რაგბი. ლეგიონერები: ორი საპლეიოფო ზონაში

საფრანგეთის სარაგბო ჩემპიონატის ელიტურ, მეორე დივიზიონში პირველი წრის ბოლო ტურის შეხვედრები გაიმართა . მატჩები ლოგიკურად, ლიდერების გამარჯვებით დასრულდა. მეტიც, ყველა შეხვედრაში მასპინძლებმა გაიმარჯვეს.

დღესდღეობით, საპლეიოფო ხუთეულში ქართველ მორაგბეთა ორი გუნდია. ესენია: `მონ დე მარსანი" და `გრენობლი". იქ მოხვედრის შანსი კი კიდევ ოთხ `ქართულ გუნდს" აქვს. მე-15 ტურის მატჩებში ექვსმა ქართველმა ითამაშა.

ყველაზე მეტმა, სამმა მორაგბემ, მირიან ბურდულმა, შალვა მამუკაშვილმა და გიორგი ნაცარაშვილმა აუტსაიდერ `კარკასონის" შემადგენლობაში იასპარეზა, რომელმაც შინ უშუალო კონკურენტ `დაქსს" 43:24 სძლია. ბურდული ძირითად შემადგენლობაში იყო და 61-ე წუთზე ნაცარაშვილმა შეცვალა, იმავდროულად თამაშში მამუკაშვილიც ჩაერთო.

გათამაშების ერთ-ერთი ლიდერის, ბექა გიგაშვილის `გრენობლს" დიდი წინააღმდეგობა გაუწია სტუმრად შალვა სუთიაშვილის `ანგულემმა". `ალპელებმა" მეტოქე მატჩის ბოლოსკენღა გატეხეს და 25:20 მოუგეს. სუთიაშვილი ძირითად შემადგენლობაში იყო და 56-ე შეცვალეს, გიგაშვილს არ უთამაშია.

უჩვეულოდ დიდი ანგარიშით დამარცხდა სტუმრად ბასკურ `ბაიონთან" ბექა ბიწაძის `ნარბონი" - 0:53. საქართველოს ნაკრების მესამეხაზელმა ამჯერად ფლანკერად ითამაშა. ის ძირითად შემადგენლობაში იყო და 48-ე წუთზე შეცვალეს.

ვახტანგ მაისურაძის `ვანმა" შინ დაამარცხა მერაბ შარიქაძისა და ნიკოლოზ ხატიაშვილის `ორიაკი" - 38:16. ტრავმების გამო ქართველებს ამ მატჩში არ უთამაშიათ.
ილია კაიკაციშვილის `მასი" სტუმრად დამარცხდა კატალონურ `პერპინიანთან" - 13:41. ქართველი შერკინების ბურჯი ძირითად შემადგენლობაში იყო და 47-ე წუთზე შეცვალეს.

ყოველდღიური სპორტული გაზეთი "ლელო"
1207
მკითხველის კომენტარები / 0 /
მსგავსი ამბები
რუბრიკის სხვა სიახლეები
;