რაგბი. კონტინენტის ფარი. 'ლოკომოტივის' დებიუტი ევროთასებზე

საქართველოს ჩემპიონი თბილისის "ლოკომოტივი" შაბათს, 13 ოქტომბერს, "ავჭალის სარაგბო სტადიონზე" კონტინენტის ფარის გათამაშებაში პირველ მატჩს გამართავს. რკინიგზელების მეტოქე იტალიური "კალვიზანო" იქნება.

"ლოკომოტივი" ამ მატჩს დანაკლისით ხვდება. გუნდი დატოვა და კრასნოიარსკში გადაბარგდა შერკინების კვაჭი შალვა მამუკაშვილი. ტრავმირებულია და, სავარაუდოდ, გუნდს ვერაფრით დაეხმარება გარემარბი, რკინიგზელთა საუკეთესო მელელოვე გიორგი შკინინი.
ცოტა რამ თბილისის "ლოკომოტვის" მეტოქის შესახებ.

"კალვიზანო" 1970 წელს დაარსდა. გუნდი 6-ჯერ იყო ქვეყნის ჩემპიონი - 2005, 2008, 2012, 2014, 2015 და 2017 წლებში.

ბრეშას პროვინციის, ლომბარდის გუნდს ევროთასებზე თამაშის დიდი გამოცდილება აქვს. 1999-2000 წლების სეზონში "კალვიზანომ" რანგით მეორე, ჩელენჯ კაპის გათამაშებაში მიიღო მონაწილეობა. 2001-დან 2007 წლის ჩათვლით, გუნდმა 6-ჯერ ითამაშა ჩემპიონთა თასზე და 2002-2003 წლების სეზონში ორი გამარჯვებაც მოიპოვა. 2007-2008 წლებში "კალვიზანომ" ორი თამაში ჩელენჯ კაპზეც მოიგო, მომდევნო სეზონში კი მეშვიდედ ითამაშა ჩემპიონთა თასზე.

ევროთასების ფორმატის შეცვლის შემდეგ "კალვიზანოს" ჩემპიონთა თასზე აღარ უთამაშია. სამაგიეროდ, გამოდიოდა ჩელენჯ კაპზე 2012-2013 წლების სეზონში და ერთი თამაში მოიგო, ხოლო მომდევნო სეზონში მხოლოდ ერთ ფრეს გამორჩა. ლომბარდიელები ჩელენჯ კაპზე ბოლოს 2015-2016 წლების სეზონზე სწორედ კონტინენტის ფარის გავლით მოხვდნენ და ყველა თამაში წააგეს.

2013 წლიდან "კალვიზანო" რეგულარულად მონაწილეობს კონტინენტის ფარზე და თავიდან ნახევარფინალშიც რეგულარულად გადიოდა, მაგრამ ბოლო ორი სეზონია ამას ვეღარ ახერხებს. გასულ სეზონში იტალიელებმა ჯგუფში პირველი ადგილი დაიკავეს და ფლეი ოფში "ჰაიდელბერგს" შეხვდნენ, რომელმაც გერმანიაში 34:29, ხოლო იტალიაში 17:13 მოუგო.

შეგახსენებთ, რომ "ლოკომოტივს" ჯგუფში კიდევ ერთი იტალიური გუნდი ჰყავს მეტოქედ, რომის "ფიამე ორო". ამ ჯგუფში გამარჯვებული მეორე ჯგუფის საუკეთესოს ფინალში დაუპირისპირდება და იქ მოგებული "ჩელენჯ კაპის" საგზურს მოიპოვებს.

კონტინენტის ფარი

13 ოქტომბერი
ლოკომოტივი-კალვიზანო

8 დეკემბერი
ფიამე ორო-ლოკომოტივი

15 დეკემბერი
კალვიზანო-ლოკომოტივი

12 იანვარი
ლოკომოტივი-ფიამე ორო

ყოველდღიური სპორტული გაზეთი "ლელო"
593
მკითხველის კომენტარები / 0 /
მსგავსი ამბები
რუბრიკის სხვა სიახლეები