რაგბი. ლეგიონი. ბილბაოში ქართველთა თავყრილობაა

საფრანგეთის სარაგბო ჩემპიონატის ელიტურ, პირველ დივიზიონში შესვენებაა, რადგან ფრანგული გუნდები ჩემპიონთა თასისა და ჩელენჯ კაპის გათამაშების ნახევარფინალში ასპარეზობენ.

აღსანიშნავია, რომ ორივე ტურნირის ფინალში ქართველ მორაგბეთა თითო გუნდი იასპარეზებს. ჩემპიონთა თასის ნახევარფინალში ვასილ კაკოვინის "მეტრო რასინგმა" შინ მიიღო ირლანდიური "მანსტერი" და 27:22 დაამარცხა. კაკოვინი თადარიგში იყო და მოედანზე 50-ე წუთიდან გამოჩნდა.

პარიზელთა მეტოქე ფინალში, რომელიც ბილბაოში, "სან მამესის" სტადიონზე 12 მაისს გაიმართება, ირლანდიური "ლენსტერი" იქნება, რომელმაც ნახევარფინალში უელსურ "ჰლანეჰლის" სძლია - 38:16

ჩელენჯ კაპის ფინალში ითამაშებს ანტონ ფეიქრიშვილის "კარდიფი", რომელმაც ნახევარფინალში შინ მოუგო ფრანგულ "პოს" 16:10. ფეიქრიშვილი ძირითად შემადგენლობაში იყო და 55-ე წუთზე შეცვალეს. ფინალში კარდიფელების მეტოქე ინგლისური "გლოსტერი" იქნება, რომელმაც ასევე შინ სძლია "ნიუკასლს" - 33:12. ჩელენჯ კაპის ფინალი ასევე ბილბაოში გაიმართება, ჩემპიონთა თასის ფინალამდე ერთი დღით ადრე.

საფრანგეთის ჩემპიონატის ელიტურ, მეორე დივიზიონში ნახევარფინალის შესარჩევი მატჩები გაიმართა. ბექა გიგაშვილის "გრენობლმა" შინ დაამარცხა "ბიარიცი" 33:26 და ნახევარფინალში სტუმრად "მონტობანს" დაუპირისპირდება.

ასევე ნახევარფინალში ითამაშებს სტუმრად, "პერპინიანის" წინააღმდეგ ბექა გორგაძის "მონ დე მარსანი", რომელმაც შინ სძლია "ბეზიეს" - 31:23. ქართველ მორაგბეებს ტრავმების გამო არ უთამაშიათ.

კელტთა ლიგაში უელსური "ოსფრიზის" რიგებში გიორგი ნემსაძის დებიუტი შედგა. ჩვენებურის გუნდმა სტუმრად ითამაშა იტალიურ "ზებრესთან" და 14:37 დამარცხდა. ნემსაძე ძირითად შემადგენლობაში ფლანკერის პოზიციაზე იყო და თავიდან ბოლომდე ითამაშა.

ზე რაგბის გათამაშებაში ჯაბა ბრეგვაძისა და ნიკოლოზ ხატიაშვილის "სანვულვზმა" სტუმრად წააგო ახალ ზელანდიაში, ქრაისჩერჩის "კრუსეიდერზთან" - 11:33. ბრეგვაძე ძირითად შემადგენლობაში იყო და მე-60 წუთზე შეცვალეს. ხატიაშვილი განაცხადში არ იყო.

დავით კაჭარავასა და მიხეილ გაჩეჩილაძის "ენისეი" მომავალი სეზონიდან ისევ "ჩელენჯ კაპზე" ითამაშებს. საპასუხო ნახევარფინალურ მატჩში ჩვენებურთა ამ გუნდმა ჯაბა მალაღურაძის, გიორგი ფრუიძისა და სოსო მათიაშვილის "კარსნი იარს" მოუგო - 27:26.

პირველი შეხვედრა ასევე "ენისეის" გამარჯვებით, 47:22 დასრულდა. განმეორებით მატჩში მათიაშვილმა სამი გარდასახვა გაიტანა. "ენისეი" ფინალში გერმანულ "ჰაიდელბერგს" შეხვდება, რომელმაც, თავის მხრივ, რუმინული "ტიმიშოარა" დაამარცხა და ასევე გაინაღდა "ჩელენჯ კაპზე" თამაშის უფლება. ეს ფინალიც ბილბაოში გაიმართება.

ყოველდღიური სპორტული გაზეთი "ლელო"
800
მკითხველის კომენტარები / 0 /
მსგავსი ამბები
რუბრიკის სხვა სიახლეები