რაგბი.ლეგიონი. მონპელიე შემოდგომის ჩემპიონია

საფრანგეთის სარაგბო ჩემპიონატის ელიტურ, პირველ დივიზიონში მე-13 ტურის შემდეგ, "შემოდგომის ჩემპიონი" ქართველ მორაგბეთა "მონპელიე" გახდა.

საპლეიოფო ექვსეულში მასთან ერთად კიდევ სამი "ქართული გუნდი", "მეტრო რასინგი", "ტულონი" და "ლა როშელია".

მიხეილ ნარიაშვილის, კონსტანტინე მიქაუტაძისა და დავით ქუბრიაშვილის "მონპელიეს" შინ უშუალო კონკურენტთან, თორნიკე მატარაძისა და გურამ პაპიძის "ლიონთან" მოუწია ასპარეზობამ.

სტუმრებმა მეტოქეს ღირსეული წინააღმდეგობა 69-ე წუთამდე გაუწიეს. ამ დროისთვის ანგარიში 17:17 იყო. დასკვნით ათ წუთში მონპელიელებმა იძალეს და სამი უპასუხო ლელო გაიტანეს.

ნარიაშვილი ძირითად შემადგენლობაში იყო, 52-ე წუთზე შეცვალეს, მიქაუტაძე მოედანზე მე-11 წუთიდან გამოჩნდა, ქუბრიაშვილი ტრავმირებულია.
ამ გამარჯვების შემდეგ "მონპელიე" სატურნირო ცხრილში დაწინაურდა, რადგან ლიდერი, ლექსო ყაულაშვილის "ლა როშელი" სტუმრად დამარცხდა "ბორდოსთან" - 19:29. ყაულაშვილი ტრავმირებულია.

კიდევ ერთხელ ითამაშა ქართველების გარეშე მამუკა გორგოძის, ლევან ჩილაჩავასა და ბადრი ალხაზაშვილის "ტულონმა", რომელმაც შინ აუტსაიდერი, ირაკლი მირცხულავასა და გიორგი ვეფხვაძის "ოიონაქსი" მიიღო და 49:25 დაამარცხა.

აღსანიშნავია, რომ ოიონაქსელებმა პირველი ტაიმი 19:13 მოიგეს კიდეც. თუმცა, შესვენების შემდეგ ამუშავებეულ მძლავრ "ტულონურ მანქანას" ვეღარაფერი დაუპირისპირეს.

ჩვენებურთაგან მხოლოდ მირცხულავამ ითამაშა, რომელიც ძირითად შემადგენლობაში იყო და 61-ე წუთზე შეცვალეს. გორგოძე სერიოზულად დაშავდა ერთ-ერთ ვარჯიშზე და სეზონის ბოლომდე ვერ ითამაშებს.

ვასილ კაკოვინის "მეტრო რასინგმა" უმძიმესი ბრძოლა გადაიტანა შინ "ტულუზთან" და 23:19 გაიმარჯვა. ეს ანგარიში მატჩის ჯერ კიდევ 61-ე წუთზე დაფიქსირდა და თამაშის დასრულებამდე დარჩენილ 19 წუთში გუნდებმა მონაგარს ვეღარაფერი შესძინეს.

კაკოვინი სათადარიგოთა შორის იყო და თამაშში 58-ე წუთიდან ჩაერთო.

სამწუხაროდ, სატურნირო ცხრილის ბოლო სამი საფეხურიც ქართველ მორაგბეთა გუნდებს უჭირავთ და დივიზიონში ადგილის შენარჩუნებისთვის იბრძვიან. "ოიონაქსის" შესახებ უკვე ვთქვით.

თამაზ მჭდლიძის, გიორგი თეთრაშვილისა და ვახტანგ ახობაძის "აჟენმა" კარლენ ასიეშვილის, სოსო ბეკოშვილისა და ვასილ ლობჟანიძის "ბრივს" უმასპინძლა და 27:13 მოუგო. ქართველი მორაგბეებიდან მხოლოდ ასიეშვილმა ითამაშა, რომელიც მალევე, 22-ე წუთზე შეცვალეს.

TOP-14 ტური

XIII ტური

რასინგი-ტულუზი 23:19
აჟენი-ბრივი 27:13

ბორდო-ლა როშელი 29:19
მონპელიე-ლიონი 38:17

კასტრი-სტად ფრანსე 28:6
პო-კლერმონი 22:21
ტულონი-ოიონაქსი 49:25

თ მ ფ წ ბ ქ(პ)
1. მონპელიე 13 9 0 4 +94 42(6)
2. ლა როშელი 13 9 0 4 +114 39(3)
3. კასტრი 13 8 0 5 +49 38(6)
4. რასინგი 13 8 0 5 +69 37(5)
5. ტულონი 13 7 0 6 +65 36(8)
6. ტულუზი 13 7 1 5 +38 33(3)
7. ლიონი 13 7 0 6 +36 33(5)
8. ბორდო 13 7 1 5 +34 33(3)
9. პო 13 7 0 6 -2 31(3)
10. კლერმონი 13 6 1 6 +57 30(4)
11. სტად ფრანსე 13 5 0 8 -93 22(2)
12. აჟენი 13 4 0 9 -79 18(2)
13. ბრივი 13 3 1 9 -187 15(1)
14. ოიონაქსი 13 1 2 10 -197 11(3)

მეორე დივიზიონში მე-17 ტურის შემდეგ მკვეთრად გამოიკვეთა ის ოთხი გუნდი, რომელთა დავაშიც ალბათ ვეღარავინ ჩაერევა. ამათგან ორი, ქართველი მორაგბეებისაა. ესენია: "მონ დე მარსანი" და "გრენობლი". ვინ იქნება მეხუთე?

