რაგბი. ლეგიონი. სამი ქართული ლელო საფრანგეთში

საფრანგეთის სარაგბო ჩემპიონატის ელიტურ, პირველ დივიზიონში საკუთარი ლელოების ანგარიში გახსნა საქართველოს ნაკრებისა და "ბორდოს" მესამეხაზელმა ბექა გორგაძემ.

ბორდოელებმა მე-7 ტურში სტუმრად ითამაშეს "გრენობლთან" და 25:28 დამარცხდნენ. მატჩის 45-ე წუთზე "ბორდომ" მეტოქის ლელოდან ხუთ მეტრში დერეფნიდან მოლი ააგორა და ჩათვლის მოედანში შეაღწია. ბოლოს ბურთით ხელში გორგაძე იყო. ის 73-ე წუთზე შეცვალეს. "ბორდოს" შემადგენლობაში პირველად ითამაშა პირველხაზელმა ლაშა ტაბიძემ, რომელმაც 56-ე წუთზე ლექსო ყაულაშვილი შეცვალა.

მეორე დივიზიონში უმნიშვნელოვანესი გამარჯვება მოიპოვა ქართველ მორაგბეთა კლუბმა "ორიაკმა", რომელმაც შინ სძლია "მონტობანს" - 28:15. ამ წარმატებაში ლომის წილი დაიდო საქართველოს ნაკრების მესამეხაზელმა გიორგი ცუცქირიძემ, რომელმაც სრულად ითამაშა და მე-20 წუთზე საკმაოდ ეფექტური კომბინაციის შემდეგ ლელო გაიტანა.

გათამაშების ერთ-ერთმა ლიდერმა, "ბრივმა" შინ მოუგო "ანგულემს" - 31:18. ამ მატჩში ანგარიში საქართველოს ნაკრების მესამეხაზელმა ოთარ გიორგაძემ ლელოთი მე-9 წუთზე გახსნა. მან სრულად ითამაშა. ვასილ ლობჟანიძე მატჩში 70-ე წუთიდან ჩაერთო.

ყოველდღიური სპორტული გაზეთი "ლელო"
203
მკითხველის კომენტარები / 0 /
რუბრიკის სხვა სიახლეები