რაგბი. ლეგიონი: მჭედლიძის ლელო, გორგოძის ტრავმა - ტოპ-14 დაიწყო

* პირველი ტური ტოპ-14-ში, პირველი ქართული ლელო.
* თამაზ მჭედლიძემ პირველ ტაიმში გაუტანა ლელო "კლერმონს".
* მამუკა გორგოძის ტრავმა.
* ბრივში ქართველებს ჯერ ნაკლებად ათამაშებენ.
* ბოლო საკონტროლო მატჩში ლელო ზურაბ ჟვანიამ გაიტანა.

საფრანგეთის სარაგბო ჩემპიონატი დაიწყო. ელიტურ, პირველ დივიზიონში პირველი ტურის მატჩები გაიმართა, სადაც, ფაქტობრივად, ყველა ფავორიტმა გაიმარჯვა.

თვალში მხოლოდ "ტულონისა" და "მონპელიეს" საშინაო მატჩების მარცხები შეიძლება მოგხვდეთ. თუმცა, მეტოქე ტულონელებს საკმაოდ მრისხანე, პარიზული "რასინგი" ჰყავდა, "მონპელიემ" კი ქვეყნის ჩემპიონთან წააგო.

"ტულონისა" და "რასინგის" დაპირისპირებაში სტუმრებმა 25:9 მოიგეს. სამწუხაროდ, მამუკა გორგოძე, რომელიც მეორე ხაზში ირჯებოდა, დაშავდა და 24-ე წუთზე შესაცვლელი შეიქნა. პარიზელთა რიგებში შერკინების ბურჯი ვასილ კაკოვინი 55-ე წუთზე გამოჩნდა. ბადრი ალხაზაშვილი და გურამ გოგიჩაშვილი განაცხადში არ იყვნენ.


მიხეილ ნარიაშვილის, კონსტანტინე მიქაუტაძის, გელა აფრასიძისა და ლევან ჩილაჩავას "მონპელიე" ქვეყნის ჩემპიონ "კასტრთან" ვერას გახდა - 20:25. ქართველებიდან მხოლოდ მიქაუტაძემ ითამაშა, რომელიც თადარიგში იყო და მოედანზე 58-ე წუთიდან გამოჩნდა.

უხვქულიანი გამოდგა დავით ზირაქაშვილის, ვიქტორ კოლელიშვილისა და ბექა კაკაბაძის "კლერმონის" საშინაო დაპირისპრება გიორგი თეთრაშვილისა და თამაზ მჭედლიძის "აჟენთან" - 67:23. აჟენელებმა პირველი ტაიმი 16:15 მოიგეს. მჭედლიძემ, რომელმაც სრულად ითამაშა, 25-ე წუთზე ლელო გაიტანა.
შესვენების შემდეგ "ვულკანებმა" მეტოქეს რვა ლელო გაუტანეს გამარჯვების ყველანაირი იმედი გადაუწურეს. თეთრაშვილი 41-ე წუთზე შეცვალეს, ზირაქაშვილმა მოედანი ორი წუთის შემდეგ დატოვა, სხვა ქართველებს არ უთამაშიათ.


წარმატებული სტარტი აიღო ლექსო ყაულაშვილის, ლაშა ტაბიძისა და ბექა გორგაძის "ბორდომ", რომელმაც შინ დაამარცხა "პო" - 41:19. ყაულაშვილი, რომელიც არბიტრმა 44-ე წუთზე სინბინში გაუშვა, ტაბიძემ 79-ე წუთზე შეცვალა. გორგაძე განაცხადში არ იყო.

დავით ქუბრიაშვილისა და ბექა გიგაშვილის "გრენობლმა" სტუმრად წააგო "ლა როშელთან" - 21:28. ქუბრიაშვილი ძირითად შემადგენლობაში იყო და 54-ე წუთზე შეცვალეს, გიგაშვილს არ უთამაშია.