ყველაზე რეალური შანსი ქართველ მორაგბეთა გუნდებიდან "კოლომიეს" აქვს. მიზერული კი, "ორიაკსა" და "ვანს".
ბექა გიგაშვილს "გრენობლის" შემადგენლობაში და ბექა გორგაძეს "მონ დე მარსანის" რიგებში ისევ არ უთამაშიათ.

მიზეზი ცნობილია - ტრავმა. სამაგიეროდ, მოედანს დაუბრუნდა ტრავმის მოშუშების შემდეგ "კოლომიეს" პირველხაზელი ბექა შეყლაშვილი. კოლომიელებმა შინ დაამარცხეს ელიზბარ ყუფარაძის "დაქსი" - 31:12.

შეყლაშვილი თადარიგში გახლდათ და თამაშში 48-ე წუთიდან ჩაერთო, ყუფარაძე განაცხადში არ იყო.

საკმაოდ უხეში გამოდგა მერაბ შარიქაძისა და ნიკოლოზ ხატიაშვილის "ორიაკის" საშინაო დაპირისპირება გათამაშების ლიდერ "მონტობანთან". მატჩის არბიტრმა წითელი ბარათი სამ მორაგბეს უჩვენა. აქედან ორი ორიაკელი იყო. მასპინძლები 63-ე წუთამდე 16:15 იგებდნენ. თუმცა, სტუმრებმა გამარჯვების მომტანი ლელოს გატანა შეძლეს 22:16 და დასკვნით 17 წუთში მატჩის ანგარიში აღარ შეცვლილა.

შარიქაძე ძირითად შემადგენლობაში იყო და 71-ე წუთზე შეცვალეს, ხატიაშვილს არ უთამაშია.

სამწუხაროდ, სატურნირო ცხრილის ბოლო სამი საფეხური აქაც "ქართულ გუნდებს" უკავიათ. "დაქსის" თაობაზე უკვე ვთქვით. შალვა მამუკაშვილის, მირიან ბურდულისა და გიორგი ნაცარაშვილის "კარკასონმა", რომელიც ბოლო ადგილზეა, შინ მიიღო "ნევერი" და 24:14 დაამარცხა.

მამუკაშვილი ძირითად შემადგენლობაში იყო და 41-ე წუთზე შეცვალეს, ნაცარაშვილი თამაშში 56-ე წუთიდან ჩაერთო, ბურდული კი, მოედანზე 12 წუთის შემდეგ გამოჩნდა.

"ნარბონის" შემადეგნლობაში არ იყო ბექა ბიწაძე. ნარბონელებმა სტუმრად წააგეს ერთ-ერთ ლიდერ "პერპინიანთან" - 3:26.

PRO D2

XVII ტური

გრენობლი-ბაიონი 28:23
ორიაკი-მონტობანი 16:22

ბიარიცი-ანგულემი 34:24
კოლომიე-დაქსი 31:12

კარკასონი-ნევერი 24:14
მარსანი-მასი 24:6

პერპინიანი-ნარბონი 26:3
ვანი-ბეზიე 32:0

თ მ ფ წ ბ ქ(პ)
1. მონტობანი 17 14 1 2 +116 60(2)
2. მარსანი 17 11 0 6 +213 55(11)
3. პერპინიანი 17 11 1 5 +151 54(8)
4. გრენობლი 17 12 0 5 +84 53(5)
5. ბიარიცი 17 10 0 7 +63 46(6)
6. კოლომიე 17 9 1 7 +32 45(7)
7. ბეზიე 17 9 0 8 -14 40(4)
8. ვანი 17 7 0 10 -60 35(7)
9. ორიაკი 17 7 1 9 +22 34(4)
10. ბაიონი 17 7 0 10 -62 34(6)
11. ანგულემი 17 7 1 9 -52 33(3)
12. მასი 17 7 0 10 -45 32(4)
113. ნევერი 17 7 0 10 -38 31(3)
14. დაქსი 17 6 0 11 -125 28(4)
15. ნარბონი 17 5 1 11 -187 25(3)
16. კარკასონი 17 4 0 13 -98 23(7)

ყოველდღიური სპორტული გაზეთი "ლელო"
1093
მკითხველის კომენტარები / 0 /
მსგავსი ამბები
რუბრიკის სხვა სიახლეები
;