რაგბი. ლეგიონი: რეკორდი - სამი საჯარიმო ლელო

საფრანგეთის სარაგბო ჩემპიონატის ელიტურ, მეორე დივიზიონში მერვე ტურის შეხვედრები გაიმართა, რომლის შემდეგაც პირველობისთვის რეალურად მებრძოლთა შორის ქართველ მორაგბეთა ორი გუნდია. ესენია: "გრენობლი" და "კოლომიე".

ქართველი შერკინების ბურჯის ბექა გიგაშვილის "გრენობლმა" მოულოდნელად სტუმრად წააგო ერთ-ერთ აუტსაიდერთან, დივიზიონის დებიუტანტ "ნევერთან" - 16:17. ეს ანგარიში 64-ე წუთზე დაფიქსირდა. გიგაშვილი ერთი წუთის შემდეგ შეცვალეს. "ალპელებმა" კი თამაშის დარჩენილ დროში მატჩის გადარჩენა ვერ შეძლეს.

მიუხედავად ამისა, "გრენობლი" მაინც პირველ ადგილზეა. მას 27 ქულა აქვს. ამდენივე ქულა დაუგროვდა "მონტობანსაც", რომელმაც "ალპელებისგან" განსხვავებით, სტუმრად დაამარცხა ასევე დივიზიონის დებიუტანტი, ვახტანგ მაისურაძის "ვანი" - 19:12. საგულისხმოა, რომ 48-ე წუთამდე ანგარიში საყაიმო იყო - 12:12. სტუმრებმა გარდასახული ლელო მიითვალეს და დაწინაურდნენ. დარჩენილ 32 წუთში ვერცერთმა გუნდმა მონაგარი ვეღარ გაზარდა.

მაისურაძე ძირითად შემადგენლობაში იყო და 49-ე წუთზე შეცვალეს.

ლიდერებს ერთი ქულით ჩამორჩება ბექა შეყლაშვილის "კოლომიე", რომელმაც სტუმრად წააგო ელიზბარ ყუფარაძის "დაქსთან" - 25:30. შეყლაშვილი ძირითად შემადგენლობაში იყო და 46-ე წუთზე შეცვალეს. ყუფარაძე განაცხადში არ იყო.

ნიკოლოზ ხატიაშვილისა და მერაბ შარიქაძის "ორიაკმა" შინ დაამარცხა ლიდერთა ჯგუფის წარმომადგენელი, კატალონიური "პერპინიანი" - 38:18. შარიქაძემ მიმდინარე სეზონში პირველად არ ითამაშა. ხატიაშვილი 38-ე წუთზე შეცვალეს.

დაძაბული გამოდგა ბექა ბიწაძის "ნარბონის" საშინაო შეხვედრა შალვა სუთიაშვილის "ანგულემთან", რომელიც მასპინძლების გამარჯვებით დასრულდა - 29:25. მატჩის არბიტრმა სამი მორაგბე სინბინში გაუშვა, ერთს კი წითელი ბარათი უჩვენა. ამასთან ერთად, მსაჯმა "ნარბონის" სასარგებლოდ სამი საჯარიმო ლელო (21 ქულა) ჩათვალა. ბიწაძე 64-ე წუთზე შეცვალეს, სუთიაშვილმა 15 წუთით მეტი ითამაშა.

საფრანგეთის ჩემპიონატი. მეორე დივიზიონი. VIII ტური
დაქსი-კოლომიე 30:25, ბეზიე-კარკასონი 27:10, მასი-მონ დე მარსანი 12:6, ნარბონი-ანგულემი 29:25, ვანი-მონტობანი 12:19, ნევერი-გრენობლი 17:16, ბაიონი-ბიარიცი 24:30, ორიაკი-პერპინიანი 38:18

სატურნირო მდგომარეობა
1. გრენობლი - 27 ქულა, 2. მონტობანი - 27, 3. კოლომიე - 26, 4. პერპინიანი - 25, 5. ბეზიე - 22, 6. მონ დე მარსანი - 21, 7. ბიარიცი - 21, 8. მასი - 19, 9. დაქსი - 18, 10. ორიაკი - 17, 11. ვანი - 15, 12. ანგულემი - 14, 13. ბაიონი - 14, 14. ნევერი - 13, 15. ნარბონი - 12, 16. კარკასონი - 6

IX ტური
კოლომიე-ნევერი, ანგულემი-მასი, ბიარიცი-დაქსი, კარკასონი-ბაიონი, მონ დე მარსანი-ორიაკი, მონტობანი-ბეზიე, გრენობლი-ვანი, ნარბონი-პერპინიანი.

ყოველდღიური სპორტული გაზეთი "ლელო"

520
მკითხველის კომენტარები / 0 /
მსგავსი ამბები
რუბრიკის სხვა სიახლეები