რაგბი. ლეგიონი: კიდევ ერთი ქართული დებიუტი ფრანგულ ელიტაში

საფრანგეთის სარაგბო ჩემპიონატის ელიტურ, პირველ დივიზიონში მეოთხე ტურის შემდეგ დაუმარცხებელი ორი გუნდია - "კლერმონი" და "ტულუზი". ამათგან, ლიდერი "ვულკანები" არიან, რადგან ოთხი თამაშიდან ოთხივე მოიგეს.

დავით ზირაქაშვილის, ვიქტორ კოლელიშვილისა და ბექა კაკაბაძის "კლერმონმა" სტუმრად ითამაშა "პოსთან" და მეტოქეს დაძაბულ ბრძოლაში 27:23 მოუგო. ქართველი მორაგბეებიდან ამ შეხვედრაში მხოლოდ კოლელიშვილმა ითამაშა, რომელიც ძირითად შემადგენლობაში იყო და 52-ე წუთზე შეცვალეს.

აღსანიშნავია, რომ "პო", შესაძლოა, ორი ახალზელანდიელი ვარსკვლავით გაძლიერდეს. ეს გუნდი "ოლ ბლექსის" გამორჩეულ მორაგბეებთან არდი სავეასთან და ბენ სმითთან აწარმოებს მოლაპარაკებას.

"ვულკანებს" კვალში უდგას გიორგი მელიქიძის "სტად ფრანსე", რომელმაც შინ შეძლო მამუკა გორგოძისა და ბადრი ალხაზაშვილის "ტულონის" დამარცხება - 37:10. ქართველ მორაგბეებს არ უთამაშიათ.

მიმდინარე გათამაშებაში მეორე მარცხი განიცადა ვასილ კაკოვინისა და გურამ გოგიჩაშვილის "რასინგმა". პარიზელებმა, ამჯერად, სტუმრად წააგეს ფრანგული რაგბის გრანდ "ტულუზთან" - 17:30. კაკოვინი ძირითად შემადგენლობაში იყო და 53-ე წუთზე ის გოგიჩაშვილმა შეცვალა.

საფრანგეთის ჩემპიონატის ელიტურ დივიზიონში საქართველოს ნაკრების მესამეხაზელის, ბექა გორგაძის დებიუტი შედგა. "ბორდომ", რომელშიც ბექას გარდა ლექსო ყაულაშვილი და ლაშა ტაბიძე თამაშობენ, სტუმრად წააგო გიორგი თეთრაშვილისა და თამაზ მჭედლიძის "აჟენთან" - 17:22.

გორგაძე თამაშში 69-ე წუთიდან ჩაერთო, ასევე ექვსი წუთი ითამაშა პირველ ტაიმში, როცა თანაგუნდელი სისხლდენის გამო დროებით შეცვალა. ყაულაშვილმა სრულად ითამაშა, თეთრაშვილი მოედანზე 58-ე წუთიდან გამოჩნდა, ტაბიძე განაცხადში იყო, მაგრამ არ უთამაშია.

მოულოდნელად წარუმატებელი გამოდგა მიხეილ ნარიაშვილის, კონსტანტინე მიქაუტაძის, ლევან ჩილაჩავასა და გელა აფრასიძის "მონპელიეს" სტარტი მიმდინარე გათამაშებაში. მონპელიელებმა მე-4 ტურში, სტუმრად, "ლიონთან" წააგეს დიდი ანგარიშით - 55:13. აფრასიძის გარდა ყველა ქართველი მორაგბე ტრავმირებულია. "მონპელიეს" ოთხი მატჩიდან მხოლოდ ერთი მოგება აქვს და შვიდი ქულით მე-11 ადგილზეა.

ბექა გიგაშვილისა და დავით ქუბრიაშვილის "გრენობლი" სტუმრად დამარცხდა საფრანგეთის ჩემპიონ "კასტრთან" - 13:29. გიგაშვილი ძირითად შემადგენლობაში იყო და 51-ე წუთზე შეცვალეს, ქუბრიაშვილი განაცხდაში არ იყო.

ტოპ-14. IV ტური
ლიონი-მონპელიე 55:13
აჟენი-ბორდო 22:17
კასტრი-გრენობლი 29:13
პო-კლერმონი 23:27
ტულუზი-რასინგი 30:17
ლა როშელი-პერპინიანი 37:10
სტად ფრანსე-ტულონი 37:10

სატურნირო მდგომარეობა
1. კლერმონი - 18 ქულა, 2. სტად ფრანსე - 14, 3. კასტრი - 14, 4. ტულუზი - 14, 5. ლიონი - 12. 6. რასინგი - 10, 7. ლა როშელი - 9, 8. პო - 9, 9. ბორდო - 8, 10. აჟენი - 8, 11. მონპელიე - 7, 12. ტულონი - 4, 13. გრენობლი - 2, 14. პერპინიანი - 1.

ინგლისის ჩემპიონატში მესამე ტურის შეხვედრები გაიმართა. საქართველოს ნაკრების პირველხაზელის, ზურაბ ჟვანიას "ვოსფსმა" შინ მიიღო "ლესტერ ტაიგერსი" და მძიმე ბრძოლაში 41:35 დაამარცხა.

ჟვანია თამაშში 49-ე წუთიდან ჩაერთო, როცა მისი გუნდი 25:28 აგებდა. მასპინძლებმა მაინც შეძლეს მეტოქის წინააღმდეგობის გატეხვა და ძალზე საჭირო გამარჯვება მიითვალეს. "ვოსფსმა" სამი თამაშიდან ორი მოიგო და სატურნირო ცხრილში 10 ქულით მე-4 ადგილზეა.

კელტთა ლიგაში, მესამე ტურში პირველი მარცხი იწვნია გიორგი ნემსაძის "ოსფრიზმა". ჩვენებურის გუნდი სტუმრად, ირლანდიურ "მანსტერთან" დამარცხდა - 13:49. ნემსაძე, რომელმაც სრულად ითამაშა, მატჩის არბიტრმა მე-17 წუთზე სინბინში გაუშვა. "ოსფრიზს" ახლა 10 ქულა აქვს და A ჯგუფში მესამე ადგილზეა.

ყოველდღიური სპორტული გაზეთი "ლელო"
892
მკითხველის კომენტარები / 0 /
მსგავსი ამბები
რუბრიკის სხვა სიახლეები
;