რაგბი.ლეგიონერები. საფრანგეთის პირველ დივიზიონში ქართველების 'კლერმონი' ისევ მიუწვდომელია

საფრანგეთის სარაგბო ჩემპიონატის ელიტურ, პირველ დივიზიონში მე-10 ტურის შეხვედრები გაიმართა, რომელშიც რამდენიმე ქართველმა ლეგიონერმა ითამაშა. სატურნირო ცხრილის სათავეში კი, ქართველ მორაგბეთა გუნდი "კლერმონია".

დავით ზირაქაშვილის, ბექა კაკაბაძისა და ვიქტორ კოლელიშვილის "კლერმონმა" შინ მიიღო პლეი ოფში გასვლისთვის მებრძოლი "ლიონი" და 31:11 დაამარცხა. სტუმრებმა "ვულკანებს" მხოლოდ პირველ ტაიმში გაუწიეს სათანადო წინააღმდეგობა, რომელიც მასპინძლებმა მხოლოდ ორი ქულის სხვაობით 8:6 მოიგეს. მეორე ტაიმში კლერმონელთა უპირატესობა კიდევ უფრო საგრძნობი გახდა და მეტოქე საბოლოოდ მე-60 წუთისთვის გატეხეს.

კაკაბაძე ძირითად შემადგენლობაში იყო და 53-ე წუთზე შეცვალეს, ზირაქაშვილმა მოედანი 71-ე წუთზე დატოვა, კოლელიშვილს არ უთამაშია.
ლიდერთა შორისაა ვასილ კაკოვინისა და გურამ გოგიჩაშვილის "რასინგი", რომელმაც შინ მინიმალური სხვაობით შეძლო დავით ქუბრიაშვილისა და ბექა გიგაშვილის "გრენობლის" დამარცხება - 24:23. ამ მატჩში ქართველებიდან მხოლოდ კაკოვინმა ითამაშა, რომელიც მოედანზე 48-ე წუთიდან გამოჩნდა. სხვა ყველა საქართველოს ეროვნულ ნაკრებში იყო გამოძახებული.

ოდნავ უკლო ტემპს გიორგი მელიქიძის "სტად ფრანსემ", რომელმაც ამჯერად შინ წააგო "ლა როშელთან" - 12:14. ქართველი შერკინების ბურჯი ძირითად შემადგენლობაში იყო და 68-ე წუთზე შეცვალეს.

ლექსო ყაულაშვილის, ბექა გორგაძისა და ლაშა ტაბიძის "ბორდომ" შინ დაამარცხა კრიზისში მყოფი მამუკა გორგოძისა და ბადრი ალხაზაშვილის "ტულონი" - 36:25. ყაულაშვილი და გორგოძე ტრავმირებულნი არიან, გორგაძე და ალხაზაშვილი საქართველოს ნაკრებში იყვნენ გამოძახებულნი, ტაბიძე თადარიგში იყო და თამაშში 69-ე წუთიდან ჩაერთო.

მიხეილ ნარიაშვილის, კონსტანტინე მიქაუტაძის, ლევან ჩილაჩავას, გელა აფრასიძისა და უშანგი ჭეიშვილის "მონპელიემ" სტუმრად დაამარცხა გიორგი თეთრაშვილისა და თამაზ მჭედლიძის "აჟენი" - 18:15. ნარიაშვილი, ჩილაჩავა, აფრასიძე და მჭედლიძე "ბორჯღალოსნების" რიგებში ირჯებოდნენ, მიქაუტაძე ტრავმირებულია, თეთრაშვილი ძირითად შემადგენლობაში იყო და 49-ე წუთზე შეცვალეს, ჭეიშვილმა 14 წუთით მეტი ითამაშა.

I დივიზიონი

X ტური
ბორდო-ტულონი 36:25, აჟენი-მონპელიე 15:18, პო-ტულუზი 13:15, რასინგი-გრენობლი 24:23, პერპინიანი-კასტრი 12:16, სტად ფრანსე-ლა როშელი 12:14, კლერმონი-ლიონი 31:11

სატურნირო მდგომარეობა
1. კლერმონი - 37 ქულა, 2. ტულუზი - 33, 3. რასინგი - 30, 4. ლა როშელი - 29, 5. სტად ფრანსე - 28, 6. კასტრი - 28, 7. ლიონი - 26, 8. ბორდო - 26, 9. მონპელიე - 25, 10. პო - 18, 11. გრენობლი - 15, 12. ტულონი - 14, 13. აჟენი - 13, 14. პერპინიანი - 4

ყოველდღიური სპორტული გაზეთი "ლელო"
835
მკითხველის კომენტარები / 0 /
მსგავსი ამბები
რუბრიკის სხვა სიახლეები
;