ტოპ-14. I ტური

პერპინიანი-სტად ფრანსე 15:46
ბორდო-პო 41:19
კლერმონი-აჟენი 67:23
ლიონი-ტულუზი 16:16
ლა როშელი-გრენობლი 28:21
ტულონი-რასინგი 9:25
მონპელიე-კასტრი 20:25

მერე დივიზიონში ორი ტურის შემდეგ დაუმარცხებელი ოთხი გუნდი დარჩა. ამათგან ქართველი მორაგბეების არცერთია. თუმცა, ჯერ ლიდერებზე და ელიტურ დივიზიონში გადაბარგების სავარაუდო კანდიდატებზე ლაპარაკი ნაადრევია.
ქართველ მორაგბეთა გუნდებიდან სატურნირო ცხრილში ყველაზე წინ თორნიკე მატარაძისა და გურამ პაპიძის "ნევერია", რომელმაც სტუმრად, უმძიმეს ბრძოლაში წააგო ირაკლი მირცხულავას "ოიონაქსთან" - 29:30. ქართველები განაცხადში არ იყვნენ.

"ნევერს" კვალში ვახტანგ ახობაძის "ბიარიცი" უდგას, რომელმაც ასევე სტუმრად წააგო "მონტობანთან" მინიმალური სხვაობით - 15:16. ახობაძე თადარიგში იყო და თამაშში 52-ე წუთიდან ჩაერთო.

პირველი გამარჯვება მოიპოვა კარლენ ასიეშვილის, სოსო ბეკოშვილის, ოთარ გიორგაძის, ვასილ ლობჟანიძისა და ლუკა გოგინავას "ბრივმა", რომელმაც შინ ბექა შეყლაშვილის "კოლომიეს" სძლია - 27:17. ქართველთაგან მხოლოდ ბეკოშვილმა ითამაშა, რომელიც მოედანზე 41-ე წუთიდან გამოჩნდა.

პირველი მარცხი იწვნია მერაბ შარიქაძის, გიორგი ჯავახიას, გიორგი ცუცქირიძისა და გიორგი ვეფხვაძის "ორიაკმა". ჩვენებურთა გუნდი სტუმრად დამარცხდა დივიზიონის დებიუტანტ "ექსთან" - 18:48. ქართველებს არ უთამაშიათ.


შალვა სუთიაშვილის "ანგულემმა" სტუმრად წააგო "კარკასონთან" - 15:18. სუთიაშვილი ძირითად შემადგენლობაში იყო, დაშავდა და 21-ე წუთზე შეცვალეს.

პრო დ2. II ტური

მონტობანი-ბიარიცი 16:15
ბრივი-კოლომიე 27:17
ბეზიე-მასი 37:26
კარკასონი-ანგულემი 18:15
ექსი-ორიაკი 48:18
ნევერი-ბურგ ან ბრესი 53:13
ოიონაქსი-ნევერი 30:29
ბაიონი-მონ დე მარსანი 28:28

სატურნირო მდგომარეობა
1. ბეზიე - 8 ქულა, 2. მონტობანი - 8, 3. მონ დე მარსანი - 7, 4. ნევერი - 6, 5. ექსი - 6, 6. ბაიონი - 6, 7. ბიარიცი - 5, 8. ოიონაქსი - 5, 9. კარკასონი - 5, 10. ბრივი - 4, 11. კოლომიე - 4, 12. ორიაკი - 4, 13. ვანი - 4, 14. ანგულემი - 2, 15. ბურგ ან ბრესი - 2, 16. მასი - 0

ინგლისის ჩემპიონატი მომავალ უქმეებზე იწყება. ქართველი მორაგბის ზურაბ ჟვანიას "ვოსფსმა", რომელიც ინგლისური რაგბის ერთ-ერთი ფლაგმანია, ბოლო საკონტროლო შეხვედრა გამართა. ჩვენებურის გუნდმა ქოვენთრიში, "რიკოჩ არენაზე" ირლანდიურ "ალსტერს" უმასპინძლა და 31:14 დაამარცხა. ჟვანია თამაშში მეორე ტაიმიდან ჩაერთო და 44-ე წუთზე ლელო გაიტანა.

ინგლისის ჩემპიონატის პირველ ტურში, 1-ელ სექტემბერს ჟვანიას "ვოსფსი" შინ მიიღებს "ვორსტერს".

ყოველდღიური სპორტული გაზეთი "ლელო"
335
მკითხველის კომენტარები / 0 /
მსგავსი ამბები
რუბრიკის სხვა სიახლეები