[რაგბი. ლეგიონერები] გორგოძე მძიმე ტრავმას გადაურჩა

ევროთასების გათამაშებაში მეორე ტურის შეხვედრები გაიმართა. ყველაზე პრესტიჟულ ჩემპიონთა თასის გათამაშებაში მოასპარეზე ქართველთა სამი გუნდიდან ერთმა მოიგო, ერთმა ფრედ ითამაშა და ერთიც დამარცხდა...

C ჯგუფის ბინადარმა დავით ზირაქაშვილისა და ბექა კაკაბაძის „კლერმონმა“ სტუმრად ითამაშა ირლანდიურ „ალსტერთან“ და 13:18 დამარცხდა. ზირაქაშვილი თამაშში 46-ე წუთიდან ჩაერთო. კაკაბაძე განაცხადში არ იყო. „ვულკანებს“ ახლა 6 ქულა აქვთ და მეორე ადგილზე არიან. დაუმარცხებლად ჯგუფს სწორედ „ალსტერი“ ლიდერობს.

D ჯგუფში მოასპარეზე ვასილ კაკოვინისა და გურამ გოგიჩაშვილის „რასინგმა“ სტუმრად ითამაშა ირლანდიურ „მანსტერთან“ და ფრეს გამორჩა - 21:21. ქართველ მორაგბეებს არ უთამაშიათ. „რასინგს“ და „მანსტერს“ შვიდ-შვიდი ქულა აქვთ და პირველ-მეორე ადგილებს იყოფენ.

ერთადერთი ქართული კლუბი, რომელმაც ჩემპიონთა თასის გათამაშების მეორე ტურში გაიმარჯვა ლევან ჩილაჩავას, მიხეილ ნარიაშვილის, კონსტანტინე მიქაუტაძისა და გელა აფრასიძის „მონპელიეა“, რომელმაც შინ მოუგო ინგლისურ „გლოსტერს“ - 30:27. მონპელიელებმა ბოლო 25 წუთი კაცნაკლულებმა ითამაშეს, რადგან არბიტრმა განზრახ უხეშობისთვის ვილემ დუ პლესი წითელი ბარათით გააძევა, როცა ანგარიში 27:17 იყო. მიუხედავად ამისა, ჩვენებურთა გუნდმა გამარჯვება მაინც შეძლო.

ჩილაჩავა და მიქაუტაძე 47-ე წუთზე შეცვალეს, ნარიაშვილი თამაშში 54-ე წუთიდან ჩაერთო. „სქაი სპორტსმა“ ჩილაჩავა ტურის სიმბოლურში შეიყვანა.

„ჩილაჩავა „მონპელიეს“ შერკინების გულში იყო, რომელმაც „გლოსტერის“ 22-იანში 4 ჯარიმა მოიპოვა. თეთრ-ალუბლისფერთა მწვრთნელმა იოჰან აკერმანმა 3 ქართველს და შერკინების სხვა წევრებს წესების ხშირი დარღვევა კი დააბრალა, მაგრამ მსაჯები აშკარად სხვა აზრზე იყვნენ. საქართველოს ნაკრების წევრი დაცვაშიც ძალიან კარგად მოქმედებდა - მან 7 ბოჭვა გააკეთა და 2 თერნოვერი, სანამ მატჩის დასრულებამდე ნახევარი საათით ადრე შეცვლიდნენ“, - წერს გამოცემა.

n n n

ჩელენჯ კაპის გათამაშებაში ნიკოლოზ ხატიაშვილის, დავით კაჭარავას, დავით მესხისა და მიხეილ გაჩეჩილაძის „ენისეის“ მარცხის შესახებ უკვე ვწერდით. შეგახსენებთ, რომ ამ მატჩში მიმდინარე გათამაშებაში მეორე ლელო მესხმა მიითვალა.

B ჯგუფის ბინადარმა მამუკა გორგოძისა და ბექა გიგაშვილის „ტულონმა“ უმძიმეს ბრძოლაში დაამარცხა უელსური „ჰლანეჰლი“ - 17:16. მე-40 წუთზე რაკში თამაშისას მამუკა გორგოძეს უელსელთა ფიჯელმა მეორეხაზელმა ტევიტა რატუვამ სახეში მხარი ჩაარტყა. გორგოძე რამდენიმე წუთი წამოდგომას ვერ ახერხებდა. საბედნიეროდ, ის მძიმე ტრავმას გადაურჩა. რატუვას კი მატჩის არბიტრმა წითელი ბარათი უჩვენა.

[VIDEO] საშინელი შეტაკება! გორგოძეს რატუვა დაეჯახა და...

გორგოძე 70-ე წუთზე შეცვალეს, გიგაშვილი მოედანაზე 50-ე წუთიდან გამოჩნდა. „ტულონი“ რვა ქულით პირველ ადგილზეა.

C ჯგუფში ზურაბ ჟვანიას „ვოსფსმა“ შინ მიიღო გიორგი თეთრაშვილის „აჟენი“ და 32:14 მოუგო. თეთრაშვილი 51-ე წუთზე შეცვალეს, ჟვანია თამაშში 59-ე წუთიდან ჩაერთო. ამ მატჩს ქართველ მსაჯთა ბრიგადა სჯიდა: ნიკა ამაშუკელი, შოთა თევზაძე და საბა აბულაშვილი.

ამავე ჯგუფში ლექსო ყაულაშვილის, ბექა გორგაძისა და ლაშა ტაბიძის „ბორდომ“ სტუმრად ფრე გაახერხა შოტლანდიურ „ედინბურგთან“. გორგაძე 56-ე წუთზე შეცვალეს, ყაულაშვილმა ათი წუთით მეტი ითამაშა.

„ბორდოს“ და „ედინბურგს“ შვიდ-შვიდი ქულა დაუგროვდათ, „ვოსფს“ ხუთი ქულა აქვს, „აჟენი“ უქულოდაა და ბოლო ადგილზეა.

D ჯგუფში ორი „ქართული გუნდიდან“ მხოლოდ ერთმა მოიგო. გიორგი მელიქიძის „სტად ფრანსემ“ სტუმრად მოუგო იტალიურ „ზებრეს“ - 13:12. მელიქიძე მოედანზე 70-ე წუთიდან გამოჩნდა.

კარლენ ასიეშვილის, ვასილ ლობჟანიძის, ოთარ გიორგაძის, სოსო ბეკოშვილისა და თედო აბჟანდაძის „ბრივი“ შინ მშრალი ანგარიშით დამარცხდა ინგლისურ „ბრისტოლთან“ - 0:36.

ლობჟანიძე 57-ე წუთზე შეცვალეს. აბჟანდაძე თამაშში 41-ე წუთიდან ჩაერთო, როცა ანგარიში უკვე 0:24 იყო. ასიეშვილი მოედანზე 52-ე წუთიდან გამოჩნდა, გიორგაძე კი ორი წუთის შემდეგ ჩაერთო უკვე წაგებულ ბრძოლაში.

„ბორდოს“ და „სტად ფრანსეს“ ოთხ-ოთხი ქულა აქვთ და მეორე-მესამე ადგილებს იყოფენ.

465
მკითხველის კომენტარები / 0 /
მსგავსი ამბები
რუბრიკის სხვა სიახლეები
;