რაგბი. ლეგიონი. ენისეი ხვამლის ბაზაზე, კრასნი იარი მარტყოფში

შაბათს, "ავჭალის სარაგბო სტადიონი" ევროთასების, კერძოდ კი ჩელენჯ კაპის ერთბაშად ორ მატჩს უმასპინძლებს. ქართველი მორაგბეების რუსული კლუბები, "ენისეი" და "კრასნი იარი" ჯგუფური ეტაპის ბოლო ტურში ინგლისურ გუნდებს, შესაბამისად, "ნიუკასლსა" და "ლონდონ აირიშს" დაუპირისპირდებიან.

კრასნოიარსკის "ენისეის" შემადგენლობაში ორი ქართველი, დავით კაჭარავა და მიხეილ გაჩეჩილაძე ირჯება. გუნდის მთავარი მწვრთნელის, ალექსანდრ პერვუხინის გადაწყვეტილებით, გუნდს ძირითადი შემადგენლობის 14 მორაგბე დააკლდება

რუსეთის ნაკრებს 10 თებერვალს, კრასნოდარში მნიშვნელოვანი მატჩი აქვს ესპანეთის ნაკრებთან, რომლის შედეგზეც მეტწილად იქნება დამოკიდებული, რომელი გუნდი შეძლებს მსოფლიოს თასის საკვალიფიკაციო ეტაპის დაძლევას.

პერვუხინმა ის მოთამაშეები, სწორედ ესპანელებთან მატჩისთვის "გადამალა".  "ენისეის" ოფიციალურმა ვებგვერდმა კი, საქართველოს ნაკრების შუამარბის, დავით კაჭარავას კომენტარი გამოაქვეყნა:

"კლუბებს შორის ასეთი დონის მატჩი თბილისში პირველად ჩატარდება. ვფიქრობ, თამაშზე ბევრი მაყურებელი მოვა. მშობლიურ ქალაქში ვთამაშობთ და ჩემთვის ეს დამატებითი მოტივაციაა. იმედი მაქვს, რომ "ენისეი" აჩვენებს მაქსიმუმს, რისი გაკეთებაც შეუძლია.

ვფიქრობ, მეხუთე ტურში გამარჯვების შემდეგ "ნიუკასლი" ძირითადი შემადგენლობით არ ჩამოვა, რადგან გუნდი ინგლისის ჩემპიონატშიც პირველობისთვისაც იბრძვის.

ამიტომ, მოსალოდნელია, თანაბარი თამაში ორივე გუნდის ახალგაზრდული შემადგენლობების მონაწილეობით. იმედი მაქვს, მოვიგებთ, ყოველ შემთხვევაში, კარგი ბრძოლა ნამდვილად იქნება" - თქვა დავით კაჭარავამ.

"ენისეი" მომავალი მატჩისთვის "ხვამლის" ბაზაზე ემზადება. "კრასნი იარმა" ბინა მარტყოფში დაიდო. თუმცა, გუშინ რუსთავის სარაგბო სტადიონზე ივარჯიშა.
იარელთა ბანაკიდან ჩვენთვის არასასიამოვნო ინფორმაცია მოვიდა.

ტრავმირებულია და თვე-ნახევრის განმავლობაში ვერ ითამაშებს გუნდის ახალწვეული, საქართველოს ნაკრების ფულბეკი სოსო მათიაშვილი. სხვა ქართველები, ლაშა მალაღურაძე, გიორგი ფრუიძე და მიხეილ წიკლაური მწყობრში არიან.

შეგახსენებთ, რომ "ენისეისა" და "ნიუკასლის" მატჩი "ავჭალის სარაგბო სტადიონზე" 14 საათზე დაიწყება. "კრასნი იარი" კი, ლაშა ლომიძის "ლონდონ აირიშს" 17 საათზე დაუპირისპირდება.

ყოველდღიური სპორტული გაზეთი "ლელო"
694
მკითხველის კომენტარები / 0 /
მსგავსი ამბები
რუბრიკის სხვა სიახლეები