რაგბი. ლეგიონი: გიგაშვილის გრენობლი ისევ გალიდერდა

საფრანგეთის სარაგბო ჩემპიონატის ელიტურ, მეორე დივიზიონში ლიდერთა სამეული, "გრენობლი", "მონტობანი" და "პერპინიანი" ნელ-ნელა შორდება დანარჩენ კონკურენტებს.

ეს კი, მეტწილად, ბექა შეყლაშვილის "კოლომიეს" მოულოდნელი მარცხით არის განპირობებული. ჩვენებურის გუნდმა შინ მიიღო დივიზიონის დებიუტანტი "ნევერი" და 3:29 წააგო. ცხადია, ჯერ კიდევ დიდი გზაა წინ გასავლელი და შესაძლოა, მათი დაწევაც მოახერხოს, მაგრამ აქ მთავარი ეს არაა. მთავარია, რომ ელიტაში აღზევებაზე პრეტენზიის მქონე გუნდი შინ "ნევერის" დონის გუნდებთან, თანაც, უშანსოდ არ უნდა აგებდეს. შეყლაშვილს ამ მატჩში არ უთამაშია.

სატურნირო ცხრილს კი, როგორც უკვე ვთქვით, სათავეში ბექა გიგაშვილის "გრენობლი" უდგას. "ალპელებმა" შინ ვახტანგ მაისურაძის "ვანი" 58:28 დაამარცხეს. აღსანიშნავია, რომ მატჩის არბიტრმა სინბინში სტუმართა გუნდის ოთხი მორაგბე გაუშვა. მათ შორის, 69-ე წუთზე ათი წუთით მოედნის დატოვებამ მაისურაძესაც მოუწია, რომელიც თამაშში 48-ე წუთიდან ჩაერთო. გიგაშვილი მოედანზე რვა წუთის შემდეგ გამოჩნდა.

ლიდერებს ოდნავ მიუხალოვდა ბექა გორგაძის "მონ დე მარსანი", რომელმაც შინ დაძაბულ ბრძოლაში დაამარცხა მინიმალური სხვაობით მერაბ შარიქაძისა და ნიკოლოზ ხატიაშვილის "ორიაკი" - 17:16. ხატიაშვილი თამაშში მე-9 წუთიდან ჩაერთო, გორგაძე ტრავმირებულია, შარიქაძე განაცხადში არ იყო.

შალვა სუთიაშვილის "ანგულემმა" შინ შეძლო "მასის" დამარცხება 23:19 და სახიფათო ზონას ოდნავ დაშორდა. სუთიაშვილმა სრულად ითამაშა.

ბექა ბიწაძის "ნარბონმა" კი ისევ წააგო. ამჯერად, ჩვენებურის გუნდი შინ დამარცხდა გათამაშების ერთ-ერთ ფავორიტთან, კატალონიურ "პერპინიანთან" - 13:24. ბიწაძემ თავიდან ბოლომდე ითამაშა.

გიორგი ნაცარაშვილის, შალვა მამუკაშვილისა და მირიან ბურდულის "კარკასონმა" შინ დაამარცხა უშუალო კონკურენტი, ბასკური "ბაიონი" - 32:16. მიუხედავად ამისა, კარკასონელები ისევ ბოლო ადგილზე არიან. ქართველ მორაგბეებს არ უთამაშიათ.

II დივიზიონი. IX ტური
კოლომიე-ნევერი 3:29
ანგულემი-მასი 23:19
ბიარიცი-დაქსი 23:22
კარკასონი-ბაიონი 32:16
მონ დე მარსანი-ორიაკი 17:16
მონტობანი-ბეზიე 30:27
გრენობლი-ვანი 58:28
ნარბონი-პერპინიანი 13:24

სატურნირო მდგომარეობა
1. გრენობლი - 32 ქულა, 2. მონტობანი - 31, 3. პერპინიანი - 29, 4. კოლომიე - 26, 5. მონ დე მარსანი - 25, 6. ბიარიცი - 25, 7. ბეზიე - 23, 8. მასი - 20, 9. დაქსი - 19, 10. ორიაკი - 18, 11. ნევერი - 18, 12. ანგულემი - 18, 13. ვანი - 15, 14. ბაიონი - 14, 15. ნარბონი - 12, 16. კარკასონი - 11

ყოველდღიური სპორტული გაზეთი "ლელო"

631
მკითხველის კომენტარები / 0 /
მსგავსი ამბები
რუბრიკის სხვა სიახლეები