარჯიში გამართა ინგლისის ეროვნულ გუნდთან ლატიმერის უმაღლესი სკოლის მოედანზე და დღეს გეზი გერმანიისკენ აიღო, სადაც შაბათს ოფენბახში გერმანიის ეროვნულ გუნდს დაუპირისპირდება.

4273
მკითხველის კომენტარები / 0 /
მსგავსი ამბები
რუბრიკის სხვა სიახლეები