რაგბი. კაპიტანი ნემსაძე

საქართველოს ნაკრების მეორეხაზელმა გიორგი ნემსაძემ ინგლისის პრემიერშიფის A ლიგაში "ბრისტოლის" სარეზერვო გუნდში ითამაშა. ის "ჰარლექვინზთან" მატჩში გუნდის კაპიტანი იყო.

ქართველმა მეორეხაზელმა, მას შემდეგ, რაც ნოემბრის ტესტები დასრულდა და ინგლისში დაბრუნდა, ჯერ დიდი ბრიტანეთისა და ირლანდიის თასზე "ლენსტერის" წინააღმდეგ სრულად ითამაშა, ახლახან კი, მას სარეზერვო გუნდის კაპიტნობა ანდეს და მოედანზე თავიდან ბოლომდე იასპარეზა.

შეგახსენებთ, რომ გიორგი ნემსაძე "ბრისტოლში" მეორე წელიწადია, რაც ირიცხება. მას გუნდთან კიდევ ერთწლიანი კონტრაქტი აკავშირებს.

უკვე ვწერდით, რომ საქართველოს ნაკრების კიდევ ერთმა მორაგბემ, მესამეხაზელმა გიორგი ცუცქირიძემ საფრანგეთის ელიტური, მეორე დივიზიონის "ორიაკთან" სამწლიანი კონტრაქტი გააფორმა. ამ კლუბში უკვე თამაშობენ საქართველოს ნაკრების კაპიტანი, შუამარბი მერაბ შარიქაძე და პირველხაზელი ნიკოლოზ ხატიაშვილი.

აი, რა დაწერა ცუცქირიძის შესახებ "ორიაკის" მიერ გავრცელებულ კომუნიკეში:

"მხოლოდ ერთი თამაში გახდა საჭირო, რათა სრულფასოვნად შეგვეფასებინა ქართველი მორაგბის ნიჭი. ის გუნდს ზაფხულის მიწურულს "ბრივიდან" შეუერთდა, შემოდგომის ტესტებისთვის საქართველოს ნაკრებში იმყოფებოდა და მიუხედავად იმისა, რომ კონტრაქტს სხვა პროფესიონალური კლუბებიც სთავაზობდნენ, "ორიაკში" დარჩენა გადაწყვიტა".

ცუცქირიძემ ეროვნულ ნაკრებში პირველი კეპი 2017 წლის რაგბი ევროპის ჩემპიონატზე ბელგიასთან მატჩში მოიპოვა და მას შემდეგ ეროვნულ გუნდში კიდევ ექვსჯერ ითამაშა. ნოემბრის ტესტებზე ცუცქირიძე ნაკრებში გამოძახებული იყო, თუმცა თამაშმა არ მოუწია. იმედია, ის მალე დაიმკვიდრებს ადგილს "ორიაკის" ძირითად შემადგენლობაში.

შეგახსენებთ, რომ "ორიაკი" 16 ტურის შემდეგ სატურნირო ცხრილში 34 ქულით მე-8 ადგილზეა და პლეი ოფში მოხვედრისთვის ბრძოლას განაგრძობს.

ყოველდღიური სპორტული გაზეთი "ლელო"
1340
მკითხველის კომენტარები / 0 /
მსგავსი ამბები
რუბრიკის სხვა სიახლეები
;